Ustad tarzən Ramiz Quliyevlə Bakı Musiqi Akademiyasında görüş olub

Mayın 18-də Üzeyir Hacıbəyli adına Bakı Musiqi Akademiyasında görkəmli tarzən, xalq artisti, professor, Ramiz Quliyevlə R.Babayev adına 25 saylı musiqi məktəbinin müəllim və tələbə kollektivinin görüşü keçirilib.

Dahi bəstəkar Ü.Hacıbəylinin anadan olmasının 125-ci ildönümü ərəfəsində keçirilən bu tədbir Musiqi Akademiyasında bir vaxtlar Üzeyir bəyin iş otağı olmuş kabinetdə təşkil edilib. Görüşdə dahi bəstəkarın yetişdirdiyi görkəmli musiqiçilərin, pedaqoqların həyat və yaradıcılığı haqqında söylənilən xatirələr iştirakçılarda dərin təəssürat oyadıb.

Tədbir çərçivəsində Ramiz Quliyevin uzun illər fəaliyyət göstərdiyi auditoriyada gənc musiqiçilərə verdiyi “Ustad dərs”i çox maraqla dinlənilib. Görüşün sonunda Musiqi Akademiyasının zalında məktəb şagirdlərinin ifasında Ü.Hacıbəyov, Q.Qarayev, F. Əmirov, Niyazi, S.Rüstəmov, A.Məlikov, T.Bakıxanov, A.Mosart, F.Şopen, Debüssi və digər böyük bəstəkarların əsərləri, eləcə də muğamlardan parçalar ifa olunub.

GÜNEL

525-ci qəzet.- 2010.- 20 may.- S.7.