Müslüm Maqomayevin vəfatının ikinci ildönümü qeyd olunub

Azərbaycanın dünya şöhrətli müğənnisi Müslüm Maqomayev vəfatının ikinci ildönümündə anılıb. APA-nın məlumatına görə, əvvəlcə sənətkarın Fəxri Xiyabandakı məzarı ziyarət olunub. Ziyarətdə Azərbaycanın tanınmış mədəniyyət və incəsənət xadimləri, Mədəniyyət və Turizm Nazirliyinin nümayəndələri, Rusiyanın Azərbaycandakı səfiri Vladimir Doroxin və Azərbaycana səfərə gələn Özbəkistan nümayəndə heyəti iştirak edib.

Daha sonra anım tədbiri Azərbaycan Bəstəkarlar İttifaqında davam etdirilib. İttifaqın sədri, xalq artisti Firəngiz Əlizadə Müslüm Maqomayevin sağ ikən bu qurumun üzvü olmasından qürur duyduqlarını söyləyib: “O, dahi müğənni olmaqla yanaşı, həm də böyük bəstəkar idi. Məhz buna görə də 80-ci illərdə istisna olaraq Bəstəkarlar İttifaqına üzv seçilib. Müslüm Maqomayev insanlarla təmasda olmağı sevirdi və ömrünün sonuna qədər internetdə pərəstişkarları ilə yazışırdı”. Tədbirdə Ruhəngiz Qasımova, Zemfira Qafarova, Həcər Babayeva və digərləri xatirələrini bölüşüblər. Mərasim M. Maqomayevin mahnılarının ifası ilə davam etdirilib. Moskvada isə Müslüm Maqomayev adına I Beynəlxalq Musiqi Müsabiqəsi keçirilib. APA-nın Rusiya mətbuatına istinadən yaydığı xəbərə görə, müsabiqədə I yeri Azərbaycan və Belarus baritonları Cavid Səmədov və İlya Silçukov qazanıb. Müsabiqədə ikinci yeri də azərbaycanlı tenor Samir Cəfərov tutub. Yarışmada III yeri Belarus müğənnisi Oksana Volkova və müsabiqənin ən gənc iştirakçısı 19 yaşlı rus baritonu Dmitriy Trifonov bölüşüblər. Müsabiqə iki mərhələdə – öncə opera, sonra estrada janrında keçirilib. Müsabiqənin proqramına M. Maqomayevin ifa etdiyi əsərlər də daxil edilib. Müslüm Maqomayevin həyat yoldaşı Tamara Sinyavskayanın rəhbərlik etdiyi münsiflər heyətində müğənnilər Yelena Obraztsova və Tamara Qverdtsiteli, maestro Yuri Başmet, bəstəkarlar Aleksey Rıbnikov və Mişel Leqran, Üzeyir Hacıbəyli adına Bakı Musiqi Akademiyasının rektoru Fərhad Bədəlbəyli təmsil olunub.

525-ci qəzet.- 2010.- 26 oktyabr.- S.7.