Dövlət Filarmoniyasında Rəsul Rzanın yubiley gecəsi olub

M.Maqomayev adına Dövlət Filarmoniyasında xalq şairi Rəsul Rzanın anadan olmasının 100 illik yubileyinə həsr edilmiş poeziya gecəsi keçirilib.

Gecədə çıxış edən baş nazirin müavini, xalq yazıçısı Elçin Əfəndiyev böyük ədibin 100 illik yubileyinin geniş şəkildə qeyd edilməsi ilə bağlı ölkə başçısının imzaladığı sərəncamın ölkəmizdə ədəbiyyatın inkişafına, sənət adamlarına göstərilən diqqət və qayğının daha bir bariz nümunəsi olduğunu diqqətə çatdırıb: “Artıq ölkəmizdə və onun hüdudlarından kənarda Rəsul Rzanın yubileyi ilə bağlı silsilə tədbirlər keçirilir. Zaman göstərir ki, Rəsul Rza poeziyası əbədiyaşardır”.

R.Rzanın 100 illik yubileyi münasibətilə silsilə tədbirlərin keçirildiyini deyən Yazıçılar Birliyinin sədri, xalq yazıçısı Anar tədbir iştirakçılarına minnətdarlığını bildirib: “XX əsr Azərbaycan ədəbiyyatının görkəmli nümayəndələrindən olan Rəsul Rza söz sənətimizə forma və məzmunca yeniliklər gətirərək novator şair kimi geniş şöhrət qazanıb. Onun əsərləri gündən-günə gəncləşərək, daim müasir qalır, hər zaman özünə yeni oxucular tapır”.

Yubiley tədbirində çıxış edən Avrasiya Yazarlar Birliyinin sədri Yaqub Dəliöməroğlu R.Rza yaradıcılığının bəşəriliyindən, milliliyindən, onun Vətənə, torpağa sonsuz sevgisindən söz açıb və şairin qardaş Türkiyədə böyük maraqla oxunduğunu diqqətə çatdırıb.

Tədbirdə çıxış edənlər şairin həyat və yaradıcılıq yoluna nəzər salıblar, onun Azərbaycan dilinin poetik potensialının yeni-yeni imkanlarını üzə çıxardığını vurğulayıblar: “Rəsul Rza yarım əsrə yaxın dövrdə yüksək dəyərli bədii nümunələr yaratmaqla yanaşı, respublikamızın elmi-mədəni həyatında yaxından iştirak edib, dolğun və səmərəli ictimai fəaliyyəti ilə tanınıb. Rəsul Rza öz orijinal yaradıcılıq nümunələri ilə daim oxucuları düşündürən şairlərdən olub”.

Gecədə xalq artistləri Fəxrəddin Manafov, Xuraman Qasımova, Mələkxanım Əyyubova, Əminə Yusifqızı, əməkdar artistlər Mehriban Zəki, Gülyanaq Məmmədova və başqalarının ifasında R.Rzanın şeirlərindən parçalar və sözlərinə yazılan mahnılar səslənib.

Musiqiçiləri xalq artisti, dirijor Teymur Göyçayevin rəhbərliyilə Azərbaycan Dövlət Kamera Orkestri müşayiət edib.

Yubiley tədbiri çərçivəsində filarmoniyanın foyesində R.Rzanın həyat və yaradıcılığını əks etdirən sərgi nümayiş olunub.

SARA

525-ci qəzet.- 2010.- 21 may.- S.7.