“Şəkinin sənət dünyası və Azərbaycan mədəniyyəti” müzakirə edilib

Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzinin təşkilatçılığı ilə Şəkidə “Şəkinin sənət dünyası və Azərbaycan mədəniyyəti” mövzusunda dəyirmi masa keçirilib. Sözügedən nazirliyin mətbuat xidmətindən verilən məlumata görə, tədbirdə çıxış edən şəhər mədəniyyət və turizm şöbəsinin müdiri Aydın İbrahimxəlilov “2010-2014-cü illər Xalq Yaradıcılığı Paytaxtları” Proqramına əsasən Şəkinin 2010-cu ildə “Azərbaycanın Sənətkarlıq Paytaxtı” elan edildiyini xatırladaraq, bu ilin yerli sənətkarlar üçün çox məhsuldar keçəcəyinə əminliyini ifadə edib.

Şəhər icra hakimiyyəti başçısının müavini Zərinə Cavadova proqram çərçivəsində Şəkidə xalq tətbiqi sənəti, ənənəvi dekorativ sənəti və milli təsviri sənət ənənələri ilə bağlı silsilə tədbirlərin həyata keçirilməsinə başlandığını bildirib, nazirliyin Metodiki Mərkəzinin təşkilatçılığı ilə təşkil olunmuş dəyirmi masanın bu istiqamətdə növbəti tədbirlərdən biri olduğunu vurğulayıb: “Qədim dövlətçilik ənənələrinə, zəngin tarixə malik olan Şəki şəhəri, eyni zamanda sənətin və sənətkarlığın yüksək səviyyədə inkişaf etdiyi ərazilərdəndir. Odur ki, sənətkarlar onlara göstərilən bu etimadı doğrultmaq üçün il ərzində daha da məhsuldar işləməli, Şəki sənətkarlığının şöhrətini daha yüksəklərə qaldırmalıdırlar”.

Tədbirdə çıxış edən Mədəniyyətşünaslıq üzrə Elmi-Metodiki Mərkəzin direktoru, fəlsəfə elmləri doktoru Vilayət İsmayılov proqramın həyata keçirilməsində əsas məqsədi açıqlayıb: “Bu proqram vasitəsilə Azərbaycanın qeyri-maddi mədəni irsinin qorunması və təbliği, xalq sənətinin daha da inkişaf etdirilməsinə, paytaxt şəhərlərin turizm potensialının genişləndirilməsinə və beynəlxalq səviyyədə tanıdılmasına nail olmaq əsas məqsədimizdir. Şübhə etmirəm ki, Şəki sənətkarları proqramın uğurla həyata keçirilməsinə öz layiqli töhfələrini verəcəklər”.

Tədbirdə mərkəzin əməkdaşı, fəlsəfə elmləri namizədi Vahid Ömərov “Şəkinin sənət dünyası və Azərbaycan mədəniyyəti” mövzusunda məruzə ilə çıxış edib.

SARA

525-ci qəzet.- 2010.- 26 may.- S.7.