“Azərbaycanda Turizmin İnkişafı” mövzusunda seminar keçirilib

M.S.Ordubadi xatirə muzeyi Səbail rayon MKS-nin 2 saylı filialı (keçmiş M.Seyidzadə adına Şəhər Uşaq Kitabxanası) ilə birgə “Azərbaycanda Turizmin İnkişafı” mövzusunda seminar gerçəkləşib. Tədbiri giriş sözü ilə açan kitabxananın direktoru Rəhilə Rzayeva seminarda iştirak edənləri salamlayıb və seminarın keçirilmə zərurətlərini dilə gətirib. Direktor 2011-ci ilin “Turizm ili” elan edilməsini ölkəmizdə turizmin inkişafı istiqamətində atılan addımların bariz nümunəsi olduğunu qeyd edib. Daha sonra, M.S. Ordubadinin xatirə muzeyinin elmi işçisi Vəliyeva İradə xanım çıxış edərək öz məruzəsində muzeyin fəaliyyəti ilə tədbir iştirakçılarını yaxından tanış edib. Bakı Şəhər Mədəniyyət və Turizm İdarəsinin informasiya və turizm şöbəsinin əməkdaşı Günel Məmmədova “Azərbaycanda Turizm” mövzusunda məruzə ilə çıxış edərək bu sahədə dünya təcrübəsinə də nəzər salıb. Azərbaycanın müstəqillik əldə etdikdən sonra xarici iqtisadi siyasətində bu sahəyə böyük əhəmiyyətindən danışan məruzəçi bunu ölkəmizin məxsus olduğu mədəni-milli irsin zənginliyi, sahib olduğumuz yeraltı və yerüstü sərvətlərimizlə əlaqələndirdi: “Müstəqilliyimizə nail olandan sonra sahib olduğumuz zənginliklər ölkəmizdə turizm sahəsinin yetərincə inkişafına şərait yaratdı. XXI əsrin əvvəllərində bu sahə daha böyük vüsət aldı. Turizm haqqında Azərbaycan Respublikasının 1999-cu il 4 iyun tarixli qanunundan sonra dövlət proqrammı qəbul edildi. 2001-ci ildə Ümumdünya Turizm Təşkilatı yaradılması Azərbaycana daha geniş praktika qazandırdı. Ölkəmizdə Mədəniyyət və Turizm Nazirliyinin və Azərbaycan Turizm İnstitutunun yaradılması bu sahəyə olan önəmdən xəbər verir. Bu gün beynəlxalq təşkilatlarda Azərbaycan öz layihələri ilə çıxış edir. Turizm şirkətlərinin yaradılması, mehmanxanaların tikilməsi, turist marşrutlarının istifadəsi turizm sahəsinin yetərincə inkişafından xəbər verir”. Ölkəmizin neft sahəsində bütün dünyada tanındığını dilə gətirə məruzəçi Azərbaycanın təkcə bu sektorda deyil, həm də potensiallı turizm bölgəsi kimi tanınması üçün hərtərəfli imkanlara sahib olduğunu nəzərə çatdırıb: “Azərbaycanın iqlim şəraiti, mədəni abidələrimiz, coğrafi məkan, zəngin adət-ənənəsi və mətbəxi turizmin inkişafına, turistlərin cəlb olunmasına münbit şərait yaradır”. Məruzəçi ölkəmizi bu sahədə təbliğ etmək üçün bukletlərin, xəritələrin də əhəmiyyətindən danışıb: “Ölkəmizi əks etdirən bukletlər, xətirələr, kitablar bu cəhəddən çox əhəmiyyətlidir. Kitabxanaların da bu sahədə böyük əməyi əvəzsizdir”.

Qeyd edək ki, kitabxanada turizmlə bağlı buklet və nəşrlərdən ibarət guşə yaradılıb.

HÜSNİYYƏ

525-ci qəzet.- 2011.- 27 aprel.- S.7.