Xalq rəssamı Ağəli İbrahimovun ilk fərdi yaradıcılıq sərgisi açılıb

Mədəniyyət və Turizm Nazirliyinin təşkilatçılığı ilə aprelin 6-da Muzey Mərkəzinin Sərgi Qalereyasında Rəssamlar İttifaqının katibi, xalq rəssamı Ağaəli İbrahimovun fərdi yaradıcılıq sərgisinin açılışı olub.APA-nın məlumatına görə, sərgidə çıxış edən mədəniyyət və turizm nazirinin müavini Ədalət Vəliyev Ağaəli İbrahimovun yaradıcılığından söz açıb və rəssamın uzun illərdir yaratdığı incəsənət nümunələrini yüksək qiymətləndirib. O bildirib ki, 1966-cı ildən ümumrespublika və beynəlxalq sərgilərdə iştirak edən rəssamın əsərləri Rusiya, Türkiyə, ABŞ, Fransa, Almaniya, İtaliya, Böyük Britaniya, Suriya, Bolqarıstan və digər ölkələrdə nümayiş olunub. Lakin uzun illərdir ki, rəngkarlıq sahəsində yorulmadan çalışan tanınmış fırça ustasının yaratdığı sənət əsərləri indiyədək geniş tamaşaçı auditoriyasına təqdim edilməyib. Təxminən 45 illik bədii yaradıcılıq fəaliyyəti ərzində ilk dəfədir rəssamın fərdi yaradıcılıq sərgisi keçirilir.

Mərasimdə Rəssamlar İttifaqının sədri, xalq rəssamı Fərhad Xəlilov, Bakı Rəssamlıq Akademiyasının rektoru Ömər Eldarov, xalq artisti Arif Məlikov, sənətşünas Ziyadxan Əliyev Ağəli İbrahimovun yaradıcılığından danışıblar.

Ağəli İbrahimov belə bir sərgisinin təşkilinə görə, Mədəniyyət və Turizm Nazirliyinə öz minnətdarlığını bildirib: “Həyatımda ilk dəfədir ki, fərdi sərgim keçirilir. Məndən olsaydı, hələ də sərgim açılmazdı. Amma 65 illik yubileyimlə əlaqədar nazir Əbülfəs Qarayev, nazir müavini Ədalət Vəliyev və Fərhad Xəlilov belə qərara gəldilər ki, bu sərgi baş tutsun. Bu gün 1960-cı ildən bu günə qədər yaratdığım əsərlərin bir hissəsi nümayiş olunur. Təbii ki, bu nə vaxtsa olmalı idi. Amma heç bilməzdim ki, belə bir sevinc yaşayacağam”.

Sərgidə mədəniyyət və turizm naziri Əbülfəs Qarayev də iştirak edib. Aprelin 12-dək davam edəcək sərgidə xalq rəssamının 40 əsəri nümayiş olunur.

525-ci qəzet.- 2011.- 7 aprel.- S.7.