Azərbaycanın ilk peşəkar qadın rəngkarı haqqında film çəkilib

Sentyabrın 29-da Beynəlxalq Muğam Mərkəzində “Azərbaycan rəngkarlıq sənətinin kraliçası” filminin premyerası keçiriləcək. Bu barədə Mədəniyyət və Turizm Nazirliyinin mətbuat xidmətindən verilən məlumatda deyilir. Azərbaycanın görkəmli rəssamı Vəcihə Səmədovanın həyat və yaradıcılığını əks etdirən bu filmin rejissoru Nicat Feyzullayevdir. Qeyd edək ki, Vəcihə Səmədova görkəmli azərbaycan rəssamı, əməkdar incəsənət xadimidir. 1939-1944-cü illərdə Əzim Əzimzadə adına Azərbaycan Dövlət Rəssamlıq Texnikumunda təhsil alan Vəcihə xanım, sonradan V. İ. Surikov adına Moskva Dövlət Rəssamlıq İnstitutunun rəngkarlıq fakültəsinə – tanınmış rus rəssamı Pavel Korinin emalatxanasına daxil olur. O, 1951-ci ildə “Üzeyir Hacıbəyov tələbələri arasında” adlı diplom işini müvəffəqiyyətlə müdafiə edir. Müəllimlərinin təkidi ilə təhsilini daha üç il aspiranturada davam etdirir. Sonradan oxuduğu institutda dərs demək təklifi alan Vəcihə Səmədova vətənə qayıtmağı üstün tutaraq, müstəqil yaradıcılığa başlayır. O, Azərbaycanın ilk peşəkar qadın rəngkarıdır.

HÜSNİYYƏ

525-ci qəzet.- 2010.- 15 sentyabr.- S.7.