“Sirabda arxeoloji araşdırmalar” nəşr edilib

Naxçıvan Muxtar Respublikasının Babək rayonunun Sirab kəndi yaxınlığında yerləşən qədim yaşayış yerləri və orada aşkar olunan Enolit, Erkən Tunc, Orta Tunc, Dəmir Dövrü və Orta əsrlərə aid maddi-mədəniyyət nümunələrinə dair “Sirabda arxeoloji araşdırmalar” kitabı işıq üzü görüb. Bu barədə AMEA Naxçıvan Bölməsinin İnformasiya şöbəsinin əməkdaşı Türkanə Bəylərlidən məlumat almışıq. Enolit dövründən başlayaraq Orta əsrlərədək Naxçıvan tarixinin böyük bir dövrünü əhatə edən Sirab kəndi ətrafında aşkar olunan yeni abidələrdən bəhs olunan monoqrafiya üç dildə-Azərbaycan, Rus, İngilis dillərində oxuculara təqdim olunub. Yeni nəşrdə Sirab kəndi yaxınlığında aparılan araşdırmalar, eləcə də tədqiqtlar zamanı tapılmış keramika məmulatları, onların tipologiyası və paralelləri haqqında məlumatlar verilib.

Eyni zamanda Sirab kəndindən şimal-şərqdə yerləşən Daşqala mağarası, Zirinclik, Taxçalı, cənub-qərbdə yerləşən Şorsu, cənub-şərqdə yerləşən Qaratəpə, şimal-qərbdə yerləşən Yumru Sürümçək və digər yaşayış yerləri, kəndin ərazisində olan təbiət abidələri və ziyarətgahlarla bağlı ümumi məlumatlar ətraflı şəkildə öz əksini tapıb. Monoqrafiyada Zirinclik, Şorsu və Yumru Sürümçəkdə aşkar edilən keramika məmulatlarının arxaik elemetləri ilə seçildiyi göstərilir və bu ərazidə Neolit dövrünə aid abidələrin də aşkar olunma ehtimalı qeyd edilir. Sirab kəndinin ərazisində və onun ətrafında yerləşən abidələrin xəritəsi, habelə aşkar olunan keramika məmulatlarının və qədim yaşayış yerlərinin rəngli foto-şəkillərin də yer aldığı yeni nəşr 160 səhifədən ibarətdir.

AMEA Naxçıvan Bölməsi Tarix Etnoqrafiya və Arxeologiya İnstitutunun şöbə müdiri, AMEA-nın müxbir üzvü Vəli Baxşəliyev və Sirab kənd orta məktəbin müəllimi Zaleh Novruzovun birgə hazırladıqları “Sirabda arxeoloji araşdırmalar” monoqrafiyası araşdırıcılar və geniş oxucu kütləsi üçün nəzərdə tutulub.

GÜNEL

525-ci qəzet.- 2010.- 27 oktyabr.- S.7.