“Cavad xan” filminin yaradıcı heyəti Macarıstana səfər edib

Azərbaycanın Macarıstandakı səfirliyi, Mədəniyyət və Turizm Nazirliyi və “Ulusfilm” prodüser mərkəzinin təşkilatçılığı ilə “Cavad xan” filmi bu gün Budapeştin mərkəzi kinoteatrında göstəriləcək. Nümayişlə əlaqədar olaraq, Macarıstana filmin ssenari müəllifi Sabir Rüstəmxanlı, Cavad xan obrazının ifaçısı xalq artisti Nurəddin Mehdixanlı və “Ulusfilm” prodüser mərkəzinin rəhbəri Gəray Əlibəyov gedib. Filmin quruluşçu rejissoru Rövşən Almuradlı isə yenicə əməliyyat olunduğuna görə səfərdə iştirak edə bilməyib. Hazırda Budapeştdə olan Gəray Əlibəyovun Lent.az-a verdiyi məlumata görə, Azərbaycanın Macarıstandakı səlahiyyətli səfiri Vilayət Quliyev oktyabrın 4-də yerli televiziya və mətbuat nümayəndələrinin iştirakı ilə qonaqları səfirlikdə qəbul edib. Səfir iki dövlət arasında mədəni və dostluq münasibətlərindən söhbət açaraq, bu əlaqələrin daha da genişlənəcəyini, inkişaf edəcəyini söyləyib. Xalq şairi Sabir Rüstəmxanlı və xalq artisti Nurəddin Mehdixanlı mərkəzi televiziya və mətbuat nümayəndələrinə “Cavad xan” filmi barədə müsahibələr veriblər. Tədbirin sonunda “Duna” mərkəzi televiziya kanalının rejissoru Voka Sabo qonaqlara və səfir Vilayət Quliyevə bu görüşə görə öz minnətdarlığını bildirib. Günün sonunda isə V.Quliyev bütün səfirlik işçilərini bir araya toplayaraq görüləcək tədbirlər planını qonaqlarla birgə müzakirə edib. G.Əlibəyov onu da vurğulayıb ki, tərcümə işlərini Macarıstanda çox tanınan türkşünas Qal Timea həyata keçirib.

525-ci qəzet.- 2010.- 6 oktyabr.- S.7