Milli Azərbaycan Tarixi Muzeyində şəhidlər yad edilib

Dünən Milli Azərbaycan Tarixi Muzeyində “Şəhidlər sınmayan vüqarımızdır” adlı tədbir keçirilib. Mərasimi giriş sözü ilə açan muzeyin direktoru Nailə Vəlixanlı 20 il öncə Azərbaycan tarixinə qanla yazılmış faciə haqqında tədbir iştirakçıları arasında üstünlük təşkil edən məktəblilərə danışıb: “20 yanvar tariximizin ən ağrılı günlərindəndir. O şənbə gecəsi əliyalın, köməksiz, silahsız halda tankların önündə sipər olan insanlar sovet rejiminin qurbanları və müstəqilliyimiz uğrunda şəhidlər kimi tarixə düşdülər. Şəhər başdan-başa qərənfillərə qərq olmuşdu. Anaların fəryadı şəhəri başına almışdı. Artıq 20 yanvardan 20 il keçir. Hər il bu günlə bağlı məktəblərdə müəllimlər şagirdlərə geniş məlumat verirlər. Biz hamımız o şəhidlər kimi Vətənimizin keşiyində durmalı, Vətən yolunda canlarından keçən insanları, şəhidləri unutmamalıyıq”.

“Yeni İstedadlar”ın təmsilçisi Cəfər Mənsimli tədbirin əhəmiyyətindən danışaraq, təşkilatçılara minnətdarlığını bildirib: “Dekabr ayından fəaliyyət göstərən təşkilatımızın əsas məqsədi şagirdlərdə vətənpərvərlik hissini aşılamaqdır. Belə tədbirlər məhz vətənpərvərliyin təbliği kimi ali bir məqsəd daşıyır. Gənclər bu cür mərasimlərdə fəal iştirak etməlidirlər, çünki keçmişimizi bilməsək, gələcəyi qura bilmərik”.

Tədbirdə Bülbül adına orta ixtisas məktəbinin şagirdləri “20 Yanvar” haqqında şeirlər deyiblər.

Mərasimin sonunda muzeyin direktoru şagirdləri eksponatlara baxmağa dəvət edib.

Hüsniyyə İSMƏTQIZI

525-ci qəzet.- 2010.- 20 yanvar.- S.7.