Azərbaycanda Özbəkistan Kinosu Günləri başlayıb

Azərbaycanın mədəniyyət və turizm naziri Əbülfəs Qarayev Azərbaycanda səfərdə olan “Özbəkkino” Milli Agentliyinin baş direktorunun müavini, Özbəkistanın əməkdar mədəniyyət xadimi Cahangir Kasımovun rəhbərliyilə nümayəndə heyətini qəbul edib. APA-nın məlumatına görə, nümayəndə heyətinə Özbəkistanın xalq artisti, aktyor Ulmas Əlixodjayev, Özbəkistanın əməkdar incəsənət xadimi, kinorejissor Kamara Kamalova, rejissor və aktyor Mansur Abduxalikov daxildir. Nazir görüşdə iki ölkə arasında mədəni əməkdaşlığın güclənməsindən məmnunluğunu ifadə edib. Ə. Qarayev Azərbaycanın mədəniyyət ocaqlarında gedən təmir-bərpa işləri barədə qonaqlara məlumat verərək deyib ki, “Nizami” kinoteatrında aparılan əsaslı təmir işləri yekunlaşdıqdan sonra həmin məkanda çoxsaylı beynəlxalq kino festivallar həyata keçiriləcək. Azərbaycanda kino-prokat sahəsində çatışmazlıqların olduğunu da qeyd edən nazir bu problemlərin aradan qaldırılması yönündə lazımi işlərin aparıldığını vurğulayıb. Özbəkistan nümayəndə heyətinin rəhbəri Cahangir Kasımov Azərbaycanda bu gün start götürəcək Özbəkistan Kino Həftəsi üçün maraqlı proqram tərtib edildiyini diqqətə çatdırıb. Qonaq Azərbaycan kinematoqrafiyası ilə yaxından tanış olduğunu, “Arşın mal alan”, “Qaynana” kimi filmləri çox bəyəndiyini açıqlayıb.

Özbəkistan nümayəndə heyətinin Azərbaycan Dövlət Mədəniyyət və İncəsənət Universitetində, “Azərbaycanfilm” kinostudiyasında görüşləri nəzərdə tutulub. Qonaqlar İçərişəhər, Şirvanşahlar sarayı, Müasir İncəsənət Muzeyi ilə tanış olub, dahi özbək şairi Əlişir Nəvainin Bakıdakı abidəsini ziyarət ediblər.

Qeyd edək ki, Özbəkistan kino günlərinin təntənəli açılış mərasimi Gənc Tamaşaçılar Teatrında keçirilib. Açılış mərasimində ilk öncə bu ilin aprelində Özbəkistanda keçirilən Azərbaycan Kino Günləri ilə bağlı hazırlanmış xüsusi çarx nümayiş olunub. Mədəniyyət və turizm naziri Əbülfəs Qarayev iki dost ölkə arasında mədəni əməkdaşlığın gücləndirilməsi naminə bu cür tədbirlərin keçirilməsini əhəmiyyətli hesab etdiyini deyib. Özbəkistanın Azərbaycandakı səfiri İsmətullah İrqaşev çıxış edərək bildirib ki, gündən-günə inkişaf edən, müasirləşən Azərbaycan da Özbəkistan Kino Günlərinin keçirilməsi olduqca təqdirəlayiqdir. Səfir kino günlərində azərbaycanlı kinosevərlərin mənalı vaxt keçirəcəklərinə ümid etdiyini vurğulayıb.

Çıxışlardan sonra qonaqlara Özbəkistanda istehsal olunmuş “Səma altında yol” filmi göstərilib. Xatırladaq ki, oktyabrın 27-dək davam edəcək Özbəkistan Kino Günləri çərçivəsində Azərbaycan kinosevərlərinin özbək kinematoqrafçılarının “Ötən günlər”, “18-ci kvadrat” bədii, “Şərq dürdanəsi” “Registan. Səmərqənd gövhəri” sənədli filmlərinə baxmaq imkanı var. 236 nömrəli məktəbdə isə “Özbəkistan cizgi filmləri günü” keçirilməsi planlaşdırılıb.

525-ci qəzet.- 2010.- 27 oktyabr.- S.7.