Tibb Universitetinin 80 illiyi geniş tədbirlə qeyd olunub

Dünən Tibb Universitetində bu ali təhsil müəssisəsinin 80 illik yubileyinə həsr olunan tədbir keçirilib. Tədbiri giriş sözü ilə açan səhiyyə naziri Oqtay Şirəliyev deyib ki, Tibb Universitetinin 80 illik yubileyinin dövlət səviyyəsində keçirilməsi ilə bağlı bir müddət əvvəl prezident İlham Əliyev müvafiq sərəncam imzalayıb. Onun sözlərinə görə, ölkədə səhiyyə sahəsində aparılan islahatlar, prezident İlham Əliyevin sərəncam və tapşırıqlarına əsasən tikilib istifadəyə verilən, yenidən qurulan tibb ocaqları Azərbaycan səhiyyəsinin inkişafının bu gün ən yüksək səviyyədə davam etdiyini göstərir. Tibb sahəsində yüksək ixtisaslı kadrların hazırlanmasında müstəsna xidmətləri olan Tibb Universitetinin keçdiyi yol da səhiyyəmizin inkişafı baxımından mühüm mərhələdir. Nazir vurğulayıb ki, prezident İlham Əliyevin Azərbaycan Tibb Universitetinin tədris-terapevtik klinikasının tikilməsi ilə bağlı 2007-ci il sentyabrın 11-də imzaladığı sərəncam və bir neçə gündən sonra da həmin klinikanın təməlqoyma mərasimində iştirakı bir daha göstərdi ki, dövlətimizin başçısı milli səhiyyənin inkişafını dövlət siyasətinin prioritet istiqamətlərindən biri kimi müəyyənləşdirib: “Bu məsələdə Heydər Əliyev Fondunun fəaliyyəti də geniş maraq doğurur. Azərbaycanda səhiyyənin inkişafında Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban Əliyevanın və onun rəhbərlik etdiyi Fondun xidmətlərini xüsusi qeyd etmək lazımdır. Mehriban xanım Əliyevanın təşəbbüsü ilə ana və uşaq sağlamlığının qorunması, talassemiyadan əziyyət çəkən körpələrin müalicəsi, bütövlükdə səhiyyənin inkişafı ilə bağlı həyata keçirdiyi geniş fəaliyyət proqramı ölkəmizdə səhiyyə sisteminin inkişafında əhəmiyyətli rol oynayır. Mehriban xanım Əliyevanın bu istiqamətdə gördüyü işlər əhalinin sağlamlığının qorunması, gənc nəslin fiziki tərbiyəsi və sağlam böyüməsi işinə mühüm töhfələr verir”. Tibb Universitetinin rektoru, akademik Əhliman Əmiraslanov bildirib ki, ölkədə yüksək ixtisaslı tibb kadrlarının hazırlanmasında müstəsna xidmətləri olan universitet ötən dövrdə şərəfli yol keçib. Bu ali təhsil ocağı dünya tibb elminə Mirəsədulla Mirqasımov, Mustafa bəy Topçubaşov, Zərifə xanım Əliyeva, Abdulla Qarayev, Mirməmməd Cavadzadə, Adilə xanım Namazova, Cəmil Əliyev, Əhliman Əmiraslanov və onlarla məşhur simalar bəxş edib: “Böyük tarixi ənənələrə malik olan Tibb Universiteti bu gün də məhsuldar dövrünü yaşayır. Ötən müddətdə səhiyyəmizə 65 mindən çox həkim və əczaçı kadr bəxş edən universitet xeyli böyüyüb. İndi bu ali təhsil ocağında 7 fakültə, 3 klinika, 9 dekanlıq, 14 şöbə, 74 kafedra, 11 kurs, 6 tədris korpusu və digər elmi tədqiqat və tədris mərkəzləri daxildir. Prezident İlham Əliyevin ölkədə səhiyyə sahəsində xidmətlərini nəzərə alaraq, Tibb Universitetinin 80 illik yubileyinin keçirilməsi ilə bağlı 2010-cu aprelin 28-də imzaladığı Sərəncam da bu ali təhsil ocağına dövlət səviyyəsində verilən dəyərin təzahürüdür.

Dövlət başçısı universitetin inkişafını, onun maddi-texniki bazasının möhkəmləndirilməsini daim diqqətdə saxlayır”. Ə.Əmiraslanov vurğulayıb ki, sentyabr ayının 20-də, prezidentin müvafiq sərəncamı ilə universitetin 80 nəfər əməkdaşı ölkəmizin – müstəqil Azərbaycanın orden və medallarına, fəxri adlara, hətta prezident təqaüdünə layiq görülübdür: “Biz bu gün ulu öndər Heydər Əliyevi yad etməyə bilmərik. Çünki universitetimizin bütövlükdə inkişafı onun adı ilə bağlıdır. Universitetə dövlət qayğısının təməli hələ 1970-80-ci illərdə ulu öndər tərəfindən qoyulmuşdur. Onun yaxın dayağı, universitetimizin şərəfi, şöhrəti olan akademik Zərifə Əliyevanın qayğısı sayəsində bunların hamısı mümkün olub. On il bundan qabaq universitetin 70 illik yubileyi qeyd olunanda ulu öndər on bir mərtəbəli o möhtəşəm tədris binasını kollektivimizə töhfə edib. Bu gün isə 80 illik yubileyimizdə bu möhtəşəm tədris-terapevtik klinikasını prezident İlham Əliyev bizə bəxş edib”. Təhsil naziri Misir Mərdanov bildirib ki, tibb sahəsində yüksək ixtisaslı kadrların hazırlanmasında Tibb Universitetinin keçdiyi yol ölkə səhiyyəsinin inkişafında pillələrdən birini təşkil edir: “Azərbaycanda yüksəkixtisaslı tibb kadrlarının hazırlanması 1919-cu ilin noyabrında ilk Azərbaycan Demokratik Respublikası parlamentinin qərarına əsasən, tibb fakültəsi də daxil olmaqla dörd fakültədən ibarət Bakı Dövlət Universitetinin yaradıldığı vaxtdan başlayıb. Bakı Dövlət Universitetinin yaradılmasının təşəbbüsçüləri ilk Azərbaycan Demokratik Respublikasının rəhbərliyi və respublikanın ziyalı təbəqəsi olmuşdur. Artıq 1919-cu ilin may ayında tanınmış cərrah professor İ.Razumovskinin rəhbərliyi altında xüsusi hazırlıq komissiyası təşkil edilib, üç ay sonra isə Universitet ilk tələbələrini qəbul etmişdir”.

M.Mərdanovun sözlərinə görə, Tibb Universitetinin əsasını elmi-pedaqoji işçilər, aspirant, rezident, magistr, tələbə, müdavim və dinləyicilərin yaradıcılıq birliyi – ATU-nun akademik cəmiyyəti təşkil edir. Universitetin akademik cəmiyyəti öz fəaliyyətini universitet təhsilininin klassik ənənələrinə müvafiq surətdə tədris və elmi-tədqiqat işlərinin, biliklərin yayılmasının akademik sərbəstliyi, universitet muxtariyyəti, demokratik özünüidarəetmə, cəmiyyət qarşisında məsuliyyət, tədris və elmi fəaliyyət proseslərinin vəhdəti, elm və təhsilin praktika ilə sıx əlaqəsi prinsipləri əsasında qurur: “Tibb fakültəsinin yaradılmasında tanınmış alimlərindən professorların böyük rolu olub. Universitetin tibb fakültəsinin açılması təkcə həkimlərin işinə deyil, həm də şəhərin tibb müəssisələrinin fəaliyyətinə mühüm təsir göstərib. Hökumətin qərarına əsasən, Bakı şəhərinin mühüm xəstəxanaları universitetin istifadəsinə verilib. Həmin dövrdə tibb kadrları hazırlanmasının Azərbaycan üçün böyük əhəmiyyəti var idi. Çünki əhali arasında tibbi yardıma, eləcə də ölkədə səhiyyə orqanlarının və sanitar-epidemioloji xidmətin yaradılmasına böyük ehtiyac duyulurdu. Səhiyyə orqanlarının qarşısında yeni, mühüm dövlət tapşırıqları dururdu: əhaliyə pulsuz, imkan daxilində yüksək səviyyəli tibbi yardım göstərmək, geniş şəkildə sanitariya tədbirləri keçirmək, yoluxucu xəstəliklərlə mübarizə aparmaq. Bütün bunlar üçün milli həkim kadrlarının hazırlanması vacib idi və bu problem müvəffəqiyyətlə həll edilirdi”.

Dövlət İqtisad Universitetinin rektoru Şəmsəddin Hacıyev isə bildirib ki, Tibb Universiteti ölkənin qədim tarixə malik aparıcı ali təhsil müəssisələrindən biridir. Hər il bu universitet ölkə səhiyyəsinin inkişafı üçün mühüm əhəmiyyət daşıyan və gələcək nəsillərin sağlamlıq sahəsində təminatçısına çevrilən yüksək ixtisaslı peşəkar tibbi kadrlar yetişdirir. Dövlət Neft Akademiyasının rektoru Siyavuş Qarayev qeyd edib ki, Azərbaycan hələ qədim zamanlarda Şərq aləmində mədəniyyətin, ədəbiyyatın, elmin bir çox sahələrinin, o cümlədən, tibb elminin inkişaf etmiş mərkəzlərindən biri hesab edilib. Təsadüfi deyil ki, Azərbaycanda tibb elmi çox qədim köklərə malik olub, bu sahə üzrə bir sıra əsərlər yaradılıb.

Sevinc QARAYEVA

525-ci qəzet.- 2010.- 6 oktyabr.- S.2.