Tarix qarderobunda milli geyimlərimiz
və ya həyata bağlı sənət inciləri
müasirlik güzgüsündə
Hər bir xalqın, millətin
özünəməxsus olan milli geyimləri var. Maddi və mənəvi
mədəniyyətin çoxəsrlik və mürəkkəb
inkişaf prosesində yaranan milli geyimlər digər mədəniyyət
nümunələri ilə müqayisədə milli
xüsusiyyətləri özündə daha mükəmməl
əks etdirir, xalq yaradıcılığının etnoqrafik
və estetik xüsusiyyətlərini qabarıq ehtiva edir. Azərbaycanın
bu günümüzə qədər gəlib çatan milli
geyim formalarının tarixi çox qədimdir. Azərbaycan
Tarixi Muzeyinin Etnoqrafiya elm-fond şöbəsinin müdiri,
tarix elmləri namizədi Gülzadə Axundova da deyir ki, milli
geyimlər tariximizlə sıx bağlıdır. Onun sözlərinə
görə, xalqın milli xüsusiyyətləri, etnogenezi, təsərrüfat
məşğuliyyətinin istiqaməti, məskunlaşdığı
ərazinin təbii-coğrafi şəraiti, bədii
yaradıcılığı, etik düşüncə tərzi
tarixən milli geyimlərdə öz əksini tapıb. Eyni
zamanda şəxsin yaşı, sosial vəziyyətini də
geyimi ilə təyin etmək mümkün olub. Adətən
cavanlar al-əlvan, orta yaşlılar tünd, yaşlılar
isə qara rəngli geyim geyirlər. Azərbaycanda 19-20-ci əsrdə
əsas qadın geyimləri çəpkən, arxalıq, ləbbadə,
eşmək, küləcə və s. ibarət olub.
Xatırladaq ki, indi bu
sadalanan geyimlər, demək olar, məişətimizdə
işlədilmir. Yalnız kənd yerlərində
yaşlı insanlardan bu ifadələri bəzən eşitmək
mümkündür. Eyni zamanda bir çox xalqların, məsələn
yaponların, hindlilər, pakistanlılar, ərəblərin və
başqa xalqların öz milli geyimlərini yalnız
xüsusi günlərdə deyil, elə gündəlik
geyindiklərinin şahidi oluruq. Azərbaycanda isə bu hal
müşahidə olunmur. Bəlkə küçədə
milli geyimli qız və ya oğlan görsək, bunu çox
qəribə qarşılayarıq. Ekspertlər də gündəlikdə
milli geyimlərdən istifadə olunmamasını məhz bir
tərəfdən insanlarda olan komplekslə, digər tərəfdən
isə hər kəsin müasir dəblə ayaqlaşmaq istəməsi
ilə izah edirlər.
Onu da xatırladaq ki, indi Bakıda
Milli Geyim Evi fəaliyyət göstərir. Müəssisənin
direktoru Könül Vəlibəyli deyir ki, milli geyimlərə
maraq günü gündən artır. Xüsusilə də
xaricdə yaşayan soydaşlarımızdan sifariş
alınır. Öncə milli geyim istehsal edən müəssisəni
yaratmaq ideyasından danışan K.Vəlibəyli dedi ki, son
zamanlar Azərbaycanla müxtəlif ölkələr
arasında mədəni əlaqələr genişlənib. Qarşılıqlı
olaraq mədəniyyət günlərinin keçirilməsi
xalqların qədim adət-ənənələrinin
tanınmasına, mədəni irsin təbliğinə
geniş imkanlar yaradır: “Bir dəfə televiziyada xarici
ölkələrdən birində keçirilən Azərbaycan
mədəniyyəti günləri barədə süjeti izləyirdim.
Orada rəqs geyimləri təqdim olunurdu. Azərbaycanda qədim
geyim ənənələri olub və milli geyimlərimiz təkcə
rəqs geyimlərindən ibarət deyil. Bundan sonra, sırf
milli geyimlərlə məşğul olan, onları istehsal edən
bir müəssisə yaratmaq qərarına gəldim. Beləcə
Bakı Milli Geyim Evi yarandı”. İki ilə yaxındır
ki, fəaliyyət göstərdiklərini deyən K.Vəlibəyli
son vaxtlar cəmiyyətdə milliliyə marağın
artması qənaətindədir. “Mədəniyyət sahəsində
beynəlxalq səviyyədə görülən işlər
çərçivəsində milli muğamlarımız, qədim
saz sənəti, xalçaçılıq sənəti
artıq dünya miqyasında tanınır, sevilir. Bu mənada
düşünürdüm ki, milli geyimlərimizə maraq
böyük olacaq və belə də oldu. Bizə tez-tez
müraciət edilir. İstər müxtəlif tədbirlərinin
keçirilməsi üçün, istərsə də şəxsi
müraciətlər əsasında milli geyimlər
hazırlayırıq. Bu sahə böyük diqqət istəyir,
araşdırma tələb edir ki, hansı bölgədə
hansı milli geyimlər mövcud olub. Hazırda bir neçə
gənc modelyer və rəssamla əməkdaşlıq edirik.
Geyimlər hazırlanmazdan öncə bölgələrin
milli geyim xüsusiyyətlərini öyrənirik. Bu istiqamətdə
biz muzeylərimizdə saxlanılan qədim milli geyimləri təhlil
edir, ensiklopediyalardan, milli geyimlərlə bağlı
araşdırmalardan, yaşlı nəslin məsləhətlərindən
yararlanırıq. Məsələn, bir məqamı qeyd edim
ki, bizim geyimlərimizdə heç bir ölkənin təsirinə
rast gəlinmir. Azərbaycan bir neçə ölkə ilə
həmsərhəddir. Amma maraqlıdır ki, bizim qədim
milli geyim öz milliliyini qoruyub saxlayıb, əlavələr
olmayıb. Geyimlərimiz, naxışlarımız çox zəngindir.
Bizim qədim paltarlara baxanda gözəl naxışlar, əl
işləri görürük. Azərbaycanda milli kişi
geyimləri bölgələr üzrə o qədər də
fərqlənmir. Qadın paltarları isə
parçaların rənginə, üz arxalığına,
qol və yaxa kəsimlərinə görə bölgələr
üzrə bir-birindən fərqlənir”. Müəssisə
rəhbəri milli geyimlərə xarici ölkələrdə
yaşayan gənclərin xüsusi maraq göstərdiyini
deyib: “Bəzən olub ki, məsələn, xaricdə təhsil
alan tələbələr milli bayramlarımızla
bağlı mərasim keçirərkən, yaxud hansısa gənclərimiz
xaricdə ailə qurmağa, nikah mərasiminə
hazırlaşarkən bununla bağlı milli geyim nümunələri
sifariş edirlər. Hiss olunur ki, azərbaycanlılar öz
tarixinə, milli geyimlərinə nəinki maraq göstərir,
hətta onu təbliğ etməyə can atırlar. Burada
müştəriyə eskizlər təqdim olunur. Bəyənilən
eskiz əsasında geyim tikilir”. Milli geyimlər tikilərkən
isə hansı parçalardan istifadə olunmasına gəlincə,
K.Vəlibəylinin sözlərinə görə, əvvəllər
xara, gülməxmərdən, üstü naxışlı
taftalardan, ipəklərdən, məxmərlərdən
istifadə olunurdu. Azərbaycan İpək Yolu üzərində
yerləşdiyi üçün dünyanın müxtəlif
ölkələrindən parçalar gətirilirdi.
“Qədim milli geyimlər tikilərkən
parça seçimi böyük olub. O vaxt
qadınlarımız Ordubad, Bakı, Şəki bölgələrində
naxışları parça üzərinə
yapışdırırdılar. Bu gün Azərbaycanda
parça problemi var. Yəni sırf milli geyim tikmək
üçün parça çətin tapılır. Hazırda
biz yeni layihələr üzərində işləyirik.
UNESCO tərəfindən bəşəriyyətin qeyri-maddi mədəni
irs siyahısına daxil edilən Novruz bayramı bu il ölkəmizdə
geniş şəkildə qeyd olundu. Həmin tədbirdə
Bakı Milli Geyim Evinin böyük sərgisi oldu. Novruz
bayramında 7 bölgə üzrə 50-dək yeni tikilmiş
milli geyim formaları nümayiş olundu. Paralel olaraq dövlət
tədbirləri üçün sifarişlər qəbul
edirik. Sonuncu dəfə Beynəlxalq Muğam Mərkəzində
Mədəniyyət və Turizm Nazirliyinin təşkil etdiyi gənclərlə
bağlı silsilə tədbirlər çərçivəsində
sərgi təşkil etdik. Orada təqdim etdiyimiz muğam
üçlüyü üçün geyim kompozisiyası
maraqla qarşılandı”. Heç şübhəsiz ki, indi
çoxları milli geyim adlarının bəzilərini
eşidəndə, onun mənasını anlamır. Ona
görə də bir sıra geyimlərimiz barədə məlumat
vermək də maraqlı olardı. Məsələn,
qadın geyimi olan çəpkən köynəyin
üstündən geyilib. Astarlı olub və belə qədər
bədənə biçimi kip olub. Yan tikişləri
“peş” adlanan çapıqla tamamlanır. Əlcək ilə
bitən qondarma qolları olub. Çəpkən əsasən
tirmə, məxmər və kəmxa parçalardan
hazırlanıb. Qadın və kişilərin geyimi
sayılan arxalıq isə bütün Azərbaycanda ən
geniş yayılmış geyimlərindən hesab edilib. Arxalıqlar
müxtəlif olurdu. Qadın arxalığı çəpkən
kimi astarlı və belə qədər bədənə kip
biçilir. Beldən aşağı hissəsinə büzməli,
yaxud qırçınlı ətək tikilib. Arxalıqlar məxmər,
tirmə, zərxara və başqa bahalı ipək
parçalardan tikilib. Sarıma, bafta, şəms, zəncirə,
qaragöz bafta, zərbafta və başqa geyim bəzəkləri
ilə bəzədilib. Ləbbadə sırıqlı və
astarlı olur. Yaxası açıq, bel hissəsi isə
bağ ilə bağlanır. Beldən bir qədər
aşağı yan tərəfində qısa
çapığı olur. Qolu dirsəyə qədər,
qoltuq altı açıq biçilir. Əsasən tirmə,
məxmər və müxtəlif zərli parçalardan
hazırlanır. Yaxası, qolunun ağzı və ətəyi
zərif baftalarla, əsasən şahpəsəndlə bəzədilir.
Eşmək isə sırıqlı hesab olunur. Əsasən
üst geyimidir. Döş-yaxa hissəsi və qoltuğunun
altı açıq, qolları isə dirsəyə qədər
biçilir. Eşmək əsasən tirmə və məxmərdən
hazırlanır. Astarına, qolunun ağzına və ətəyinə
xəz qoyulur. Eyni zamanda müxtəlif bafta və zəncirələr
tikilir. Küləcə belə qədər düz ətəyi
büzməli olan üst geyimdir. Yaxası açıq olan
külçənin uzunluğu dizə qədər olub. Qolu isə
dirsəkdən aşağı biçilib. Əsasən məxmər
və tirmədən hazırlanıb. Yaxasına, bel kəsiyinə,
ətəyinə və qollarının ağzına çox
vaxt güləbətin, muncuq ilə tikmə tikilib. Ötən
əsrin əvvəllərində qadın üst geyimlərini
daha da zənginləşdirmək yolunda bəzi addımlar
atılıb. Evdə və sənətkar karxanalarında
müxtəlif çeşidli geyim bəzəkləri-sarıma,
qaragöz, zəncirə, şahpərsənd və s.
hazırlanıb. Qızıl və gümüşdən
hazırlanmış qoza və katibi qoza düymələr
qadın geyimlərinin yaxası boyunca düzülüb. Bəzən
də köynəyin ətəyinə qızıl pullar
tikilib. Qadın geyimlərində güləbətin, muncuq,
pilək və s. tikmələr də geniş yer tutub. Qadınlar
arxalıq və ya çəpkənin üstündən
qızıl, yaxud qızıl suyuna salınmış
gümüş kəmər də taxıblar. Baş
örtükləri içərisində kəlağayı,
naz-naz və qaz-qaz ipək örtüklər çox məşhur
olub. Daha doğrusu, geniş yayılıb. Kəlağayı
Gəncə, Şəki və Şamaxı kimi ipəkçilik
mərkəzlərində geniş istehsal olunub. Kəlağayının
yeləni (haşiyəsi), bəzən isə xonçası
(ortası) basmanaxış üsulu ilə həndəsi və
nəbati naxışlarla bəzədilirdi. Bu və ya digər
şərbaflıq mərkəzinin kəlağayıları
yeləndəki ornamentlərinə görə bir-birindən
seçilirdi. Yaşlı və qoca qadınlar kəlağayını
çalma ,yaxud dingə bağlayır, cavan qadınlar və
qızlar isə örpək kimi istifadə edirdilər. Qadınlar
yas mərasimində qara, toy mərasimində isə əlvan
naxışlı kəlağayılar örtərdilər. Bu
ənənə bu gün də davam edir. Kişi geyimləri
isə üst köynək, arxalıq, çuxa, baş geyimləri,
ayaqqabı və şalvardan ibarət olub. Qeyd edək ki, xalq
geyimlərinin geniş yayılmış bu dəsti, cüzi fərqlər
nəzərə alınmazsa, bütün Azərbaycan
üçün səciyyəvi olub. Üst köynək iki növ
olur. Yaxası ortadan və yandan biçilən hər iki
növün kiçik boyunduruğu (“vorotnik”) olub. Yaxası
qaytandan olan düymə və ilgək ilə düymələnib.
Əsasən atlasdan və sətindən tikilib. Arxalıq beldən
kəsik və bədənə kip biçilib. Ətəyi
qırçın və büzməli, qolları düz, bilək
hissəyə doğru daralır. Əsasən atlas, nazik mahud,
sətin, lastik parçadan tikilir. Onun üstündən
cavanlar qayış və ya kəmər, yaşlı və
qoca kişilər isə qurşaq bağlayıblar. 1920-ci illərədək
arxalıqlar el arasında geniş işlənməkdə idi.
Arxalığın qabaq tərəfi pəncək kimi
açıq olardı. Çuxa kişi üst geyimlərindən
biridir. Belə qədər kip və astarlı, ətəyi
büzməli, yaxud qırçınlı tikilir. Kişi
baş geyimləri müxtəlif biçimli olub. Əsasən
dəridən hazırlanıb. Buxara və çərkəzi
papaq (qara, çal və mixəyi buxara dərisindən),
çobanların şələ papağı və s. Kənd
əhalisinin yoxsul təbəqələri isə motal papaq
taxardılar. Onu uzuntüklü qoyun dərisindən konus
formasında hazırlayırdılar. Əsasən
çobanlar tərəfindən taxılırdı. Buxara
papaq üçün isə dərini Buxaradan gətirirdilər.
Onları yalnız bəy zümrəsinin nümayəndələri
və həmçinin varlı adamlar taxırdı. Konus şəklində
və ya iti uclu hazırlayırdılar. Belə papaqlar həm
də şəhər aristokratiyası üçün də
xarakterik idi. Buxara papağa “Şiş papaqları” və ya “bəy
papaqları” da deyilir.
Qədimlərdən
üzü bəri hər kişinin başında börk
olması əsas şərt idi. Kişidə böyük
(papaq), arvadda isə ləçək (çərqəd)
şərafət nişanəsi sayılırdı. Papağa
və ləçəyə hörmətsizlik müqəddəslərə
və namusa hörmətsizlik sayılırdı. Buna görə
də heç vaxt kişinin papağı başından əskik
olmazdı. Hətta oğlan uşaqlarının da
özünəməxsus papaqları olurdu. Bu papaqlara “tərlik”
deyərdilər. Ancaq tərlik papaq qədər qalın
olmazdı, bir qat toxunmuş açıq qırmızı
forması olardı. Bu papaq formasının Səfəvi
hökmdarlarının “qızılbaş” ordusundan qalması
zənn edilir. Yapıncı maldar əhali və çobanlar
arasında geniş şəkildə istifadə olunan geyim
növüdü. Maldar əhali və çobanlar arasında
geniş yayılmış yapıncının
saçaqlı və saçaqsız, ağ və qara rəngli
növləri olmuşdur. Yapıncı geyim növü isə
tikişli və tikişsiz növlərə
ayrılırdı. Tikişsiz yapıncılar daha qiymətli
hesab edilirdi. Ağ rəngli, saçaqlı və tikişsiz
yapıncılardan əsasən yüksək zümrə
istifadə edirdi. Saçaqsız, həmçinin tikişli
yapıncılar elatlar, çobanlar, yoxsul əhali arasında
geniş yayılmış və bu geyim növü
“çoban yapıncısı” adlanmışdır. Başı
yağmur və soyuqdan qorumaq məqsədilə çox zaman
yapıncının arxasına yenə də keçədən
hazırlanmış başlıq (külah) tikirdilər. Yun
corablar da geniş yayılmış geyimlərdir. Əsasən
ipək və yun saplardan toxunur. Ayaqqabılara gəlincə
istər qadın, istərsə də kişilərin geydikləri
ən geniş yayılmış ayaqqabı başmaq hesab
olunub.
Qadınlar üzü
tikməli və ya uzun boğazı olan tikməli çəkmələr
də geyiblər. Aşılanmış və xam göndən
hazırlanmış kişi ayaqqabıları adətən
birrəngli və naxışsız olub. Şəhərlərdə
kişilər daha çox başmaq və nəleyin, kənd
yerlərində isə xam göndən tikilən
çarıq geyiblər. Yuxarıda qeyd edildiyi kimi Azərbaycanda
milli kişi geyimləri bölgələr üzrə o qədər
də fərqlənmir. Qadın paltarları isə
parçaların rənginə, üz arxalığına,
qol və yaxa kəsimlərinə görə bölgələr
üzrə bir-birindən fərqlənir Məsələn,
Naxçıvanın qədim qadın geyimlərində adətən
innabı, yaşıl, gümüşü rənglərə
üstünlük verilib. Geyim dəstindəki rənglər ən
kiçik detallara qədər dəqiqliklə və uyğun
çalarlarda seçilirdi. Geyim dəstinin ayrı-ayrı
elementləri güllü parçadan tikilirdisə də,
mütləq tox və sakit rənglər seçilirdi. Zərif
bəzəklər, zəncirələr və şah-pəsəndələrlə
bəzəmək, muncuqlu tikmə, burmametallarla tikmələr
və ümumiyyətlə, bütün tikmə
texnikalarından istifadə etməklə hazırlanan geyimlər
nə qədər zəngin və gözəl görünsə
də, bütövlükdə geyim dəstləri öz
ciddiliyi və ağırlığı ilə ətraf
mühitlə geyimi daşıyan arasında bir sərhədə
çevrilirdi. Tumanın ətəyi xüsusi zövqlə bəzədilirdi.
Əsas forma gümüş və muncuqlu tikmədən
istifadə edilirdi. Arxalığın və ya küləcənin
də bütün tikiş xətləri boyunca zərif bəzək
tikilirdi. Bu məqsədlə əsasən zəncirbəndlərdən
istifadə edilirdi. Muncuqlu tikmə texnikasından istifadə
edilərkən, əsasən nəbati naxışlar işlədilirdi.
Naxçıvan geyimlərinin
biçimi sadədir. Qolu düz biçilirdi. Köynək və
tumanın biçimi və tikiş texnologiyası başqa
zonalarda olduğu kimi idi. Təkcə arxalıq öz
forması ilə nisbətən fərqlənir.
Arxalığın yaxa kəsiyi çərkəndə
olduğu kimidir. Arxalıq uzun olarsa (buna küləcə
deyilir) beldən kəsik, qısa olarsa, çərkən kimi
bütün kəsilir, amma bu zaman yanlarında kəsik və
parça çıxıntısı qoyulur. Uzunqollu,
qolçaqlı arxalıqların ön yaxası bir-birindən
xeyli aralı olurdu ki, bu arxalığı da zəngin sinəbəndlər,
sərmələr, gərdənliklər və s. ilə
tamamlayırdılar. Zəngin xanımların sinə bəzəkləri
çənədən belə qədər
düzülürdü. Soyuq havalarda arxalığın qolunun
düymələri bağlanır, üstündən küləcə
geyilirdi. Qolça, Mane olmasın deyə, biləkdən
üstə qatlanırdı. Elə buna görə də,
qolçaq astar hissədə çox bəzəkli tikilirdi. Naxçıvan
geyimlərində əl işinin səliqəsi, müntəzəmliyi
yüksək texnologiyadan xəbər verir. Azərbaycan
Dövlət Tarix Muzeyində Naxçıvana aid bir neçə
qadın geyim dəsti mühafizə edilir. Buradakı bəzi
qadın geyimlərinin adları eyni olsa da onlar tikişinə
və bəzək ünsürlərinə görə
bir-birindən fərqlənir. Arxalıq gümüşü
rəngdə atlasdan tikilirdi, astarlıdır. Yanlarda 10 sm
hündürlükdə çapığı və
parça çıxıntısı olur.
Qolları düz tikilir və uzundur.
Qol ağzı və yan kəsikləri zəncirə ilə əhatələnir.
Külçə Naxçıvan zonasında geniş
yayılmış mövsümi səciyyə daşıyan
çırıqlı və astarlı qadın çiyin
geyimidir. Qolu düz və dirsəkdən bir az
aşağı, yaxası açıq biçilirdi. Bütün
kənar və tikiş xətləri boyunca çox zəngin
bəzədilirdi. Əsasən qalın məxmər və
tafata parçalardan tikilən küləcə üst
tumanın ətək bəzəyi ilə eyni cür bəzədilirdi.
Bəzək üçün müxtəlif tikmə
texnikalarından-güləbətin tikmə, məlimə,
bafta, zəncirə, qaragöz, sərmə, muncuqlu tikmə,
piləkli doldurma və s. istifadə edilirdi. Naxçıvan
geyimləri içərisində müxtəlif tuman növləri
olub. Tumanın ətəyinə başqa parçadan 10,5 sm
enində qat payı tikilir. Tumanın ətəyi burma
gümüş, zəngirə, toz muncuq və piləklə bəzədilir.
Naxçıvanda sadə pilələrdə qadınlar 2
yaylıqdan istifadə edirlər. İmkanlı ailələrdə
isə alt yaylığı araxçın əvəz edirdi.
Sadə ailələrdə başa bağlanan qəşbəndin
(çarqatın) üstündə kəlağayı
bağlanırdı. İmkanlı ailələrdə bəzəkli
arxaçın və ya qızıl-gümüş
başlıqlardan istifadə edilirdi. Yaylıq bunlara xüsusi
qiymətli baş sancağı vasitəsilə bərkidilirdi.
Belə ailələrdə boğazı çox vaxt
yaylıqla deyil, qızıl boğazaltının asma silsilələri
ilə örtürdülər. Bu halda başlığa və
ya araxsına bərkidilmiş zərif örpək sərbəst
olaraq arxaya atılır. Naxçıvana aid kişi geyimləri
içərisində Azərbaycanın digər zonalarında
olduğu kimi arxalıq, quşqar, şalvar, çuxa,
kürk, peşə səciyyəli yapıncı, dəri,
keçə və müxtəlif parçalardan hazırlanan
baş geyimlərindən-papaq, təskülah, börk və
s. istifadə olunub. Milli geyimlərimiz həm də milli dəyərlərimizdən
sayılır.
Milli geyimlərimizi geyməsək
də, tarixini, geyim növlərini öyrənməliyik ki,
sabah musiqimiz, mətbəximiz kimi, onu da
“qonşularımızın” mənimsədiyini görəndə
təəccüblənməyək.
P.SULTANOVA
525-ci qəzet.- 2011.- 12 aprel.- S.6.