Tbilisidə Atəşgah və ya bizim Atəşgahın ekiz qardaşı

Şahvələd Eyvazovun yaradıcılıq dəsti-xətti, maraqlı fotoları sənətsevərlərin diqqətini çoxdan cəlb edib. Onlarca fotosərginin iştirakçısı kimi o, beynəlxalq aləmdə çoxdan tanınıb. Avropanın bir çox ölkələrində, habelə, Yaponiyada açılan fərdi sərgiləri Şahvələd Eyvazovun sənətinin mahir ustası olduğunu sübut edir. Onlarca sərginin diplomçusu və laureatı olan Şahvələd Eyvazov bu gün də doğulub boya-başa çatdığı Tbilisi şəhərində yaşayıb –yaradır. O, 17 ildir ki, ABŞ-ın “Assoşeyted Press” informasiya agentliyinin Tbilisidə yerləşən Qafqaz bürosunun fotomüxbiridir. Dostlarının və ərki çatanların “Şah”, “Şaxo” dedikləri və heç cür qocalığı yaxına buraxmayan bu gözəl insanın sədası tez-tez Qafqazın milli münaqişə zonalarından gəlir. Şahvələdin Osetiya, Abxaziya, Qarabağ münaqişəsindən çəkdiyi kadrlar dünyanın müxtəlif qəzet-jurnallarında dərc olunub, mütəxəssislərin və tamaşaçıların diqqətini cəlb edib. O, sözün həqiqi mənasında, peşəsinin professionalıdır. İşindən başqa Şahvələd mənsub olduğu xalqın – Gürcüstanda yaşayan azərbaycanlıların adət-ənənəsini, onun maddi mədəniyyət abiələrinin, ulularını obyektin yaddaşına köçürməkdən yorulmur. Tez-tez qədim Tbilisinin dolanbac yolları, Şeytanbazar, Meydan, Avcala, Saburtala,eləcə də Borçalının kənd adamlarının, üz cizgiləri Şahvələdin obyektinə tuş gəlir. Bu yaxınlarda Tbilisidə olarkən vaxtı ilə birgə axtarıb tapdığımız Atəşgahın şəklini çəkməyi xahiş etdim. Doğrudur, həmin “vaxtı ilə”nin üstündən 20 il keçib. O vaxt dövran da, mizan-tərəzi də başqaydı. Şahvələd sözümü yerə salmadı, həmişə olduğu kimi səssiz-səmirsiz fotoaparatı götürüb “Qədim Şəhərə gedək” – dedi. Düzdü, Atəşgahın Qədim Şəhərdə Narınqalanın ətəyində, Petxain kilsəsinin yaxınlığında yerləşdiyini bilirdim. Ancaq Qədim Şəhərdə aparılan irimiqyaslı bərpa işləri bizi çox çıxılmaz vəziyyətə saldı. Xeyli vaxt Atəşgahı tapa bilmədik. Şahvələdin peşəkarlığı burada da köməyə çatdı, kiçik bir lövhə nəzərimizi cəlb etdi. Bəli, budur Atəşgah! Sal qayanın üzərində ucalan, artıq bərpa olunmuş məbədin içərisinə doğru pilləkənlə qalxdıq. İbadətgahın fasadı da, tağları da şərq üslubuna aid olduğu o saat nəzəri cəlb edir. Kiçik lövhədə Atəşgahın Gürcüstan dövləti tərəfindən tarixi-memarlıq abidəsi kimi qanunla mühafizə olunduğu, abidənin Norveç Xarici İşlər Nazirliyinin yardımı, həmçinin Norveç dövlətinin maliyyə dəstəyi ilə bərpa edildiyi yazılıb. Əlbəttə, V–VII əsrlərin yadigarı olan bu abidəyə və Gürcüstan dövləti tərəfindən tarixi dəyərlərə göstərilən qayğı məni riqqətə gətirdi, xalqımıza məxsus onlarca sənət əsərinin işıq üzünə çıxacağına inamımı artırdı. Məbədin, ibadətgahın və tarixi yaddaşımızın abidəsinə isə E.Şahvələdin fotoobyektivinin gözü ilə, birlikdə baxmağı tövsiyə edirəm. Buyurun, qədim Tiflisə yollanaq!!!

525-ci qəzet.- 2010.- 27 oktyabr.- S.7.