Vəli Məmmədovun 80 illik yubileyi qeyd edilib

Ötən həftənin bazar günü “Yardımlı Xeyriyyə Cəmiyyəti” İctimai Birliyinin təşkilatçılığı “Retro şam” restoranında tanınmış ictimai-siyasi xadim Vəli Məmmədovun 80 illik yubileyi ilə bağlı tədbir keçirilib.

Tədbirdə çıxış edən birliyin sədri Elman Eldaroğlu ilk olaraq qurumun məqsədlərindən, gördüyü işlərdən danışıb. O, rəhbərlik etdiyi təşkilatın aztəminatlı insanlara yardım etdiyini diqqətə çatdırıb. E.Eldaroğlu tanınmış ziyalılarımızın haqqında müntəzəm olaraq tədbirlər təşkil etdiklərini də qeyd edib. Daha sonra V.Məmmədovun 80 illik yubileyi ilə bağlı tanınmış ictimai-siyasi xadim haqqında lentə alınmış “millətin vəlisi” sənədli filmi nümayiş olunub.

Milli Məclisin şöbə müdiri İbrahim Yusifzadə V.Məmmədovun böyük bir şəxsiyyət olduğunu diqqətə çatdırıb: “Onunla ömrünün son illərində tanış olduğum üçün çox təəssüflənirəm. Elə bir şəxsiyyəti daha öncə tanısaydım lap yaxşı olardı. Çünki Vəli Məmmədov hər zaman sözünü deyən, millətinin, xalqının mənafeyinə xidmət edən bir şəxs idi. O, millətin marağını öz şəxsi məqsədlərindən hər zaman üstün tuturdu. Çox sevindirici haldır ki, Azərbaycanın tarixində belə bir şəxsiyyətin izi olub”. Milli Təhlükəsizlik Nazirliyinin təqaüddə olan general-mayoru Yasif Nəsirli V.Məmmədovla çox yaxın münasibətinin olduğunu bildirib. O, V.Məmmədovun böyük bir şəxsiyyət olduğunu söyləyib: “Belə bir dostu itirdiyim üçün çox heyfsilənirəm. Fikrimcə, o, böyük bir tədqiqatçı, ictimai-siyasi xadimdir. Vəli Məmmədov hər zaman xalqını düşünürdü. Məhz elə bunun nəticəsi idi ki, ömrünün sonuna qədər xalqına ləyaqətlə xidmət etdi. O, hələ sovet vaxtı belə millətçi adam idi. millətin maraqlarını ifadə etmək üçün heç nədən, heç kimdən, hətta ölümdən belə çəkinmirdi. Onun bir çox tədqiqatları da var idi. Belə bir şəxsin tariximizdə yeri olduğu üçün çox sevinirəm”.

Qeyd edək ki, V.Məmmədov uzun müddət vəzifələrdə çalışıb. O, son olaraq millət vəkili idi və 1991-ci il noyabrın 20-de Xocavənd rayonunun Qarakənd kəndi üzərində “Mi-8” vertolyotunun vurulması nəticəsində dünyasını dəyişib. Vertolyotun vurulması nəticəsində Azərbaycanın bir çox dövlət xadimləri və jurnalistlər həlak olublar. Həlak olanlar arasında dövlət katibi Tofiq İsmayılov, baş prokuror İsmət Qayıbov, dövlət müşaviri, sabiq daxili işlər naziri Məhəmməd Əsədov, millət vəkilləri və başqa şəxslər olub.

AQİL

525-ci qəzet.- 2011.- 26 aprel.-S.2.