Varşavadakı XI Mədəniyyət və Poeziya Festivalında Azərbaycan uğurla təmsil olunub

Aprelin 11-dən 17-dək UNESCO-nun dəstəyi ilə Polşanın paytaxtı Varşavada XI Mədəniyyət və poeziya festivalı keçirilib. Festivalda Azərbaycanı Akademik Opera və Balet Teatrının solisti, əməkdar artist Gülüstan Əliyeva, aşıq Sevil Xıdırova və şair Elçin İsgəndərzadə təmsil edib. Festivalda Gülüstan Əliyevaya BMT-nin təsis etdiyi “İncəsənətdə xidmətinə görə” nominasiyasında qızıl medal təqdim olunub. APA-nın məlumatına görə, mükafatları mətbuat nümayəndələrinə təqdim etmək üçün festival iştirakçıları bu gün tədbir keçirib. G.Əliyeva qeyd edib ki, bu festivala dünyanın 20-dən çox ölkəsindən sənətçilər qatılıb. Ancaq Azərbaycan bu festivalın fəxri qonağı olub. Azərbaycan sənətçiləri 6 gün ərzində Varşava və ona yaxın şəhərlərdə konsert proqramı ilə çıxış ediblər: “Bütün konsertləri “Azərbaycan” mahnısı ilə başlamışıq. Çıxışlarımız çox böyük maraqla qarşılandı. Festivalda Azərbaycanın Polşadakı səfirliyinin təşkilatçılığı ilə iştirak etdik”. Festivalın ən yüksək mükafatı olan “Kəhrəba” ödülünə layiq görülən Elçin İsgəndərzadə də bildirib ki, tədbir çərçivəsində “Mənim taleyimin ulduzu” kitabının Aleksandr Nabrodski tərəfindən polyak dilinə tərcümə olunmuş versiyasının da təqdimatı keçirilib.

525-ci qəzet.- 2011.-19 aprel.- S. 7.