Görkəmli rejissor, pedaqoq, aktyor, psixoloq, Ağakişi Kazımov haqqında heç bir “ziyafətdə”, “çayxanada” demədiyim fikirlər haqqında, “natamam” xatirələr...

70-ci illərin əvvəllərində, uzaq Tatarıstandan Azərbaycana sevinc dolu sənət dalğası xəbəri gəldi və şad xəbər tezliklə Azərbaycan ziyalılarının teatra olan məhəbbətini bir daha artırdı. O vaxtkı nəsil Ağakişi Kazımovu yaxşı tanısa da, bizim nəsil onu görmək arzusundaydı. Hərbi xidmətdən (1972-73) qayıtdıqdan sonra eşitdim ki, Ağakişinin quruluş verdiyi tamaşalara bilet tapmaq müşkül məsələdir. İlk baxdığım tamaşa Dumbadzenin “Darıxma ana” tamaşası oldu. M.Sənaninin məşhur monoloqundan sonra xeyli ağlayıb, tamaşanı axıra qədər seyr edə bilmədim. Və rejissor Ağakişi Kazımovun kim olduğunu bildim. O vaxt ona yaxınlaşmaq mümkün olmurdu. Həmişə məşqdən çıxıb gedəndə, aktyorların əhatəsində olurdu. Nəhayət, bir gün H.Hacıyev küçəsində F.Polodov bizi tanış etdi. O vaxtdan görüşəndə xırda sənət söhbətləri edərdik. Nəhayət, İ.Əfəndiyevin “Büllur sarayında” görüşdük. Ancaq bir rejissor kimi Ağakişi məni başqa planda görürdü. C.Cabbarlının “Od gəlin”dəki Altunbay kollektivi çaşdırsa da, Kazımov yenə öz sözünü demişdi. Nə isə... Sonralar işlədiyimiz tamaşalarda, artıq A.Kazımov həm mənim, həm kollektivin nəzərində həm gözəl rejissor, həm də bir pedaqoq kimi çox yüksəlmiş və sevilmişdi. A.Kazımov təcrübəli psixoloqdur. Hər bir obraz canlı insandır. Kazımov bu obrazları elə gözəl təhlil edir ki, artıq sən həyatda o obrazları axtarır və tapırsan. A.Kazımov hansı teatra quruluş verirsə, o teatrın nəfəsini, aktyor heyətin gücünü o dəqiqə hiss edir. A.Kazımovun aktyorluğunu həmişə mərhum Həsənağa Turabov çox tərif edərdi. Nəhayət, biz də bunu “Yük” filmində gördük və sevdik. Təbii ki, bu mənim səhər saat 7:30-da olan fikirlərimdir. A.Kazımov novator-rejissordur, elə olaraq da qalacaq. Ömrünün mən deyərdim elə 75-ni də sənətə həsr edən A.Kazımov bu gün də yaratmaq eşqilə yaşayır. Və onun buna haqqı var! Yəqin 90 illiyinizdə dediyim fikirlər daha dolğun olacaq.

Yaşar NURİ,

xalq artisti

525-ci qəzet.- 2010.- 15 oktyabr.- S.7.