Ramiz Əzizbəyli “Cızma-qaralarım”a imza atdı

Ötən gün Azərbaycan Yazıçılar Birliyinin (AYB) Natəvan klubunda, tanınmış aktyor və rejissor, xalq artisti Ramiz Əzizbəylinin “Cızma-qaralarım” adlı ilk kitabının təqdimatı və imza günü gerçəkləşib.

Mərasimi giriş sözü ilə açan AYB-nin katibi Rəşad Məcid R.Əzizbəyli ilə dostluqlarının 25 il əvvəldən başladığını bildirərək, tədbirin keçirilməsi zərurətindən də danışıb: “25 ilə yaxın müddətdə yaxından tanıdığım tanınmış aktyor və rejissor Ramiz Əzizbəylinin “Cızma-qaralarım” kitabının imza gününü keçirməkdə məqsəd, bir növ, köhnə, maraqlı vərdişləri geri qaytarmaqdır. Ramiz Əzizbəyli 10 ilə yaxındır ki, AYB-nin üzvüdür. Vaxtilə “525-ci qəzet”də onun şeirləri, aforizmləri çap olunurdu. Düşündük ki, niyə də qələmə alınan bu əsərlər kitab şəklində toplanmasın?!” R.Məcid R.Əzizbəylini AYB-nin rəhbərliyi adından təbrik edib.

Mərasimin aparıcılığı həvalə olunan yazıçı-dramaturq, “Ulduz” jurnalının baş redaktoru Elçin Hüseynbəyli deyib ki, bu kitabın işıq üzü görməsi bəziləri üçün gözlənilməz, onunçünsə gözlənilən olub: “Hər kəsin istedadlı rejissor, aktyor, müəllim kimi tanıdığı Ramiz Əzizbəylinin həm də maraqlı yaradıcılıq tərzinə malik şair olduğunun şahidiyəm. Bu gün isə hamımız bu yaradıcılığın bəhrələrini görürük”. “Ramiz Əzizbəyli 9 yaşından səhnədədir. Onun uşaqlığı, yeniyetməliyi, gənclik illərindən ta bu gününə qədər insanların gözü qarşısında olub. Deyirlər ki, istedadlı insan hansı sahədə fəaliyyət göstərməsindən asılı olmayaraq, özünü təsdiqləməyi bacarır. Ramiz Əzizbəyli belə insanlardandır. Teatr, kino, rejissorluq, müəllimlik fərqi yoxdur, o, sadalanan bu sahələrin hamısında öz sözünü deməyi bacarır”. Bu fikirləri tədbirdə yazıçı-dramaturq Əli Əmirli səsləndirib.

Daha sonra xalq artisti İlham Namiq Kamal çıxış edərək, R.Əzizbəylinin çox yaxşı müşahidəçilik qabiliyyətinə malik olduğunu bildirib və ona bu sahədəki yaradıcılığının da davamlı olmasını arzulayıb.

Şair Ramiz Rövşən R.Əzizbəylini etibarlı, sadiq dost, istedadlı insan kimi səciyyələndirib. R.Əzizbəyli ilə bağlı düşüncələrini dilə gətirən şair kitabın adı ilə bağlı da fikrini bölüşüb: “Müəllif kitabına təvazökar bir ad qoysa da, yaradıcılıq iddiaları böyükdür”.

Şair Musa Yaqub R.Əzizbəylinin şeirlərinin bayatılara, nəğmələrə yaxınlığını dilə gətirib. Şair İlyas Tapdıq, xalq artisti Həmidə Ömərova və başqaları da çıxış edərək R.Əzizbəylinin şəxsiyyəti və yaradıcılığı barədə fikirlərini söyləyiblər.

Sonda çıxış edən müəllif ilk kitabı haqqında düşündüklərini dilə gətirib, tədbirin təşkilatçılarına və iştirakçılara minnətdarlığını bildirib: “Bu, ilk kitabım olmaqla, mənim düşüncə və həyəcanlarımın müxtəlif illərdə kağıza köçürdüyüm yazılı ifadəsidir. Bu kitabı çap etdirməklə mən heç də özümü şair və ya yazıçı kimi təqdim etmək məqsədi güdmürəm. Sadəcə həmişə cızma-qara edib, hara gəldi atdığım bu yazıları bir gün dostlarım, heç olmasa, qəzet və jurnallarda ara-sıra çap etdirməyimi xahiş etdilər. Mən də onların bu xahişini nəzərə alıb bu toplunu hazırladım”.

“Cızma-qaralarım”ın redaktoru Tahirə Ağasıyeva olan kitaba ön sözü elə müəllif özü qələmə alıb. Kitabda R. Əzizbəylinin fərqli illərdə qələmə aldığı “And içmişəm”, “Millət”, “Tövbə” kimi şerləri, “Yol”, “Mıx”, “Yuxu” kimi hekayələri və publisistik yazıları toplanıb.

HÜSNİYYƏ

525-ci qəzet.- 2011.- 5 aprel.- S.7.