Yafəs Türksəsin yeni kitabı işıq üzü görüb

Şair-publisist Yafəs Türksəsin “Baycanın simfoniyası” adlı kitabı çapdan çıxıb. Redaktoru Vüsal Ağayarov olan kitabda şairin müxtəlif illərdə yazdığı şeirlər, müsahibələr, məqalələr və bədii publisistika nümunələri yer alıb. Onun yazdığı “Fasiləli” şeirlər, “Solaxay xəbərlər”, “Neosimfoniyalar” və postmodern şeirlər bu kitaba daxildir. Şair yeni kitabında valideynləri haqqında poetik dillə söz açır. O, “Anamdan xatirələr” şeirində “atam öləndən sonra daha çox sevməyə başladım anamı” – deyir. Qeyd edir ki, anası həyat yoldaşını itirəndən sonra bir çox işlərlə məşğul olub, “dərzi, türkəçaraçı, yorğan sırıyan, xalça-palaz toxuyan” kimi tanınıb, övladlarını bir qarın çörək üçün heç kimə möhtac qoymayıb. “Atamdan xatirələr”də anasını atasının qarasınca deyinməsini qələmə alıb və atasını “Allaha yaxın, hər işi düz” bir insan kimi təsvir edib.

Kitabda şairin sevgiyə aid şeirləri üstünlük təşkil edir. “Qorxu”, “Bir gecənin nağılı”, “Bir sevgi uydurmuşam”, “Etüd”, “Sevgi sürprizləri”, “Mən bu məhəbbətin sonun bilirdim”, “Daha sevmirəm səni”, “Mələk sevgisi uydururam”, “Sevgi sualları...”, “Sana ve hiç kime” və digər şeirlər şairin ruhundan qələminə süzülən sevgi duyğularının ifadəsidir.

“Qeyrəti ayağına dolaşan oğlan”, “Hümbət nağılı”, “Şikar əfsanəsi”, “Sapand daşı”, “Baxma taleyimə, qaraçı” şeirləri mili ağrı-acımız olan Qarabağ, onun uğrunda qəhrəmancasına qurban getmiş şəhidlər haqqındadır. “Tomrisim şair doğulub” şeiri şair Məlahət Yusifqızının yaradıcılıq gününə həsr olunub. Bu şeirdə müəllif Məlahət Yusifqızının vətəninə, doğma yurduna bağlı bir yazar kimi səciyyələndirir.

Kitabın sonunda “Müsahibələr və məqalələr” bölümü yer alıb.

Hüsniyyə İSMƏTQIZI

525-ci qəzet.- 2010.- 29 yanvar.- S.7.