“Oliver Tvistin macəraları”nın premyerası təqdim olunub

Azərbaycan Dövlət Gənc Tamaşaçılar Teatrında dahi ingilis yazıçısı Çarlz Dikkensin “Oliver Tvistin macəraları” tamaşasının premyerası sənətsevərlərin ixtiyarına verilib. Müəllifin eyniadlı əsəri əsasında səhnələşdirilən tamaşanın quruluşçu rejissoru xalq artisti Vaqif Əsədov, rejissoru Sərvər Əliyev, quruluşçu rəssamları Fuad Kafarov və Elnur Babayev, bəstəkarı əməkdar incəsənət xadimi Aydın Əzimov, rejissor assistenti Elnur Kərimovdur. Səhnə əsərində rəsqlərə Nicat Kazımov quruluş verib. Səhnə əsərinin rejissoru Sərvər Əliyev tamaşa haqqında məlumat verərkən deyib: “Dünya ədəbiyyatının korifeylərindən olan Çarlz Dikkensin “Oliver Tvistin macəraları” romanında Londonun cinayət aləmi, yeniyetmə, köməksiz və kimsəsiz uşaqların həyatının bir çox sahələri təsvir olunub. Əsərin süjet xətti baş qəhrəman Oliverin taleyi üzərində qurulub. Azərbaycan səhnəsində ilk dəfə müraciət olunan bu əsərdə Londonun o dövrə məxsus ab-havasını olduğu kimi tamaşaçıya çatdırmağa çalışılıb. Müasir dövrdə Oliver kimi uşaqlara heç də az rast gəlinmir. Tamaşanı səhnələşdirməkdə məqsədimiz hazırkı dövrdə küçələrdə dilənən uşaqları bu yoldan çəkindirmək, cəmiyyətin bu uşaqlara olan biganə və mənfi münasibətini dəyişməkdir”. Tamaşada rolları əməkdar artistlər Qəmər Məmmədova, Leyli Vəliyeva, Nübar Novruzova, İlqar Cahangirov, Ayşad Məmmədov, Nofəl Vəliyev, Elşən Şirəliyev, Məhərrəm Musayev, Qurban İsmayılov və digər sənətçilər ifa edirlər. Baş rolun (Oliver) və ikinci dərəcəli obrazlardan birinin ifaçısı olan gənclər bu tamaşa ilə böyük səhnədə debüt ediblər. Tanınmış teatr mütəxəssislərinin və tamaşaçıların rəyinə əsasən, maraqlı rejissor yozumu, səhnə və işıq tərtibatı, habelə istedadlı aktyor oyununa görə “Oliver Tvistin macəraları” Dövlət Gənc Tamaşaçılar Teatrının növbəti uğurlu işi sayıla bilər.

HÜSNİYYƏ

525-ci qəzet.- 2010.- 19 noyabr.- S.7.