Karikaturaçı Seyran Cəfərlinin sərgisi təşkil edilib

Azərbaycan Media Mərkəzində beynəlxalq müsabiqələrin qalibi, tanınmış karikaturaçı Seyran Cəfərlinin ilk karikatura sərgisinin açılış mərasimi gerçəkləşib. Mərasimdə giriş sözü ilə çıxış edən mərkəzin rəhbəri Gülnarə Axundova karikatura sənətinin jurnalistikanın tərkib hissəsi olmadığına təəssüfləndiyini bildirərək, sərginin keçirilməsində əsas məqsədin mətbuatın diqqətini bu sahəyə yönəltmək olduğunu vurğulayıb: “Bu gün burada sərgilənən karikaturalar hansısa layiqli bir mətbu orqanın səhifələrində yerləşdirilmiş ola bilərdi. Sərgini keçirməkdə də məqsədimiz mətbuatın, mətbu orqanların rəhbərlərinin, baş redaktorlarının diqqətini karikatura sənətinə yönəltməkdir. İstedadlı karikatura ustası, bir sıra beynəlxalq müsabiqələrin qalibi Seyran Cəfərliyə Azərbaycanı xarici ölkələrdə layiqincə təmsil etdiyinə və fədakarlığına görə minnətdarlığımızı bildiririk”.

ABŞ-ın Azərbaycandakı səfirliyinin mətbuat katibi Kis Bin çıxışında bildirib ki, hazırda Amerika jurnalistikasında karikaturalardan geniş istifadə olunur. Belə ki, ABŞ-da siyasi karikaturaçılar sosial və siyasi şərhçilər sayılır və onların əsərləri, demək olar ki, əsas səhifələrdə çap edilir: “Ümidvaram ki, Seyran Cəfərlinin və onun həmkarlarının əsərləri üçün yazılı və elektron mediada yer tapılacaq”. Seyran Cəfərli isə çıxışında onun ilk sərgisini təşkil edən Media Mərkəzinə təşəkkürünü bildirib, sərgilənən 50-dən artıq karikaturanın daha çox sosial mövzulara həsr olunduğunu vurğulayıb.

HÜSNİYYƏ

525-ci qəzet.- 2010.- 29 oktyabr.- S.7.