Məhəmməd peyğəmbərin mövludu günü qeyd edilib

Aprelin 17-də şərqşünas Seyid Camal Əzimbəylinin təşkilatçılığı ilə Məhəmməd peyğəmbərin mövludu günü ilə bağlı tədbir düzənlənib. Tədbirdə ilk olaraq, Qurani-Kərimdən ayələr oxunub. Daha sonra çıxış edən Türkiyəli professor Akif Köten bildirib ki, Məhəmməd peyğəmbər öz həyatı və əxlaqı ilə insanları bir örnək olub. Onun sözlərinə görə, Həzrəti Məhəmmədin Allah tərəfindən seçilməsi və peyğəmbər olaraq göndərilməsi təsadüfi olmayıb: “Allahın insanlar içərisindən peyğəmbər seçməsi bizlərə bir nemətdir. Həzrəti peyğəmbərimizi özünə örnək edənlər əsas üç məsəlin diqqətdə saxlamalıdırlar: Allaha və axirətə inanmaq və böyük yaradanı tez-tez anmaq. Bizlər peyğəmbərimizin həyatını bir müsəlman öyrənməliyik, eyni zamanda uşaqlarımıza anlatmalıyıq. Təsadüfi deyil ki, İslamda hər bir müsəlman biri-birinə qardaş və yaxın hesab edilir. Bu məsələ Qurani-Kərimdə geniş əks olunub. Amma təəssüflər olsun ki, xarici qüvvələrin təhriki ilə İraqda, Əfqanıstanda, Pakistanda və digər müsəlman ölkələrində məzhəb ayrıseçkiliyi özünü açıq şəkildə büruzə verir. Hətta bir müsəlman digər müsəlmanın ibadət etdiyi məsciddə terror həyata keçirir. İslam bu əməli qətiyyən qəbul etmir”. C.Əzimbəyli bildirib ki, dini tolerantlıq Azərbaycanda hər zaman yüksək səviyyədə müşahidə olunur. Onun sözlərinə görə, din-dövlət münasibətləri dövlət tərəfindən tənzimlənir. Bu məsələdə ölkədəki inanclı insanların da böyük rolu var: “Biz dindar olaraq, hər zaman dövlətin bu siyasətini dəstəkləmişik. Eyni zamanda inanclı insanlar Azərbaycanı xarici emissarların dəstəyi ilə qarşıdurma yaratmaq istəyən qüvvələrin qarşısını almağa müvəffəq olur. Dövlətimizin müstəqilliyini dəstəkləyən inanclı insanlar heç vaxt Azərbaycanı İraq və digər ölkələrdəki kimi qan gölünə çevrilməsinə imkan verməyəcək. Belə tədbirlərində əsas məqsədi müsəlman bacı və qardaşları bir araya gətirməkdir. Bu tədbirlərin təşkil olunmasında verdiyi dəstəyə görə Rusiyada yaşayan azərbaycanlılara, xüsusən ağcəbədilələrə təşəkkürümü bildirirəm”. Qeyd edək ki, tədbirdə Türkiyənin Azərbaycandakı Böyük Elçiliyinin təmsilçiləri, şəhid ailələri və Qarabağ müharibəsi veteranları iştirak ediblər.

BƏXTİYAR

525-ci qəzet.- 2011.-19 aprel.- S. 2.