Bakıda Beynəlxalq Teatr Konfransına start verilib

BEYNƏLXALQ TƏDBİRƏ DÜNYANIN 30 ÖLKƏSİNDƏN 70-ə QƏDƏR NÜMAYƏNDƏ QATILIB

Azərbaycan Dövlət Akademik Milli Dram Teatrında “Dünya teatr prosesi XXI əsrdə: problemlər, perspektivlər və alternativlər” mövzusunda beynəlxalq elmi-praktik teatr konfransının açılış mərasimi keçirilib. Mərasimi giriş sözü ilə açan mədəniyyət və turizm naziri Əbülfəs Qarayev konfransın keçirilmə zərurətlərini dilə gətirib: “Dünyanın böyük teatr ustalarının bir araya gələrək XXI əsrin teatr proseslərini araşdırması hamımız üçün olduqca əhəmiyyətlidir. Belə mühüm bir tədbirin Azərbaycanda keçirilməsi bizdə qürur hissi doğurur. Xatırladım ki, konfrans Prezident İlham Əliyevin 2009-cu il 18 may tarixli Sərəncamı ilə təsdiq edilmiş “Azərbaycan teatrı 2009-2019-cu illərdə Dövlət Proqramı” çərçivəsində Bakıda ilk dəfə keçirilir. Bu konfransda dünyanın 30 ölkəsindən 70-dək qonaq iştirak edir”.

Ə.Qarayev Azərbaycan teatr sənətinin köklərinin daha qədim olduğunu və bu sənətin xalq oyun tamaşalarından qaynaqlandığını bildirib: “Azərbaycan teatr sənətinin çox qədim və zəngin tarixi vardır. İnsanların əmək fəaliyyəti ilə bağlı oyunlar və rəqslər, mövsüm-mərasim bayramları, “Qaravəlli” tipli müxtəlif tamaşa növləri çağdaş teatr sənətinin təməli olub. XIX əsrin ikinci yarısından başlayaraq ölkəmizdə cərəyan edən ictimai-siyasi hadisələr maarifçilik hərəkatının inkişafına güclü təkan verib. Həmin dövr Azərbaycan teatrı üçün də əlamətdar olub. Dahi mütəfəkkir Mirzə Fətəli Axundov tərəfindən ədəbiyyatımıza dram janrının gətirilməsi xalq teatrının peşəkar teatr sənətinə çevrilməsində əhəmiyyətli addım olub. Böyük maarifçi Həsən bəy Zərdabi və görkəmli yazıçı Nəcəf bəy Vəzirovun təşəbbüsü ilə 1873-cü ildə Bakıda M.F.Axundovun “Lənkəran xanının vəziri” və “Hacı Qara” komediyalarının tamaşaları ilə Azərbaycanda, eləcə də bütün müsəlman Şərqində dünyəvi, peşəkar teatrın təməli qoyulub”. Nazir ölkə prezidentinin teatr sənətinə göstərdiyi böyük qayğı və diqqətin ulu öndər Heydər Əliyevin siyasətinin məntiqi davamı olduğunu bildirib: “Elə buna görə də son illər Azərbaycanda teatr sənətinin inkişafı ilə bağlı bir sıra əsaslı qərarlar qəbul edilib. Hazırda Azərbaycanda 27 dövlət teatrı fəaliyyət göstərir. Son 5 ildə bu teatrlarda 433 yeni tamaşa hazırlanıb. Onlardan 68-i nazirliyin sifarişi ilə səhnələşdirilib”.

Ə.Qarayev ötən illərdə respublika teatrlarının dünyanın 20-dən çox ölkəsində Azərbaycanı layiqincə təmsil etməsindən, xarici dövlətlərin tanınmış sənətkarlarının tamaşa hazırlamaq üçün teatrlarımıza dəvət olunmasından, noyabrın 12-dən 30-dək Bakıda keçiriləcək A.P.Çexov adına Beynəlxalq teatr festivalının “İpək yolu” adlı mərhələsi haqqında da məlumat verərək keçirilən beynəlxalq teatr konfransında müasir dövrün teatr problemləri və onların həlli yollarının müzakirə olunacağını diqqətə çatdırıb. Tədbirdə Litva mədəniyyət nazirinin müavini Deyvidas Staponkus, YUNESKO-nun nəzdində Beynəlxalq Teatr İnstitutunun İngiltərə nümayəndəliyinin rəhbəri Nevil Şulman, Çinin Teatr Elmi Tədqiqatlar İnstitutunun rəhbəri, “Teatr jurnalı”nın baş redaktoru Lin Şen, Kanadanın Beynəlxalq Teatr Tənqidçiləri Assosiasiyasının baş katibi Mişel Vais, ABŞ-ın “Azərbaycan interneşnl” jurnalının baş redaktoru xanım Betti Bleyer, Rusiyanın “5 axşam” Beynəlxalq teatr festivalının bədii rəhbəri Marina Dmitrevskaya, Səudiyyə Ərəbistanı Krallığının Beynəlxalq Teatr İnstitutunun ərəb ölkələri üzrə əlaqələndiricisi İbrahim Assiri və ABŞ-ın Beynəlxalq Teatr İnstitutunun nümayəndəsi Peter Qoldfard çıxış edərək, konfransın əhəmiyyətindən danışmış və onun işinə uğurlar arzulanıb. Konfrans bölmə iclası ilə davam edib. İclasda Böyük Britaniya, Qırğızıstan, Azərbaycan, Ukrayna, Gürcüstan və digər ölkələri təmsil edən tanınmış teatrşünaslar müxtəlif mövzularda çıxış ediblər. Qeyd edək ki, konfrans noyabrın 12-də işini yekunlaşdıracaq.

Hüsniyyə İSMƏTQIZI

525-ci qəzet.- 2010.- 11 noyabr.- S.7.