Şairə Pərvanə Zəngəzurlunun 50 yaşı qeyd olunub

Behbudov adına Dövlət Mahnı Teatrında şairə Pərvanə Zəngəzurlunun 50 illik yubileyi münasibətilə yaradıcılıq gecəsi təşkil olunub. Tədbirdə professor Vilayət Əliyev doğma elindən didərgin düşmüş şairin Vətən həsrətli şeirlərinin hər zaman insanların ürəyini sızlatdığını, işğal altındakı Zəngəzura həsr etdiyi həzin misraların aşıqların dilinin əzbəri olduğunu deyib. Professorlar Buludxan Xəlilov, Eldar Abbasov və başqaları şairənin kitablarının bədii məziyyətlərindən söz açıblar: “Şairənin “Qayıt gəl”, “Dağlar yuxuma girir”, “Zəngəzur həsrəti”, “Tanrım, məni başdan yarat”, “Vətən qürbətdə qaldı”, “Lal haraylar” kitablarından həssas, doğma torpağına qovuşmaq həsrəti ilə çırpınan üsyankar bir şair ovqatı hiss olunur”. Tədbirdə “Zəngəzurun səsi” qəzetinin təsisçisi Yavər Nuriyev P.Zəngəzurluya anadan olmasının 50, yaradıcılığının 20 illiyi münasibətilə qəzetin fəxri fərmanını təqdim edib.

Tədbir çərçivəsində həmçinin şairənin yeni nəşr olunmuş “Çoxala-çoxala azalan ömrüm” kitabının və “Zəngəzur həsrəti” diskinin təqdimatı keçirilib. Mərasim incəsənət ustalarının P.Zəngəzurlunun şeirlərinə bəstələnmiş mahnıların ifası ilə davam edib.

Sonda yubilyar tədbirin təşkilatçılarına və iştirakçılarına minnətdarlığını bildirib.

SARA

525-ci qəzet.- 2010.- 15 yanvar.- S.7.