“Qeyb”in təqdimatı oldu

Ötən gün Azərbaycan Yazıçılar Birliyinin Natəvan klubunda (AYB) tanınmış yazıçı Mahirə Abdullanın “Qarabağsız namələr” silsiləsindən “Qeyb”, “Ağıllı qadının intiharı” və “Erməni kölgəsi” kitablarının təqdimat mərasimi keçirilib. Tədbiri giriş sözü ilə açan xalq şairi Fikrət Qoca M.Abdullanı uzun zamandan bəri tanıdığını, yaradıcılığı ilə yaxından tanış olduğunu qeyd edib: “Mahirə Abdulla özünə hörmət eləyən, daim ö üzərində işləyən şairdir. İstedadlı insan həm də zəhmət çəkməlidir ki, sabaha yol açsın. Tərcümeyi-halı, istedadı, çəkdiyi zəhmət onun simasında öz əksini tapıb”. Tədbirin aparıcısı şair Qəşəm Nəcəfzadə M.Abdullanın insani keyfiyyətlərindən və yaradıcılığının məziyyətlərindən söz açıb, onun əsərlərinin idrak və təfəkkürə söykəndiyini vurğulayıb. O, M.Abdullanın həm də istedadlı rəsam olduğunu bildirib: “Mahirə Abdullanın fəlsəfi düşüncənin hakim kəsildiyi əsərləri bu xanımın daxili aləmini əks etdirir. Hər işdə fərqlənməyi bacaran Mahirə Abdulla rəssamlıqda da bu ənənəsinə sadiq qalıb”.

Zəngəzur Cəmiyyətin Ağsaqqallar Şurasının sədri Ziyadxan Nəbibəyli M.Abdullanı vətənpərvər, qəlbi Vətən sevgisi ilə döyünən qələm sahibi kimi qiymətləndirib: “Azərbaycanın dilbər guşəsi olan Qarabağ haqqında Mahirə Abdullanın qələmə aldığı əsərlər o qədər doğma və içdəndir ki, o gözəl torpaqlarda heç vaxt olmayan oxucu belə, Qarabağ haqqında dolğun məlumata sahiblənir. Qarabağda yaşam tərzi, adətləri və ümumilikdə hər bir detal zənginliyi ilə insan gözlərində canlanır”.

AYB-nin katibi Arif Əmrahoğlu M.Abdullanı əvvəl istedadlı şair, daha sonra çox səmimi, mehriban insan kimi tanıdığını bildirib: “Mahirə Abdulla bizim adət etdiyimiz ənənəvi harmoniya hüdudlarından kənara çıxan rəssam və yazardır. O, yazdığı mövzunun aktuallığının kölgəsində gizlənmir, daha çox şeirin alt qatında, insanı düşündürən mətləbləri qələm alır”.

“Şairə, sənətkar, rəssam, publisist... Bütün bu sadaladığım peşələr bir xanımda cəmlənib. Tanrı Mahirə Abdullaya gözəl şeir yazmaq istedadı bəxş edib. O yazdığı şeirlərin şəklini də çəkməyi bacarır. Bu şəkillər insanın Tanrıya duasıdır. Dilimizin şirinliyindən, təşbehlərdən bol-bol istifadə edən Mahirə Abdullanın qələmindən çıxan poetik nümunələr oxucusuna zövq verir”. Bu fikirləri tədbirdə şair Fikrət Sadıq səsləndirib.

Qeyd edək ki, “Qeyb” romanı M.Abdullanın “Ürəkkeçmə”, “Erməni kölgəsi”, “Əvvəl. Axır”, “Ağıllı qadının intiharı” nəsr əsərlərindən və “Qarabağsız” şeirlər kitabından sonra Qarabağ faciəsinin dərin şüuraltı qatlarına həsr edilən yeni fəlsəfi-psixoloji romandır.

HÜSNİYYƏ

525-ci qəzet.- 2011.- 9 aprel.- S.26-27.