Gəncədə Cavad xanın xatirəsinə həsr olunmuş açıq tamaşa nümayiş etdirilib
Dünən Gəncədə
Gəncə xanlığının
sonuncu hakimi Cavad xan Ziyadxan
oğlu Qacarın xatirəsinə həsr olunmuş bədii səhnə nümayiş
etdirilib. Cavad xanın məqbərəsi
önündə təşkil
olunan kompozisiyada Gəncə Dövlət Dram Teatrının aktyorları iştirak ediblər. APA-nın Qərb bürosunun
verdiyi məlumata görə, tamaşada
1786-cı ildən Gəncə
xanlığını idarə
edən Cavad xanın rus işğalçılarına qarşı qeyri-bərabər
döyüşlərdə göstərdiyi qəhrəmanlıq
səhnələri yer
alıb. Yazıçı
Məmməd Alimin “Cavad xan” əsərinin
motivləri əsasında
səhnələşdirilmiş tamaşanın quruluşçu
rejissoru Vaqif Şərifovdur. Tamaşa
Cavad xanın xatirəsinə ehtiram olaraq, xanlıq dövründə istifadə
edilən simvolik toplardan və avtomatlardan açılan yaylım atəşləri
ilə başa çatıb. Bundan sonra hərbi marş sədaları altında simvolik Cavad xan ordusunun,
“N” saylı hərbi hissə əsgərlərinin
və hərbi texnikanın təntənəli
keçidi olub.
525-ci qəzet.-
2010.- 13 yanvar.- S.7.