Əzim Əzimzadənin 130 illiyinə həsr olunmuş kitab işıq üzü görüb

Aprelin 7-də müsəlman Şərqində ilk satirik jurnal olan “Molla Nəsrəddin” jurnalının 105 illiyi qeyd ediləcək. Bu münasibətlə Azərbaycanın ilk karikaturaçı rəssamı Əzim Əzimzadənin 130 illiyinə həsr olunmuş “Rəssam və karikatura” adlı kitab işıq üzü görüb. Azərbaycan Karikaturaçı Rəssamlar Birliyindən APA-ya verilən məlumata görə, Bayram Hacızadənin müəllifi olduğu bu kitab əsasən III “Molla Nəsrəddin” Beynəlxalq Karikatura Müsabiqəsinə göndərilən rəsmlər əsasında hazırlanıb.

Kitabın I hissəsində Ə.Əzimzadənin yaradıcılığı və fəaliyyəti geniş işıqlandırılıb, görkəmli sənətkarın müxtəlif dövrləri əhatə edən çoxsaylı əsərləri karikaturasevərlərə təqdim olunub. Azərbaycan və ingilis dillərində hazırlanmış 280 səhifəlik kitab Azərbaycan Karikaturaçı Rəssamlar Birliyi tərəfindən dünyanın 60 ölkəsindən yüzlərlə rəssama hədiyyə göndərilib.

525-ci qəzet.- 2011.- 5 aprel.- S.7.