Günel Anarqızı Azərbaycanı “Sivilizasiyaların dialoqu” beynəlxalq forumunda təmsil edib

“ZƏNGİN MƏDƏNİYYƏTİMİZİN DÜNYADA TƏBLİĞİ, AVROPA VƏ DÜNYA MƏDƏNİYYƏTİNƏ İNTEQRASİYASI ÜÇÜN BELƏ TƏDBİRLƏRDƏ FƏAL İŞTİRAK ETMƏK VACİBDİR”

Bugünlərdə Yunanıstanın Rodos adasında “Sivilizasiyaların dialoqu” adlı mötəbər forum keçirilib. “Ölkəm” və “Pəncərə (mədəniyyətə baxış)” jurnallarının baş redaktoru, yazıçı Günel Anarqızının sözlərinə görə, forum artıq 8 ildir ki, hər ilin oktyabr ayında Rodosda təşkil olunur. Foruma hər il dünyanın müxtəlif ölkələrindən çox sayda nümayəndə qatılır: “Sivilizasiyaların dialoqu” adlı bu forum Rusiya prezidentinin patronajı altında keçirilir. Forumun prezidenti Rusiyanın nüfuzlu və məşhur simalarından olan Vladimir Yakunindir. Tədbirdə iştirak üçün hər il mənə təşkilatçılar tərəfindən dəvət göndərilir. Mən ilk dəfə 2008-ci ildə bu forumda iştirak etmişəm. 2009-cu ildə də təşkilatçılar tərəfindən mənə dəvət göndərilmişdi. Ancaq müəyyən səbəblərdən mən ötənilki foruma qatıla bilmədim. Ancaq bu il böyük məmnuniyyətlə gedib forumda iştirak etdim”. G.Anarqızı deyir ki, forumda Gürcüstan, Ermənistan və digər MDB ölkələrindən çoxlu nümayəndə iştirak edib: “Təəssüf ki, Azərbaycandan cəmi iki nəfər foruma dəvət olunmuşdu, onlardan da biri mən idim. Amma bədnam ermənilər geniş heyətlə foruma qatılmışdılar. Biz, Azərbaycandan olan iki nümayəndə bacardığımız qədər ölkəmizi forumda fəal təmsil etməyə çalışdıq. Müxtəlif seksiyalarda iştirak etdik. Ancaq tək əldən səs çıxmaz, iki nəfər on nəfəri əvəz edə bilməz. Çox istərdim ki, biz də geniş bir heyətlə tədbirə qatılaydıq”. Baş redaktorun dediyinə görə, forumda əsasən müxtəlif sivilizasiyalar arasında münasibətlər qurulmasından və ünsiyyətin inkişafından bəhs olunub. Mədəni, iqtisadi, siyasi, sosial və başqa sahələr üzrə fəaliyyət göstərən cəmiyyətlərin üzvləri forumda iştirak ediblər. Forum çərçivəsində sözügedən sahələr üzrə çalışan insanların qarşılıqlı dialoqu qurulub. Tərəflər arasında fikir və təcrübə mübadiləsi aparılıb: “Forumda çox maraqlı mövzular müzakirə olunurdu, dəyərli təkliflər irəli sürülürdü. Məruzələrin mövzuları da çox maraqlı idi. Cənab Yakuninə sual verəndə ki, artıq 8 ildir bu forum təşkil olunur, bəs bu forumun məqsədi, məramı, əldə olunan nəticələr nədən ibarətdir, o, cavabında bildirdi ki, bu illər ərzində forumda müzakirə olunan əksər məsələlər öz həllini tapıb, irəli sürülən təkliflər həyata keçirilib. Bu bir daha onu göstərir ki, forum əbəs yerə təşkil olunmayıb, çəkilən zəhmət hədər getməyib. Foruma hər il dünyanın bütün ölkələrindən çoxlu sayda nümayəndənin qatılması bu tədbirə insanlar tərəfindən böyük maraq göstərildiyini sübut edir. Tədbir zamanı müxtəlif sahələrin təmsilçilərin arasında ünsiyyət, əlaqələr qurulur və gələcəkdə onların işbirliyi yaranır. Biz də forumda bir sıra insanlarla ünsiyyətdə olduq. Onlar arasında elələri var idi ki, Azərbaycan haqqında az məlumatlıydı və bizdən ölkəmiz haqda ətraflı məlumat verməyi istəyirdi. Biz də, təbii ki, Azərbaycan haqda onları maraqlandıran bütün suallara ətraflı və dolğun cavab verdik. Biz həmçinin forumda iştirak edən digər ölkələrin nümayəndələrinə də Azərbaycan, onun qədim tarixi və zəngin mədəniyyəti barədə geniş danışdıq”. G.Anarqızı qeyd edib ki, o, forum çərçivəsində müxtəlif seksiyalarda, dəyirmi masalarda iştirak edib, diskussiyalara qatılıb: “Mən forumun əksər iştirakçıları ilə sıx təmasda idim və biz tez-tez görüşür, müxtəlif mövzular ətrafında müzakirələr aparırdıq. Fikrimcə, Azərbaycanın zəngin mədəniyyətinin, adət-ənənələrinin təbliği, Avropa və dünya mədəniyyətinə inteqrasiyası üçün belə tədbirlərdə fəal iştirak vacibdir. Mən imkanım olduğu təqdirdə növbəti illərdə keçiriləcək forumlara da qatılmaq fikrindəyəm. Bu il məruzəmi bir az gec göndərdiyim üçün forumda xüsusi çıxış edə bilmədim. Ancaq gələn il məruzəmi vaxtında təşkilatçılara çatdırıb, forumlarda ayrıca çıxış etmək niyyətindəyəm”. G.Anarqızı vurğulayıb ki, forum çox yüksək səviyyədə və gözəl bir məkanda – Rodos adasında təşkil olunub: “Rodos Yunanıstana məxsus olan və ölkə paytaxtı Afinadan 270 dəniz mili aralıda, Egey dənizində yerləşən adadır. Adanın ərazisi 1398 kilometrdir. Böyüklüyünə görə Rodos adası Yunanıstan adaları arasında 4-cü yeri tutur. Adanın əhalisi 125 000 nəfərdir. Rodosun iqlimi Aralıq dənizi hövzəsi iqliminə uyğun olaraq mülayimdir. İlin 300 günü günəşli olur. Adanın uzunluğu 78 km, eni isə 38 km-dir. Sahillərini qərbdən Egey dənizinin, şərqdən Aralıq dənizinin suları yuyur. Egey dənizinin yuduğu sahil ərazilərdə bitki örtüyü daha zəngindir. Rodos Yunanıstanın ən əsas turizm mərkəzlərindən biridir. Adanın inzibati mərkəzi şimal-şərqdə yerləşən Rodos şəhəridir. 1912-ci ilə İtaliya-Osmanlı müharibəsinin nəticəsində İtaliya adanı ələ keçirib. 1948-ci ildə isə Rodos adası Yunanıstana birləşdirilib. Oranın gözəl iqlimi və yaradılan rahat şərait tədbirin yüksək səviyyədə keçməsinə böyük kömək etdi”. “Ölkəm” jurnalının növbəti sayı haqda məlumat verən G.Anarqızı bildirib ki, bugünlərdə jurnalın 10-cu nömrəsi çapdan çıxıb: “Ölkəm”in bu sayında çox maraqlı müsahibələr yer alıb. Jurnalda bəstəkar Cavanşir Quliyev, Almaniyada yaşayan məşhur azərbaycanlı riyaziyyatçı Məsud Əfəndiyev, Alman Azərbaycan Koordinasiya Şurasının sədri Samirə İsmayılova ilə müsahibələr bu sıradadır. Jurnalda həmçinin Heydər Əliyev Fondunun Rusiya nümayəndəliyi və onun rəhbəri Leyla Əliyevanın fəaliyyəti haqqında maraqlı material yer alıb. “Ölkəm”in növbəti xüsusi nömrəsi isə bütünlüklə gənclərə həsr olunacaq. Əminəm ki, jurnalın digər sayları kimi bu sayı da böyük maraqla qarşılanacaq. Qeyd edim ki, noyabr ayında Fransada Gənclər Forumu keçiriləcək. “Ölkəm” jurnalının yeni sayı da həmin forumda iştirak edənlərə paylanılacaq”.

Sevinc QARAYEVA

525-ci qəzet.- 2010.- 16 oktyabr.- S.16.