Gənc rəssamların “Gümüş maska”sı açılıb

Dövlət Gənc Tamaşaçılar Teatrının binasında gənc rəssamların “Gümüş maska” adlı sərgisinin açılış mərasimi gerçəkləşib. Mədəniyyət və Turizm Nazirliyi və Rəssamlar İttifaqının birgə təşkilatçılığı ilə keçirilən sərgi “Yeni adlar, yeni simalar” layihəsi çərçivəsində həyata keçirilib. Sərgini giriş sözü ilə adıçəkilən nazirliyin incəsənət şöbəsinin müdiri Fərəh Əliyeva açıb. F.Əliyeva təşkil olunan sərginin keçirilməsinin əhəmiyyətindən danışıb: “Mədəniyyət və Turizm Nazirliyi tərəfindən mədəniyyət və incəsənətin müxtəlif sahələrində gənc istedadların dəstəklənməsi, onların təbliği və geniş tamaşaçı auditoriyalarına təqdim olunması məqsədilə bir sıra əhəmiyyətli tədbirlər keçirir. Həyata keçirilən bu tipli tədbirlər gənclərə yaradıcılıq stimulu verərək, yeni maraqlı əsərlərin ərsəyə gəlməsinə şərait yaradır”. Azərbaycan Rəssamlar İttifaqının katibi, xalq rəssamı Ağaəli İbrahimov sərgidə nümayiş olunan əsərlərin tamaşaçılar tərəfindən bəyəniləcəyinə əminliyini dilə gətirib. Sənətşünas, əməkdar incəsənət xadimi Ziyadxan Əliyev mədəniyyətimizin və incəsənətimizin müxtəlif sahələrində gənclərin istedadının üzə çıxması üçün yaradılan şəraiti təqdirəlayiq hal kimi qiymətləndirərək belə tədbirlərin gənclərin yaradıcılığına göstərdiyi müsbət təsirdən danışıb. Əsərləri nümayiş olunan rəssamlar adından çıxış edən Gündüz Ağayev layihədə iştirakının məmnunluğunu dilə gətirərək belə layihələrin gənclər üçün ruh yüksəkliyi, maraqlı əsərlər yaratmaq həvəsi yaratdığını bildirib və gənclər adından sərginin təşkilində əməyi keçənlərə təşəkkürünü çatdırıb. Sərgidə gənc rəssamlardan Gündüz Ağayev, Təkin Əfəndiyev, İnarə Rəsul və heykəltəraş Məmməd Rəşidovun əsərləri (rəngkarlıq, kiçik həcmli heykəltəraşlıq, installyasiya...) nümayiş etdirilib.

HÜSNİYYƏ

525-ci qəzet.- 2010.- 30 oktyabr.- S.17.