“Mənim Şuşam” – istedadın və vətənpərvərliyin təntənəsi

Əsl peşəkar – işi ilə zamanın tələbinə cavab verə biləndir. Vəzifəsindən asılı olmayaraq peşəkar insan yaradıcılığı ilə təmsil etdiyi xalqın mədəniyyəti və incəsənətinin inkişafında fəal iştirak etməlidir. Yaradıcılığının ilkin mərhələlərini yaşayan gənc rəssam Həlimə Ələsgərovanın əl işləri bunları deməyə əsas verir. Gənc olmasına baxmayaraq o, artıq bir sıra əhəmiyyətli uğurlara imza atıb.

Ələsgərova Həlimə Namiq qızı 1987-ci ildə Bakıda anadan olub. Böyüyüb baş çatdığı həkim və musiqiçi ailəsində elm və incəsənətin qəribə bir vəhdəti hökm sürür. Valideynləri ailədə ədəbiyyata və teatra, musiqiyə və rəssamlığa hörmət ab-havası yaradaraq övladlarını əsl ziyalıya məxsus mühitdə böyütmüş, onların sənət seçiminə hörmətlə yanaşıb, istedad və qabiliyyətlərinin inkişafına dəstək veriblər.

Kiçik yaşlarından rənglər və fırçaya olan marağı Həliməni T.İsmayılov adına Uşaq-Gənclər sarayının rəssamlıq dərnəyinə gətirir. Elə həmin ildə 10 yaşlı rəssamın ilk uğuru “Uşaqlar müharibə əleyhinə” işi dünya kataloquna daxil edilir.

2004-cü ildə Azərbaycan Dövlət Rəssamlıq Akademiyasına dizayner-rəssam ixtisası fakültəsinə daxil olaraq nəzəri bilikləri və yaradıcılıq işlərində kamilləşir.

İlk fərdi sərgisi 2003-cü ildə keçirilən H.Ələsgərovanın növbəti – 30-a qədər əsərdən ibarət “Mənim Şuşam” adlı sərgisi bugünlərdə Səttar Bəhlulzadə adına salonda Vaşinqtondakı Qarabağ Fondunun təşkilatçılığı gerçəkləşib. Mərasimi giriş sözü ilə açan Avropa və MDB ölkələri üzrə Qarabağ Fondunun nümayəndəsi Tural Kərimli fondun yaranması, qarşıda duran məqsədlər və fondun həyata keçirəcəyi layihələr haqqında danışıb: “Qarabağ Fondu 2009-cu il noyabr ayından fəaliyyətə başlayıb. Fondun əsas məqsədi Azərbaycan, onun Qarabağ bölgəsi və bütünlüklə Qafqazı tərənnüm və təbliğ etməkdən ibarətdir. Bunun üçün fond müxtəlif sərgilər, forumlar və proqramlar həyata keçirir. Bugünkü sərgi də fondun həyata keçirdiyi proqramlar sırasına daxildir. Bu sərginin davamı olaraq “Mənim Qarabağım” silsiləsindən Həlimə Ələsgərovanın yağlı boya ilə işlənmiş “Qarabağ mənzərələri”nin Smithsontan muzeyində sərgisi (14 noyabr) təşkil olunacaq. John Hopkins Universitetində tələbə və alimlər üçün Fondun Üzeyir Hacıbəyli və Natəvan adına qrant proqramlarının təqdimatı keçiriləcək. Bundan başqa, fond tərəfindən Vaşinqton şəhərinin “Studio Gallery” sərgi salonunda Heydər Əliyev Fondunun təqdim etdiyi fotoşəkillər əsasında “Mənim Qarabağım” fotosərgisi keçiriləcək. 2011-ci ilin mart ayında Vaşinqtonda “Azərbaycan mədəniyyəti ayı” elan olunması və Novruz festivalının təşkili də fondun həyata keçirəcəyi tədbirlər silsiləsindəndir”. T.Kərimli sərgi haqqında da fikirlərini bölüşdü. Fondun Azərbaycanda ilk tədbirinin məhz bu sərgi olduğunu dilə gətirən nümayəndə bunun Qarabağın təbliğində böyük əhəmiyyət daşıdığını vurğulayıb.

Gənclər və idman nazirinin müavini İntiqam Babayev gənc rəssamın yaradıcılığından söz açıb: “Bizim ümumi dərdimiz olan Qarabağ bu gün sərginin aparıcı xəttidir. Həlimə Ələsgərovanın bu sərgisi bir təbliğat rolunu oynayır. Çünki bu sərginin davamı Amerika və digər xarici ölkələrdə keçiriləcək. Rəsm üçün artıq sözə, şərhə ehtiyac yoxdur. Peşəkar rəssamın əl işi artıq tamaşaçısına hər şeyi deyir”.

“Sərgiyə baxarkən Həliməyə ilk sualım bu oldu: “Sən Şuşanı görmüsənmi?” O isə: “Xeyr, görməmişəm, atam evdə o qədər Qarabağdan, Şuşadan danışıb ki mən də düşüncələrimdə canlandırdığım Şuşanı tablolara köçürmüşəm” cavabını verərək Şuşanın gəzməli-görməli yerlərini, abidələrinin yerləşdiyi məkanları olduğu kimi nəql etməyə başladı. Amma mən Şuşanı görmüşəm. Həlimə mənim yaddaşımda olan Şuşanı olduğu kimi canlandırıb. Bu rəsmlər bir qızın Vətəninə böyük sevgisi ilə çəkilmiş şəkilləridir. Şuşanı bu qədər sevən və sahiblənən gənclərimiz nə qədər çox olsa, Şuşanın azadlığına bir addım da yaxın olacağıq. Bu tədbirin davamı olaraq müxtəlif ölkələrdə keçirilən sərgilərdə Azərbaycan dilini bilməyən insanların bir gənc qızın qəlbindən fırçasına süzülüb gələn qəlb yanğısını duyacaqlar. Bundan başqa müxtəlif ölkələrin nümayəndələri Azərbaycan həqiqətlərinə bələd olmaqla yanaşı, potensial baxımdan ölkəmizin yaradıcı gəncləri haqqında müəyyən təsəvvürlər əldə edəcəklər. Mən Həlimənin valideynlərinə təşəkkür edirəm. Hər bir ailədə vətənə, doğma torpağa məhəbbət belə aşılanmalıdır”. Bu fikirləri isə mərasimdə millət vəkili Qənirə Paşayeva səsləndirib.

“İrəli” İctimai Birliyinin sədri Ceyhun Osmanlı çıxışında sərgidə yer alan tablolar barədə fikirlərini bildirərək, gənc rəssama yaradıcılıq uğurları arzulayıb.

Gənc rəssam Həlimə Ələsgərova sərgi haqqında fikirlərini bölüşdü: “Bu mənim sayca ikinci sərgimdir. Birincidən fərqli olaraq bu sərgi sırf Şuşaya həsr olunub. Mən Şuşanı görməmişəm. Burada qərarlaşan tablolar mənim fantaziyamın məhsullarıdır. İnanıram ki, belə sərgim Şuşada da keçiriləcək və mən o dilbər guşələri olduğu kimi çəkəcəyəm”.

“Artıq ikinci onillikdir ki, biz Qarabağdan uzağıq. Bu sərgi onu göstərir ki, Qarabağ yaddaşlardadır, gənc rəssam o gözəl torpağı görməyib, valideynlərinin verdiyi məlumatlara əsaslanaraq bu əsrarəngiz məkanları yaşadıb. Bu tədbirlər bizim Qarabağa dönməyimizə stimul verir. Həlimə Ələsgərova hamımızın ümidlərini tablolara köçürüb. Salondakı əl işlərinə baxdıqca öz çiçəkləyən arzularımı görürəm”. Bu fikirləri sərgidə iştirak edən Vahid Qazi səsləndirib.

Sərgidə yer alan əsərlər Azərbaycanın bir çox tarixi hadisələrinə şahidlik edən, özündə neçə-neçə görkəmli şəxsiyyətin izini yaşadan Qarabağa həsr olunub. Azərbaycanın dilbər guşəsi olan Şuşanın əsrarəngiz gözəlliyi əlvan boyalarla göz oxşayır. Tablolarda bu gün işğal altında olan ərazilərimizin tezliklə əvvəlki həyatına dönəcəyinə optimist baxış duyulur.

Hər bir sənət əsəri əslində insan varlığına gərəkli ola biləcək mənəvi qidanın ayrılmaz hissəsidir. Həlimə Ələsgərovanın izləyicisini cuşa gətirən əsərləri yetərincədir. Bu da tamaşaçıların davamlı olaraq sərgi salonlarında onun əl işlərini axtarmasına şərait yaradır.

Qeyd edək ki, H.Ələsgərova 2005-ci ildən Azərbaycan Rəssamlar İttifaqının Gənc Rəssamlar Birliyinin üzvüdür.

Hüsniyyə İSMƏTQIZI

525-ci qəzet.- 2010.- 2 oktyabr.- S.14.