Yazıçı Sara Oğuzla “Ziyalı ünsiyyəti”

Yanvarın 3-də yazıçı Sara Oğuz Nəzirova ilə görüş keçirilib. Görüş “Aydınlığa doğru” Milli-Mənəvi Dəyərlərin Qorunması İctimai Birliyinin təşkilatçılığı ilə qurumun ənənə halını almış “Ziyalı ünsiyyəti” silsilə tədbirləri çərçivəsində gerçəkləşib. Tədbirdə yazıçının ingilis dilində işıq üzü görmüş “Selected Works” (Seçilmiş əsərləri) kitabının növbəti təqdimatı olub. Mərasimi giriş sözü ilə açan fəlsəfə elmləri doktoru, professor Rəfiqə Əzimova S.Oğuzun yaradıcılıq taleyindən danışıb. S.Oğuzu yaxından tanıdığını çıxışında önə çəkən yazıçı Mənzər Nigarlı onun keşməkeşli həyat yolundan və gözəl insani keyfiyyətlərindən söz açıb. Bakı Dövlət Universitetinin kafedra müdiri Mömünat Ömərova, “Neftçi” qadınlar cəmiyyətinin sədri Solmaz Hacıyeva, rəssam-animator Elçin Axundov, tənqidçi-yazar Aydın Talıbzadə, xalq artisti Şükufə Yusupova S.Oğuzun yaradıcılığı haqqında fikirlərini bölüşüblər. Tərcüməçilər Vahid Türksoy və Vaqif Qəmbərov sözügedən kitaba daxil edilmiş əsərləri ingilis dilinə çevirərkən böyük həvəslə çalışdıqlarını söyləyiblər. S.Oğuz tədbiri təşkil edən birliyə, görüşdə iştirak edən qonaqlara, kitabın ərsəyə gəlməsində əməyi olan hər kəsə minnətdarlığını bildirib. Sonda birliyin sədri Solmaz Əmirli Sara Oğuzun yaradıcılığına ehtiramını bildirib, yazıçıya hədiyyə və xatirə diplomu təqdim edib.

Sevinc MÜRVƏTQIZI

525-ci qəzet.- 2010.- 6 yanvar.- S.7.