Birinci Beynəlxalq Aşıq
Festivalı çərçivəsində tədbirlərə
yekun vurulub
Xəbər verildiyi
kimi, oktyabrın 22-də
Heydər Əliyev Fondunun dəstəyi, Mədəniyyət və
Turizm Nazirliyinin və Azərbaycan Aşıqlar Birliyinin təşkilatçılığı ilə birinci Beynəlxalq Aşıq Festivalının təntənəli
açılış mərasimi
keçirilib. Heydər Əliyev
Sarayında gerçəkləşən tədbiri giriş sözü ilə
mədəniyyət və turizm naziri Əbülfəs Qarayev
açaraq festivalın əhəmiyyətini
vurğulayıb. Azərbaycanda ilk
dəfə təşkil edilən bu beynəlxalq
festivala 8 ölkədən – Azərbaycan,
Türkiyə, İran, Qazaxıstan,
Özbəkistan, Qırğızıstan, Gürcüstan
və Dağıstandan sənətkarların
qatıldığını bildirən Ə.Qarayev
aşıq sənətinin həm Azərbaycan xalq
ədəbiyyatının, həm də, ümumiyyətlə,
mədəniyyətimizin qədim tarixə və zəngin ənənələrə
malik qollarından biri
olduğunu dilə gətirib: “Ulu ozan Dədə Qorqudun xeyir-duaları ilə əsrlərdən
bəri yol gələn aşıq sənəti
ustad el şairlərinin
yetişməsinə, püxtələşməsinə təkan
verib. Onların qoşma,
gəraylı və bayatıları dillər əzbəridir.
Aşıq Qurbaninin,
Tufarqanlı Abbasın, Sarı Aşığın, Xəstə
Qasımın, Molla Cümənin,
Aşıq Ələsgərin, Hüseyn
Bozalqanlının, Mikayıl Azaflının, Aşıq
Alının, Aşıq Şəmşirin adına
bağlı şeirlər, dastanlar gözəl
sənət nümunələridir. Biz
belə bir sərvətə laqeyd münasibət bəsləyə bilmərik.
Bu sərvət zaman-zaman
Azərbaycanın yazılı ədəbiyyatına, çağdaş bəstəkarlığa, xoreoqrafiyaya güclü təsir
göstərib, bu gün
də təsir göstərməkdədir. Bu
sahəyə həmişə dövlət qayğısı olub, aşıqlarımız fəxri adlara layiq görülüb,
onların konsertləri üçün hərtərəfli
şərait yaradılıb. Biz bu misilsiz xalq sənətinin yeni
şəraitdə dirçəlməsi, insanların estetik tərbiyəsində aşıq
yaradıcılığının imkanlarından istifadə
olunması, onun qorunması, inkişaf etdirilməsi və nadir
milli sərvət olaraq
dünyada tanıdılması üçün yeni layihələr
və tədbirlər həyata keçiririk”.
Ə.Qarayev ümumilli
liderin aşıq sənətinə olan həssas münasibətinin bu gün Heydər Əliyev
Fondu tərəfindən layiqincə davam etdirildiyini dilə gətirib:
“Ulu öndərimiz Heydər Əliyevin xalq yaradıcılığına bəslədiyi
münasibətə sadiq qalaraq
aşıq sənətinin inkişafı, dünyada
tanıdılması üçün əlimizdən
gələni edirik. Bu
gün aşıq sənətinin
inkişafı Azərbaycanın birinci
xanımı, Heydər Əliyev Fondunun prezidenti Mehriban Əliyevanın
diqqəti sayəsində yeni mərhələyə
qədəm qoyub. Muğam
sənətindən sonra aşıq sənətinin
də YUNESKO-nun “Bəşəriyyətin
Qeyri-maddi Mədəni İrsinin
Reprezentativ Siyahısı”na daxil edilməsi bunun əyani
sübutudur”.
Nazirin sözlərinə
görə, festivalın iştirakçıları Azərbaycanın
bir çox bölgələrində maraqlı konsert
proqramları ilə çıxış edəcəklər.
Festivalın 2 ildən
bir keçirilməsinin nəzərdə tutulduğunu deyən
Ə. Qarayev növbəti illərdə festivalın
coğrafiyasının daha da genişlənəcəyini
bildirib.
Daha sonra Azərbaycan
aşıq sənətini özündə əks etdirən
videomaterial nümayiş etdirilib və festivalda iştirak edən
ölkələrin təmsilçiləri səhnəyə dəvət
olunublar.
Mərasimdə
çıxış edən Azərbaycan Aşıqlar
Birliyinin sədri, xalq şairi Zəlimxan Yaqub bildirib ki, belə
bir möhtəşəm tədbirin keçirilməsində
Heydər Əliyev Fondunun prezidenti Mehriban Əliyevanın xidmətləri
əvəzsizdir: “Xalqımızın bu ölməz sənətinin
haqlı olaraq dünya mədəniyyət inciləri
sırasında özünə layiq yer tutması
qarşımızda yeni üfüqlər açmaqla
yanaşı, məsuliyyət hissimizi də artırıb. Azərbaycanın
ev sahibliyi ilə gerçəkləşən bu festival
bütün türk dünyasını əhatə edir.
Festival milli aşıq sənətimizin beynəlxalq aləmdə
tanıdılması və təbliği, mədəniyyətimizin
inkişafında aşıq sənətinin rolunun
artırılması, Azərbaycan aşıqlarının və
aşıq-ozan sənətinin yayıldığı ölkələrin
sənətkarlarının bir araya gətirilməsi
üçün böyük imkanlar yaradacaq. Belə möhtəşəm
tədbirin ölkəmizdə keçirilməsinə Heydər
Əliyev Fondunun prezidenti Mehriban xanım Əliyeva yaxından
kömək göstərmişdir”.
Gecədə
iştirakçı ölkələrin sənətkarları
geniş konsert proqramı ilə çıxış
etmişlər.
Festival çərçivəsində
aşıqlar Tovuz rayonunda konsert proqramı ilə
çıxış ediblər. Oktyabrın 25-də
reallaşan konsertdə qonaqlar əvvəlcə rayonun mərkəzindəki
Heydər Əliyev muzeyini ziyarət edərək, ulu öndərin
həyat və fəaliyyətini əks etdirən eksponatlara
baxıblar.
Gənclərdən ibarət “Misri”
aşıqlar ansamblının qarşıladığı
qonaqları rayon icra hakimiyyətinin başçısı
Tofiq Zeynalov salamlayıb. Tədbirin saz və söz diyarı
qədim Tovuzda keçirilməsini yüksək qiymətləndirən
T. Zeynalov qonaqlara rayonun sosial-iqtisadi inkişafı haqqında
məlumat verib.
Aşıqlar Birliyinin sədri,
xalq şairi Zəlimxan Yaqub türk dünyasının
birliyindən, aşıq sənətinin
böyüklüyündən bəhs etmiş və Heydər
Əliyev Fondunun prezidenti, YUNESKO-nun və İSESKO-nun xoşməramlı
səfiri, Milli Məclisin deputatı Mehriban xanım Əliyevanın
bu festivala böyük qayğı göstərdiyini dilə gətirib.
Z.Yaqub Tovuzun klassik və müasir aşıqlarından
söz açaraq ulu öndər Heydər Əliyev və
Prezident İlham Əliyevin aşıq sənətinə olan
rəğbətlərini vurğulayıb. Sonra Türkiyə,
Qırğızıstan, İran, Özbəkistan,
Naxçıvan və Tovuz aşıqlarının
iştirakı ilə konsert proqramı reallaşıb. Festival
çərçivəsində aşıqlar Qazax və Gədəbəy,
Şəmkir və Tovuz şəhərlərində konsert
proqramı ilə çıxış ediblər.
Festivalın bağlanış mərasimi isə “Azərbaycanın
Əfsanələr Paytaxtı” elan olunan Gəncədə
gerçəkləşib.
HÜSNİYYƏ
525-ci qəzet.- 2010.- 27 oktyabr.- S.7.