“Ədəbi-bədii düşüncənin sərhədləri” işıq üzü görüb

Tanınmış ədəbiyyatşünas alim, dəyərli publisist Şirindil Alışanlının “Ədəbi-bədii düşüncənin sərhədləri” adlı kitabı nəşr olunub. Kitaba XX əsr ədəbiyyatının dövrləşdirilməsi, yenidən dəyərləndirilməsi, eləcə də poeziyanın və nəsrin bədii təkamülü ilə bağlı maraqlı tədqiqatlar daxil edilib. “XX əsr Azərbaycan ədəbiyyatı: Tarixi dövrləşdirilmənin nəzəri-metodoloji aspektləri” başlıqlı yazıda müəllif XXI əsrin astanasında milli ədəbi dəyərlərin mənəvi sərvətlər kontekstində qiymətləndirilməsinin yeni elmi, ictimai-siyasi və ədəbi-mədəni reallıqlarının yarandığını diqqətə çatdırıb. Tarix boyu müxtəlif məzmunda ortaya çıxan qloballaşma səciyyəli hadisələr zamanı lokal və qlobal mədəni amillərin mövcud olduğunu qeyd edib. Topluda yer alan maraqlı tədqiqatlardan biri də “XX əsr poeziyasının müasir dərkində “Ədəbi mif” amili” dir. Ş.Alışanlı XX əsr Azərbaycan poeziyasını və onu təmsil edən şəxsiyyətlərin yenidən dəyərləndirilməsində tarixi təcrübənin bir amilinin də “ədəbi mif”, “klassik ədəbi şəxsiyyət” probleminin olduğunu vurğulayıb. Müəllif yazıda bildirir ki, hər bir xalqın tarixi, onun əsrlər boyu yaratdığı obrazların – şəxsiyyətlərin tarixidir. “Lirik şeirin imkanları”, “Poeziya: Axtarışlar və tapıntılar”, “Poema: Janrın poetik sərhədləri”, “Təbiətin poetik obrazı”, “Sözün bədii çalarları”, “İşıqlı poeziya” başlıqlı məqalərdə müəllif son illərin lirikasında müasir mənəvi-əxlaqi problemlərin ifadəsində tarixi-mədəni keçmişin poetik şərhini verib və poetik fikir, konkret şeir başlıqlarındakı həmahənglikdən, poeziyamızın inkişaf mərhələlərindən, müasir poema janrının quruluşundakı yeniləşmədən söhbət açıb və bu sahədəki maraqlı düşüncələrini bölüşüb. Ş.Alışanlı O.Sarıvəllinin “Gətir oğlum, gətir”, Şəhriyarın “Heydərbabaya salam” poemaları ilə bağlı maraq doğuran mülahizələr açıqlayıb. Müəllifin qələmə aldığı “İran İslam Respublikasında Şəhriyar günləri”, “Qaçqınlıqdan hara qaçaq”, “Bir görüşün tarixçəsi”, “Dəlidağın qardaşı”, “Ötən əsrin bədii salnaməsi”, “Xalqa və sənətə məhəbbətlə”, “Milli tarixi ənənələr və müasir ədəbiyyatda şəxsiyyət problemləri” başlıqlı məqalələrində də diqqətəlayiq məqamlar öz əksini tapıb.

GÜNEL

525-ci qəzet.- 2010.- 30 noyabr.- S.7.