Naxçıvan Dövlət Universitetində “Gəmiqaya” ədəbi yaradıcılıq dərnəyi açılıb

Naxçıvan Dövlət Universitetində “Gəmiqaya” ədəbi-bədii yaradıcılıq dərnəyi fəaliyyətə başladı. Dərnəyin ilk məşğələsində rektor, akademik İsa Həbibbəyli çıxış edərək universitetdə istedadlı tələbələri öz ətrafında birləşdirən Tələbə Teatr Studiyası, Tələbə Opera Studiyası, “Karvan” Şən və Hazırcavablar Klubu, “Yallı” qrupu kimi çoxsaylı mədəniyyət kollektivlərindən, müxtəlif musiqi ansambllarından, vokal və xor qruplarından bəhs etdi. Görkəmli ədəbiyyatşünas tələbə gənclər arasında ədəbi-bədii yaradıcılığa böyük qabiliyyət və maraq olduğunu, Naxçıvanın tanınmış filoloqlarının, şairlərinin bu elm ocağında çalışdığını xatırladaraq dərnəyin yaradılmasının zəruriliyindən danışdı, onun fəaliyyətinə uğurlar arzuladı.

Dərnəyin rəhbəri, universitetin “Qeyrət” nəşriyyatının direktoru, tarix elmləri üzrə fəlsəfə doktoru, dosent, Azərbaycan Yazıçılar və Jurnalistlər birliklərinin üzvü, şair-publisist Vaqif Məmmədov dərnəyin tələbə şair və nasirlərin ədəbi mühitdə tanıdılmasında, onların dil, mövzu, janr və üslub baxımından formalaşmasında əhəmiyyətli rol oynayacağını, müasir ədəbi prosesin birgə izləniləcəyini vurğuladı. Sonra tələbələrdən Gülşən Tağıyevanın, Həsən Mustafayevin, Şəbnəm Babayevanın, Taleh Haqverdiyevin, Aytəkin Səfərəliyevanın yeni şeirləri dinlənildi. Müzakirə zamanı şair Vaqif Məmmədov, dərnəyin kuratorlarından olan Tarix-filologiya fakültəsinin dekanı, Naxçıvan MR əməkdar müəllimi, ədəbiyyatşünas İman Cəfərli, filologiya elmləri üzrə fəlsəfə doktorları Abbas Hacıyev və bu sətirlərin müəllifi, yaradıcı tələbələrdən Əzəmət Həsənov çıxış edərək yeni nümunələrin ümidverici yazılar olduğunu, müasir gəncliyin poetik duyumunu, təfəkkür tərzini özündə əks etdirdiyini bildirdilər, tövsiyələrini çatdırdılar. Məşğələdə “Mənim universitetim” və Azərbaycanın dövlət müstəqilliyinin 20 illiyinə həsr olunmuş yaradıcılıq müsabiqələri, müsabiqələrin şərtləri haqqında məlumat verildi.

Qeyd olundu ki, universitet nəşriyyatında dərnək üzvlərinin yaradıcılığından ibarət ildə bir dəfə “Gəmiqaya” almanaxı dərc ediləcək.

Mehriban SULTAN,

NDU-nun Mətbuat şöbəsinin müdiri

525-ci qəzet.- 2011.- 12 aprel.- S.7.