Teymur Göyçayev klassik musiqi həvəskarları ilə görüşüb

Dövlət Musiqi Mədəniyyəti Muzeyinin (DMMM) nəzdindəki Klassik Musiqi Həvəskarları Klubu növbəti dəfə maestro Niyazinin ev-muzeyində toplaşıb. Muzeydən qəzetimizə verilən məlumat görə, klassik musiqi həvəskarlarının budəfəki qonağı Dövlət Kamera Orkestrinin və Dövlət Gənclər Simfonik Orkestrinin bədii rəhbəri və baş dirijoru Teymur Göyçayev olub.

DMMM-in direktoru Alla Bayramova çıxışında mahir dirijor, pedaqoq və təşkilatçı T.Göyçayevin təkcə ölkəmizdə deyil, xaricdə də geniş tanındığını önə çəkib.

Qara Qarayev adına Dövlət Kamera Orkestrinin və Dövlət Gənclər Simfonik Orkestrinin direktoru Nazilə Yaqubova T.Göyçayevin pedaqoji fəaliyyətindən ətraflı söz açıb: “O, istedadlı uşaqlardan gələcəyin musiqiçilərini yetişdirir. Həmin uşaqlar burada əsl musiqiçi kimi yetişir və böyük orkestrlərdə işləməyə gedirlər. Bu, hər dəfə Teymur Göyçayevin narahatlığına səbəb olsa da, o, yeni kollektiv yarada bilir”.

T.Göyçayev çıxışında onu narahat edən məsələlərdən danışıb: “Ölkəmizdə skripka, violonçel, faqot sinifləri üzrə müəllimlər azdır. Ustad dərsləri üçün mütləq pedaqoqlar dəvət etməliyik. Həyatımda ən böyük hadisə Dövlət Gənclər Simfonik Orkestrinin yaradılmasıdır. Mənim üçün ən başlıcası uşaqlarla işləməkdir. Hər şey isə mərhum Mstislav Rostropoviçin ölkəmizdə uşaq simfonik orkestri yaradılması barədə Heydər Əliyev Fondunun prezidenti, millət vəkili Mehriban Əliyevaya müraciətindən sonra başlandı. Müxtəlif məktəblərdə baxışa 150 uşaq dəvət olundu, onlardan 50-si seçildi və indi 20 uşaq işləyir. Orkestr bir çox ölkələrdə çıxış edib və hər yerdə yüksək qiymətləndirilib. Hesab edirəm ki, gələcək onlarındır, çünki istedadlı və əməksevərdirlər”. Görüş Dövlət Gənclər Simfonik Orkestrinin çıxışları ilə yekunlaşıb.

SARA

525-ci qəzet.- 2010.- 15 yanvar.- S.7.