Xanhüseyn Kazımlı: “Ölməzləri xatırlatmaq müqəddəs borcumuzdur”

Məlum olduğu kimi, ötən həftə Azərbaycan Sosial Rifah Partiyası (ASRP) və Mətbuat Şurasının təşkilatçılığı ilə “Kaspian Plaza” Biznes Mərkəzində milli mətbuatımızın 135 ililyinə həsr olunmuş “Ədalətlilik, təhlükəsizlik və rifah media müstəvisində” adlı ikigünlük beynəlxalq konfrans keçirilib. Konfransda Türkiyə, Fransa, Gürcüstan və digər ölkələrin səfirliklərinin nümayəndələri, bu ölkələrdən olan tanınmış ziyalılar, həmçinin Azərbaycanda fəaliyyət göstərən mətbu orqanlarının, siyasi partiya və qeyri-hökumət təşkilatlarının təmsilçiləri iştirak ediblər. Qeyd edək ki, konfrans zamanı aparılan geniş müzakirələrin və diskussiyaların nəticəsi olaraq, sonda ASRP-nin təşəbbüsü ilə Avrasiya ölkələri üzrə “Beynəlxalq Mətbuat və İnformasiya həmrəyliyi Mərkəzi” təsis olunub. Həmçinin qeyd edək ki, konfrans zamanı tədbirin təşkilatçılarından olan sözügedən partiyanın sədri, millət vəkili Xanhüseyn Kazımlının ön söz yazdığı, o cümlədən ASRP-nin maliyyə dəstəyi ilə işıq üzü görmüş, milli mətbuatımızın banisi Həsən bəy Zərdabinin yaradıcılığına və xatirəsinə həsr olunmuş üç kitabın – “Əkinçi – elm və həyat”, “Bədəni salamat saxlamaq düsturüləməli”, “Təbiət və insan” kitablarının təqdimatı da keçirilib. Maraqlıdır, görəsən, sözügedən kitabların nəşri hansı zərurətdən irəli gəlib? Bununla bağlı mətbuata açıqlamasında ASRP sədri X.Kazımlı bildirib ki, əvvəla, ölməzləri xatırlatmaq müqəddəs borcumuzdur. İkincisi, təsadüfi deyil ki, xalqımızın min illər boyu formalaşmış zəngin milli-mənəvi dəyərlər sistemində böyük yaradıcı şəxsiyyətlərin – ədiblərin, alimlərin, filosofların, sənətkarların qoyub getdiyi irs zaman-zaman həyatı dəyişdirib, məmləkətimizi sivil dəyərlərə qovuşdurub. Bu baxımdan böyük maarifçi, materialist alim, milli məfkurə və işıqlı əməllər sahibi Həsən bəy Zərdabinin yaradıcılığı orta əsrlər epoxasından yeni tariximizə keçidin elmi-mədəni tələbatının geniş spektrini özündə əks etdirir. “19-cu əsrin qabaqcıl dünya dəyərlərinə mükəmməl yiyələnmiş Həsən bəy elm və mədəniyyətin bir sıra sahələrində çağdaş fəaliyyət üçün özüllər yaradıb. Azərbaycan professional teatrının, milli mətbuatımızın və yeni tipli məktəblərin binasını qoymaqla Zərdabi Rusiya imperiyasının əsarəti altına düşmüş xalqımızın milli oyanışına və çox keçmədən istiqlal savaşına qalxmasına həlledici təkan verib”, – deyən X.Kazımlının sözlərinə görə, bu insanın ideya və əməllərinin başlıca qaynağı olan elmi-publisistik əsərləri həm tariximizin bu önəmli dövrünü öyrənmək, həm də çağdaş tərəqqi yollarını düzgün seçib ayırmaq baxımından aktualdır: “Yüksək sivil dəyərləri mənimsəməklə xalqımızın sosial rifah baxımından öncül dünya mövqelərinə çıxmasını hədəfə alan ASRP də Zərdabi irsinin tükənməz ideya-nəzəri və elmi-təcrübi potensialına tez-tez istinad edir. Həsən bəy xalqımızı ayıq-sayıq, elmli, mədəni, sağlam və güclü görmək istəyirdi. O, elmi biliklər və qabaqcıl ideyalar əsasında həyatı sürətlə dəyişdirmək və gözəlləşdirməklə bağlı bütöv praktik konsepsiya yaradıb. Partiyamız bu irsi xalqımıza çatdırmaq üçün böyük mütəfəkkirin həyat və fəaliyyətini bir örnək kimi daim diqqətdə saxlayır, onun əsərlərini indiki nəsillərə çatdırmağı öz fəaliyyətində gərəkli bir istiqamət sayır. Qeyd edim ki, bu vaxtadək Həsən bəyin elmi-kütləvi səpkili bir neçə qiymətli əsərini iki kitab şəklində çap etdirmişik. Bununla yanaşı, milli mətbuatımızın qarşıdan gələn 135 illik yubileyi münasibətilə bir daha yenidən Zərdabi irsinə müraciət edərək, onun “Əkinçi” qəzetində dərc olunmuş elmi-kütləvi səpkili yazılarını “Elm və həyat” adı altında oxuculara təqdim etməyi qərara aldıq və bu məqsədlə də istər sözügedən kitabın, istərsə də digər iki kitabın məlum konfrans zamanı, belə demək mümkünsə, təqdimatını reallaşdırdıq. Hesab edir və inanırıq ki, bu kitablarda, o cümlədən sonuncu kitabda toplanmış materiallar onu oxuyanlar üçün gərəkli və maraqlı olmaqla yanaşı, böyük jurnalistlər ordusu üçün də xalqımıza öz sözü ilə Həsən bəy Zərdabi kimi xidmət göstərmək nümunəsini yenidən aktuallaşdıracaq. Qoy Zərdabinin istədiyi kimi, elmin gur ziyası həyatımıza daim yeniliklər gətirsin, xalqımızı yüksək rifaha qovuşdursun”.

Kamil HƏMZƏOĞLU

525-ci qəzet.- 2010.- 27 may.- S.4.