Uğur olsun, Universitet!

YOLUN AÇIQ OLSUN, AZƏRBAYCAN!

İnsanı, xüsusilə böyük, strateji vəzifə sahibini yaxından tanımaq üçün heç bir təbliğat, heç bir təşviqat həmin adamla bir yerdə, eyni müəssisədə işləmək qədər kömək göstərə bilməz. Mən tələbəlik illərim də daxil olmaqla ömrümün 16 ilini Bakı Dövlət Universitetində keçirmişəm və indi də həyatımız, varlığımız hesab etdiyimiz bu möhtəşəm universitetdə çalışıram. 2010-cu il noyabrın 7-də Azərbaycan parlamentində keçiriləcək seçkilərdə 16 saylı Yasamal seçki dairəsindən Milli Məclisə namizədliyi Yeni Azərbaycan Partiyası tərəfindən irəli sürülmüş akademik Abel Məhərrəmovu bu müəssisədə işlədiyim qısa müddətdə yaxından tanımışam. Azərbaycan ictimaiyyətinin akademik, Bakı Dövlət Universitetinin rektoru, Milli Məclisin ötən çağırışdakı üzvü , “Şöhrət” ordenli, bir çox beynəlxalq ödüllərin laureatı kimi tanıdığı Abel Məhərrəmovun insanlıq, rəhbərlik, işgüzarlıq qabiliyyəti, vətəndaşlıq ləyaqəti, azərbaycançılıq səyləri, millətə, xalqa xidmət səviyyəsi onunla bir müəssisədə iş yerində daha aydın üzə çıxır. Bu gün yenidən, həm də elə əvvəlki seçkilərdə onun qələbəsini təmin edən Yasamal rayonu 16 saylı seçki dairəsindən parlament seçkilərinə qatılan Abel Məhərrəmov haqqında seçki kampaniyası dövründə ölkə mətbuatında onlarca təbliğat materialı dərc olundu. Bu yazıların altında Azərbaycanın böyük alimlərindən, şəxsiyyətlərindən tutmuş kövrək qaçqın, köçkün, tələbə adlarınadək çoxçeşidli imzalara rast gəldik. Qocaman akademikdən tutmuş hələ tələbə partasında oturan tələbəyədək imzasına rast gəldiyimiz bu kəslərin hər yazısında Abel Məhərrəmovun o qədər də asan keçilməmiş həyat yolu, elmi, bacarığı, rəhbərlik və insanlıq ləyaqəti, vətəndaşlıq keyfiyyəti çox aydın faktlarla cəmiyyətə, xüsusilə onun namizədliyini yenidən alqışlayan seçicilərinə çatdırıldı. Lakin bütün bunlar sabahdan tarixə çevriləcək qəzet səhifələrindədir. Etiraf edək ki, sabahdan tarixə dönəcək o qəzet səhifələrindən daha çox seçicilərlə birbaşa görüşlərin yaddaşlara köçməsi əlahiddə maraqlı, əlahiddə təsirlidir. Çünki insanın, şəxsiyyətin mahiyyətini dərindən görə bilmək üçün onunla birbaşa ünsiyyətin rolu elmi dəlillərlə də sübut edilmişdir. Xüsusilə çətin seçki kampaniyası dövründə seçicilərlə birbaşa görüşlər bu ünsiyyətin zirvəsi kimi qəbul olunur. Ona görədir ki, Bakı Dövlət Universiteti kimi nəhəng mexanizmə malik bir müəssisənin rəhbəri Abel Məhərrəmov nə qədər işi başından aşsa da bu günlər seçiciləri ilə birbaşa görüşləri ən vacib vəzifələrdən hesab etdi. Yasamal rayonu 16 saylı seçki dairəsinin bütün məhəllələrində onun öz seçiciləri ilə görüşləri oldu. Mən də Yasamal rayonu 16 saylı seçki dairəsinin sakiniyəm və akademikin seçicilərlə görüşlərinin çoxunda şəxsən iştirak etmişəm. Namizədlə seçicilərin bu görüşlərinin hər birinin öz təəssüratı, öz məzmunu var. “Dostunu mənə göstər, sənin kim olduğunu deyim” kimi qədimlərin sınağından çıxmış atalar sözünün nə qədər böyük həqiqət olduğunu bu görüşlərə qatılandan sonra bir daha dərindən anladım. İştirak etdiyim bu görüşlərdən anladım ki, Abel müəllim hər kəsdən əvvəl öz seçicilərinin yaxın və sədaqətli dostudur. Onlar belə bir dostunu el-obaya, xalqa göstərməklə həm də özlərinin kim olduğunu ölkəyə bəyan edirlər. Bəyan edirlər ki, Abel Məhərrəmov kimi dövlət və ictimai xadim, ləyaqətli vətəndaş və rəhbər bir insanı özlərinə deputat seçməklə ötən 5 ildə aralarında yaranmış dostluq, doğmalıq əlaqələrini daha da möhkəmləndirirlər. Onlar millətə bəyan edirlər ki, Abel müəllim öz seçicilərinə dostluğa layiq olduğu kimi seçiciləri də bu böyük alimə, ictimai xadimə layiq dostdurlar. Deputatlığa namizəd Abel Məhərrəmov daha bir istiqamətdən sıx münasibətdə olduğu dostları ilə özünün kim olduğunu millətə sübut etdi. Bu dostlar Abel müəllimin rəsmi qeydə alınmış vəkilləri oldu. Abel müəllim öz vəkilləri ilə seçicilərinə müdrik atalar sözünü bir daha xatırlatdı: “Mən sizə dostlarımı göstərim, mənim kim olduğumu deyin” postulatını ortaya qoydu. Kimdir Abel Məhərrəmovun dostları-vəkilləri? Onlardan birincisi nəinki Azərbaycanın, bütövlükdə Şərq dünyasının şərqşünas – ilahiyyatçı alim kimi tanıdığı, Tanrı adamı, akademik Vasim Məmmədəliyevdir. Azərbaycan ictimaiyyətinin elminə, sözünə, ləyaqətinə pərəstiş etdiyi akademik Vasim Məmmədəliyev bütün görüşlərdə Abel müəllimin dayağı oldu. Onun bu namizəd haqqında fikirləri hər dəfə seçicilər tərəfindən hərarətlə qarşılanırdı: “Mən ona sevinirəm ki, sözü bütöv, verdiyi vədlərə sadiq, vətəndaşlıq ləyaqəti, xalqa, millətə layiq bir insan haqqında yalnız həqiqətləri söyləmək kifayətdir ki, onu böyük bir şəxsiyyət kimi təqdim edə biləsən. Ona sevinirəm ki, Abel Məhərrəmovun şişirdilmiş faktlara ehtiyacı yoxdur. Onun haqqında danışmaq özü də savab işdir”. Vasim Məmmədəliyevin Abel müəllimə dəqiq qiyməti: “Hər kəs alim də ola bilər, cəmiyyətdə xeyirxah insan kimi də tanınar. Amma Abel Məhərrəmov kimi bəşəri dəyərləri milli mənəvi keyfiyyətlərlə sintez edib öz şəxsiyyətini formalaşdırmaq az adama nəsib olan xoşbəxtlikdir”. Bu sözləri Abel müəllim haqqında adi bir kimsə deyil, həmin keyfiyyətləri özünün də şəxsi həyatında yaşamaqda olan böyük bir alim deyirdi... Məhəlli görüşlərdən birində namizədin digər vəkili, görkəmli hüquqşünas alim, akademik Məsumə Məlikovanın aşağıdakı sözləri seçicilər tərəfindən hərarətlə qarşılandı. “Abel müəllim ona görə xoşbəxtdir ki, əməlləri, milli və bəşəri dəyərləri özündə birləşdirən keyfiyyətləri ilə seçilir və sevilir”. Bu qiymətli cümlədə bəlkə də kütləyə o qədər də aydın olmayan leksika vardı, amma bu fikrin alqışlarla qarşılanması sübut etdi ki, Yasamal camaatı vəkilin sözlərini çox gözəl anladı. Akademik Məsumə Məlikovanın daha bir fikri bizim bu yazıda Abel müəllimin seçiciləri ilə dostluq tellərinin həqiqət olduğunu sübut edir: “Ötən beş ildə Abel müəllim seçiciləri ilə o qədər səmimi olub ki, bu yaxınlıq dostluq səviyyəsinə ucalıb”. Abel Məhərrəmovun digər vəkili Azərbaycan Milli istiqlal hərəkatının hələ 70-ci illərdə əsasını qoyanlardan biri, türk dünyasına göstərdiyi xidmətlərinə görə Altaylardan tutmuş Anadoluya qədər türksoylu xalqların dərin məhəbbətini qazanmış akademik Tofiq Hacıyev öz nitqində sanki deputatın ötən 5 ildəki fəaliyyətinə yekun vurdu: “Son 5 ildə seçiciləri ilə daim ünsiyyətdə olan, insanları düşündürən təkliflərin yerinə yetirilməsi üçün səylə çalışan Abel müəllim millət vəkili adını həqiqi mənada doğruldur”. Namizədin vəkili akademik Tofiq Hacıyevin bu sözlərinin həqiqət olduğuna təkcə elə onun da yaşadığı Yasamal rayonunun sakinləri deyil, bütün Azərbaycan inanırdı. Tarix elmləri doktoru, professor Abuzər Xələfov belə bir həqiqəti dilə gətirdi: “Abel müəllimin adı cəfakeş pedaqoq kimi təhsil fədailərinin sırasında çəkilir. Humanist əməllər sahibi Abel müəllimə insanların inamı böyükdür”. Azərbaycanın Milli Qəhrəmanı Məzahir Rüstəmovun atası professor İzzət Rüstəmov Abel Məhərrəmovu təmsil etdiyi partiyanın nüfuzunu qaldıran bir millət vəkili və yeni seçkilərdə namizəd kimi xarakterizə edir, onun fəaliyyətinin bir sıra detallarını açıqlayırdı. Seçicilər və universitet alimləri içərisində yüksək intellektual səviyyyəsi ilə sevilən dosent Əyyub Əzizovun görüşlərdən birindəki bu sözləri də mitinq iştirakçıları tərəfindən hərarətlə qarşılandı: “Abel müəllim üçün dövlət quruculuğunun təməlində güclü, hazırlıqlı ziyalı potensialı dayanır. Bu qüvvəni yetişdirmək məsuliyyəti və qisməti onun üzərinə düşüb”. Abel Məhərrəmov bu vəzifəni ləyaqətlə yerinə yetirməkdədir. Görüşlərdə Abel müəllimin seçiciləri adından onlarca adam söz alırdı. Bu seçicilərin Abel müəllimə tapşırıqları ilə namizədin platforması hər zaman üst-üstə düşürdü: Azərbaycanın dövlət müstəqilliyinin qorunması, ərazi bütövlüyümüzün bərpası, Azərbaycan vətəndaşlarının sosial problemlərinin həlli, elm və təhsilin uğurlu gələcəyinin təmin edilməsi və s. Qəribədir, biz heç bir dairədə seçicilərin öz namizədinə belə qlobal tapşırıqlarının şahidi olmamışıq. Görünür, Yasamal sakinlərinin qlobal tapşırıq cəsarəti onların namizədinin ölkə və dünya müstəvisinə çıxmaq üçün potensial imkanlara malik olması ilə bağlıdır. Görüşlərdə maraq doğuran faktlardan biri də bu idi ki, Abel müəllimin seçiciləri Vasim Məmmədəliyev, Tofiq Hacıyev, Abuzər Xələfov, İzzət Rüstəmov, Bayram Əfəndiyev, Məsumə Məlikova, İmran Qurbanov, Nurqələm Mikayılov, Zakir Abdullayev və bu kimi məşhur elm xadimləri ilə təmasdan da məmnunluq duyur, onlara da öz ehtiram və məhəbbətlərini bildirirdilər. Yasamal rayonunun müxtəlif məhəllələrində baş tutan bu görüşlərin zirvəsi Abel müəllimin öz çıxışları ilə tamamlanırdı. Akademik bəzi namizədlərin “dağı-dağ üstünə qoymaq” nitqindən uzaq olub tamamilə real həyat faktlarına söykənirdi. Bu çıxışların heç biri digərinə bənzəmirdi. Tanıyanlar, universitetin ən azı Elmi Şuralarında olanlar Abel müəllimin öz nitqindəki səviyyəyə, səmimiyyətə, fakta söykənən fikirlərinə yaxşı bələddirlər. Abel müəllim sözü auditoriyaya ünvanlayan, nitqini səmimiyyət və həqiqət üzərində quran böyük üslub sahibidir. Onun bu görüşlərdə seçicilərinə müraciətlə dediyi aşağıdakı sözlərin səmimiliyi akademikin xarakterinə ekvivalentdir: “Hörmətli seçici! Mən çox məmnunam ki, sizinlə yenidən görüşürəm! Ötən müddət ərzində Respublikamızda, eləcə də rayonumuzda baş verən iqtisadi və siyasi inkişaf dinamikası mənə sizinlə daha açıq ürəklə və səmimiyyətlə görüşməyə əsas verir. Qürur duyduğum millət vəkili adını və sizin etimadınızı doğrultmaq üçün çox çalışmışam. Xeyli iş görülməsinə baxmayaraq etiraf etmək lazımdır ki, nəzərdə tutduğum işlərin bir qismini həyata keçirə bilməmişəm. YAP tərəfindən yenidən namizədliyim irəli sürülmüş Yasamal rayonunda ziyalı təbəqəsinin üstünlük təşkil etdiyini nəzərə alaraq əminəm ki, seçkilərdə mənə böyük dəstək olacaqsınız. Bununla da biz həyata keçirə bilmədiyimiz işləri qarşıdakı illərdə reallaşdıracaq, dövlətimizin və dövlətçiliyimizin möhkəmlənməsi üçün birgə çalışacağıq”. Görüşlərdən birində söylədiyi aşağıdakı fikir müasir aforizm kimi səsləndi:

“Milli Məclis sınaq, eksperimentlər yeri deyil, Milli Məclis sınanmışların yeridir”. Abel müəllim gördüyü işlərdə mənsub olduğu partiyanın ideyalarından, Azərbaycan Prezidentinin azərbaycançılıq duyğularından, xalqın, seçicilərin ona inam və etibarından güc aldığını söyləyirdi. Daha bir qəribə mənzərə: Abel müəllimlə seçici görüşlərinin hər birində səhərdən-axşamadək əsən soyuq külək axşam sakitləşir və salonlara sığmayan seçicilər elə məhəllənin geniş həyətlərinə toplaşırdılar. Bu da Allah adamının-xeyirxah insanın, kimsəsizlərə, qaçqın və köçkünlərə əl tutan ixtiyar sahibinin, 18 min tələbəni öz övladlarından ayırmayan müəllimin, universitetin 2500 nəfərlik işçi kollektivinin qayğıları ilə yaşayan bir rəhbərin və nəhayət, öz seçicilərinin arzu və istəklərinin gerçəkləşməsi yolunda zəhmətini heç vaxt əsirgəməyən bir millət vəkilinin – Abel Məhərrəmovun Tanrı qanadının altında olduğuna təbiətin sübutudur... İyirmi bir günlük seçki kampaniyası çox sürətlə keçdi. Sürətlə keçdi ona görə ki, Abel Məhərrəmovun seçicilərlə görüşlərinin hər biri yaddaşlara həkk olunan maraqlı nağıl kimi, həyatımızın bir parçasının təsviri olan sənətkarlıqla yazılmış bir hekayənin məzmunu kimi ürəklərə köçdü. Bu da seçki təbliğat kampaniyasının son günü. Sabah noyabrın 6-dır. Susqu günüdür. Bütöv bir sutka ərzində heç bir namizəd haqqında, o cümlədən bizim namizədimiz Abel müəllim haqqında da heç nə deyilməyəcək. Bəlkə də bu bizə, hər gün onun işlərindən məmnunluq hissi ilə danışan hər kəsə çətin olacaq. Ancaq neyləyəsən, qanun şahdır və əmr qanunundur. Təsəllimiz odur ki, noyabrın 7-də axşam saatlarında – seçki qutularındakı səslərin hesablanması anında biz Abel müəllimin çox-çox, lap çox səs çoxluğu ilə qalib gəldiyinin şahidi olacağıq. Və elə həmin axşamdan dövlətinə, millətinə, partiyasına sədaqətli millət vəkilinə seçici sifarişlərinin hazırlanması prosesinə başlayacağıq. Uğur olsun, Abel müəllim! Uğur olsun, ünlü alim! Uğur olsun, doğma Universitet! Uğur olsun, Azərbaycan! Yolunuz açıq olsun!

Könül NİFTƏLİYEVA,

fəlsəfə doktoru

525-ci qəzet.- 2010.- 5 noyabr.- S.6.