“Azərbaycan”ın mart sayı oxuculara təqdim edilib

“Azərbaycan” ədəbi-bədii jurnalının növbəti sayı işıq üzü görüb. Toplunun ilk səhifələrində şair Camal Yusifzadənin 70 illiyi münasibətilə Vaqif Yusiflinin yazdığı “Payızdan gələn şair” başlıqlı məqalə və şairin şeirləri verilib. Jurnalın “Nəsr” bölməsində Aslan Quliyevin “Yaşıl təpələrin üstündəki buludlar” romanı, Xuraman İsmayılovanın “Sədaqət”, Vüqar Tapdıqlının “Xalis xan” hekayələri yer alıb. “Poeziya” guşəsində Əlizadə Nurinin, Tahir Talıblının, Nəzakətin, Zirəddin Qafarlının, Səxavət Talıblının, Azadə Novruzovanın, İlham İnamın, Nazim Əlioğlunun, Adil Misirlinin və Səyyarə Orucqızının şeirləri var. Sevil Gültənin tərcüməsində Somerset Moemin “Edvard Bernardın məğlubiyyəti” hekayəsi “Yeni tərcümələr” bölməsindədir.

Topluda görkəmli alim Araz Dadaşzadənin 75 illiyinə həsr edilən, İntiqam Qasımzadənin qələmə aldığı “Saflıq da polada bərabərdi” başlıqlı yazı diqqəti çəkir. Burada xalq yazıçısı Anarın uşaqlıq dostu Araz Dadaşzadəyə yazdığı məktublar da oxuculara təqdim olunub. Kamil Hüseynoğlunun qələmə aldığı “Novruzun tarixi və coğrafiyası” məqaləsində qədim bayramımıza aid ənənələrdən, xalqımızın bu bayramı hansı dövrdən qeyd etməyə başlamasından geniş bəhs olunub.

“Ədəbi gənclik” guşəsində gənc şairlər Şəhriyar Hacızadənin, Zəkəriyyə Qurbanovun və Xalid Mahmudun şeirlərinə yer verilib. Nahid Hacızadənin şair Süleyman Rüstəmin 105 illiyi münasibətilə yazdığı “Gəncliyindən ustad sayılırdı” yazısı da topluda öz əksini tapıb. Nahid Hacızadənin 75 yaşına həsr olunmuş “Qırmızı yağışlar altında” yazısını isə Məmməd Oruc qələmə alıb. Jurnalın “Bizim Türk dünyamız” adlı guşəsində Tofiq Məliklinin “Nazim Hikmət Moskvada (1951-1953- cü illər)” və İmdat Avşarın “Biz gəlmədən enmiş durnalar Ankaraya” başlıqlı məqalələrinə yer ayrılıb. Nərgiz Cabbarlının “Ruhun sarsıntı ehtiyacı, dünyaya təkrar qayıdış və... bir yazıçının yenidən doğuluşu” və Pol Balanfanın “Niyazi Misrinin mistik təlimlərində ruhani yoxsulluq və qara işıq” yazıları “Tənqid və ədəbiyyatşünaslıq” bölməsində oxuculara təqdim olunub.

“Kitablar, rəylər” guşəsində Ataəmi Mirzəyevin Azərbaycan milli əruzşünaslıq məktəbinin banisi, professor Əkrəm Cəfərin “Yandım avazeyi-eşqinlə sənin” kitabına “Füzulişünaslığa qiymətli töhfə” adlı rəyi dərc edilib.

GÜNEL

525-ci qəzet.- 2011.- 9 aprel.- S.17.