Peşəkar rejissor və yazıçının təqdim etdiyi “Vicdan mühakiməsi”

Yazıçı Ağalar İdrisoğlunun “Vicdan mühakiməsi” adlı kitabı işıq üzü görüb. Kitabda yazıçının ayrı-ayrı illərdə yazdığı və millətimizin problemlərini, arzularını, istəklərini özündə əks etdirən hekayələrinin, povestlərinin, pyeslərinin kiçik bir hissəsi toplanıb. Müəllif kitabdakı bədii əsərlərində bu gün hamımızı düşündürən ictimai problemlərə – laqeydliyə, rüşvətə, insanın insana düşmən kəsilməsinə qarşı etirazını bildirir. Ziyalının, istedadlı insanların nadanlar tərəfindən alçaldılmasına qarşı çıxaraq, haqq səsini ucaldır, əsl həqiqəti yazaraq, bədii əsərləri vasitəsilə mübarizə aparır və hamını da bu mübarizəyə səsləyir. “Önsöz əvəzi” yazıda müəllif xalqımız haqqında “unutqan, kin saxlaya bilməyən xalqdır” kimi fikirlərilə razı olmadığını, əslində xalqımızın çox mübariz və qoçaq olduğunu vurğulayır. Filologiya elmləri doktoru, yazıçı Zeydulla Ağayev “Ağaların xarakterlər labirinti və ya fəryadı” başlıqlı yazısında müəllif Ağalar İdrisoğlunun peşəkar yazıçılığıyla yanaşı, rejissorluğundan da bəhs edir: “Yazıçılıq, dramaturqluq, publisistika onun ikinci yaradıcılıq sahəsidir. O, Moskvanın müqəddəs sənət ocaqlarından od alaraq respublikada teatr rejissoru işləyən çox az qisim sənətkarlardan biridir. Hər bir əsərinin süjet xəttini quranda sanki səhnə qurur, dəqiq mizanlar, teatrvari mühakimələr yaradır”. Z.Ağayev yazısında Ağalar İdrisoğlunun əsərlərindəki zaman, məkan müxtəlifliyindən danışır: “ Bu kitabda mövzu, məkan və zaman müxtəlifliyi olsa da, əsərləri onun yaradıcı qəlbindən qopan ümumi bir fəryad birləşdirir və həmin fəryadı eşitməmək mümkün deyil”.

Yazıçı qələmə aldığı hekayələr, novellalar, monoloqlar və digər əsərlərdə qəhrəmanın dili ilə insanlara nəyin yanlış, nəyin doğru olduğunu çatdırır. Əsərin qəhrəmanının insan və ya “Uçuq ev”, “Qarğalar”, “Təklənmiş aslanlar”, “Yeməkxana iti”, “Saralmış yarpaq” olmasından asılı olmayaraq, müəllif insanları yalnız doğruluğa, xeyirxah əməllərə səsləyir. Kitabdakı əsərlərindən yazıçının istedadlı rejissor olduğu aydın nəzərə çarpır. Çünki yazıçı əksər qəhrəmanlarını səhnədə, ya da hər hansı əsərə quruluş verən rejissor kimi təqdim edir. Əksər əsərlərin sonluğu, demək olar ki, eynidir. Bu da müəllifin insanları həmişə mehriban, dünyanı sülh, əmin-amanlıq içində, rahat yaşamalarını görmək istəməsindən irəli gəlir. Yəni, yazıçı reallıqda görmək istədiyi cəmiyyəti əsərlərində əks etdirib. Yazıçının əsərlərində toxunduğu problemlər gündəlik həyata olduqca yaxındır. Bu da oxucunu kitaba cəlb edən əsas amillərdən biridir. Kitabda yer almış əsərlərdə sevgiyə real baxış öz əksini tapıb.

“Vicdan mühakiməsi” yazıçının oxucularla səkizinci görüşüdür. A.İdrisoğlunun indiyədək “İnan mənə”, “Ən xoşbəxt gün”, “Məhkəmədən əvvəl, məhkəmə və ya kəfənini geymiş qoca”, “Ramiz İslamoğlu sorağında və ya əkmə qəm ağacı”, “Dünya azərbaycanlıları” (müştərək), “Qaranlığı yaran işıq” (Maarif Teymurla birlikdə) və “Bir alim ömrünün salnaməsi” kitabları çap olunub.

Hüsniyyə İSMƏTQIZI

525-ci qəzet.- 2010.- 22 yanvar.- S.7.