Milli Kitabxanada “Oxucu günü”

Ötən gün M.F.Axundzadə adına Milli Kitabxanada “Oxucu günü” təşkil edilib. Giriş sözü ilə çıxış edən kitabxananın direktoru Kərim Tahirov ilk dəfə keçirilən mərasimə qatılanları salamlayaraq, tədbirin keçirilmə zərurətindən danışıb: “Oxucu günü” adlı belə bir tədbir bizim kitabxanada ilk dəfə gerçəkləşir. Lakin bundan sonra mütəmadi olaraq iki aydan bir keçiriləcək. Bu mərasimi keçirməkdə məqsədimiz oxucularımızın şikayət, təklif, irad və rəylərini bilməkdir. Kitabxananın birinci mərtəbəsinə qoyulan qutuya oxucular öz təkliflərini, şikayətlərini yaza bilərlər. Hər gün həmin qutu açılacaq və biz oxucuları narahat edən problemlərin mahiyyətini bilərək, günün tələbləri səviyyəsində həmin problemləri həll etməyə çalışacağıq. Bundan başqa, kitabxana əməkdaşlarının oxuculara göstərdiyi xidmətin nə dərəcədə yüksək olması həmin məktublar vasitəsilə bilinəcək. Əgər oxucu kitabxanadan narazı, istədiyi məlumatı əldə etməmiş gedirsə, deməli, bizim işimizdə qüsur var. Bu qüsurları aradan qaldırmaq üçün əlimizdən gələni edəcəyik”. Direktor həmçinin gələn ildən kitabxanada yenidənqurma işlərinin aparılacağını bildirib. Mərasimdə kitabxananın oxuculara xidmət şöbəsindən Ədibə İsmayılova, Azərbaycan ədəbiyyatı üzrə arxiv şöbəsindən Almaz Əliyeva, kitab fondlarının mühafizəsi şöbəsindən Xuraman İsmayılova, diyarşünaslıq elmi biblioqrafiya şöbəsindən Mədinə Vəliyeva, sorğu informasiya xidməti şöbəsindən Zemfira Əliyeva, xidmət işləri üzrə direktor müavini Gülbəniz Səfərəliyeva, elektron dissertasiya fondunun təşkil və ondan istifadə şöbəsindən Gülər Hüseynova və digər əməkdaşlar oxucuların sullarını cavablandırıblar. Çıxış edən oxucular kitabxanada xidmətin yüksək səviyyədə olduğunu bildirməklə yanaşı, iradlarını da dilə gətiriblər. Əksər oxucular kataloqdakı kartoçkaların köhnə, əzik olduğunu bunların yeniləri ilə əvəzlənməsinin məqsədəuyğun olduğunu önə çəkiblər. Kitabxanaya daxil olan yeni kitablar üçün ayrıca kataloqun təşkil olunması da oxucuların təkliflərindən biridir. Oxuculardan birinin “Kitabxananın müxtəlif xarici ölkələrdə çap olunan jurnalları əldə etməsi çox yaxşı olardı” fikrinə direktor belə münasibət bildirib: “Yanvar ayından artıq bir neçə jurnal kitabxanaya gətiriləcək. Bunlar “Voprosı istorii”, “Nauka i jizn”, “Voprosı filosofii” və digər jurnallardır”. Tədbir günün sonuna qədər davam edib.

HÜSNİYYƏ

525-ci qəzet.- 2010.- 23 oktyabr.- S.17.