Rəfail Laçınlı “Rübailər”i imzalayıb

Ötən gün Azərbaycan Yazıçılar Birliyinin “Natəvan” klubunda şair Rəfail Laçınlının 60 illik yubileyi və “Rübailər” kitabının İmza günü gerçəkləşib. Mərasimi giriş sözü ilə açan filologiya elmləri doktoru, tənqidçi Vaqif Yusifli rübai haqqında danışıb: “Rübailər Azərbaycan ədəbiyyatının qədim tarixə malik klassik şeir formalarındandır. Rübai deyərkən ilk yada düşən bu janrda mükəmməl nümunələr yaradan böyük fars-tacik şairi, filosof Ömər Xəyyamdır. Daha sonra görkəmli rübai ustası kimi şöhrət tapmış azərbaycanlı şairə xanım Məhsəti Gəncəvi yaddaşlarda canlanır. Bu janra müraciət edən çağdaş ədəbiyyat nümayəndələrindən şair Qabil, Oqtay Rza, Abbas Abdulla və başqalarını da misal çəkmək olar”. V.Yusifli R.Laçınlının yaradıcılığı haqqında da fikirlərini bölüşüb: “Hər bir şair və ya yazar qələmə aldığı əsərində özünəməxsusluğu, fərqliliyi ilə seçilməyə can atır. Rəfail Laçınlı məhz belə şairlərdəndir. Onun rübailərində ən böyük dərdi olan Laçın, Qarabağ ön sıradadır. Bundan başqa, müəllif rübailərində dünyəvi hissləri, həyatdakı təzadları, halal və haramı, insanı, onun gözəlliyini, arzu və istəklərini əks etdirir”.

Tədbirin aparıcısı şair Dayandur Sevgin müəllifin rübailərini bəyəndiyini dilə gətirib.

Şair Abbas Abdulla R.Laçınlının yaradıcılığı haqqında fikirlərini bölüşərək, rübai janrında orijinal olmağın çətinliyindən söz açıb: “Rübai olduqca çətin janrdır. Buna görə də onu olduğu kimi çatdırmaq böyük məharət tələb edir. Rəfail Laçınlı qələmə aldığı rübailərində orijinalı olduğu kimi saxlayaraq olduqca maraqlı nümunələr yaradıb”. Şair Oqtay Rza R.Laçınlı ilə tanışlıq tarixini tədbir iştirakçılarına danışaraq, müəllifin yaradıcılığı haqqında fikrini bildirib.

Tədbirdə tanınmış rəssamlardan Nəvai Məmmədoğlu və İlqar Əkbərov da müəllif haqqında fikirlərini bölüşərək, R.Laçınlıya portret hədiyyə ediblər.

Sonda çıxış edən R.Laçınlı tədbirdə iştirak edənlərə təşəkkürünü bildirib.

HÜSNİYYƏ

525-ci qəzet.- 2011.- 7 aprel.- S.7.