Azərbaycanın Kukla Teatrı Mərakeşdəki festivalda birincilik qazanıb

Mərakeş Krallığının Taza şəhərində keçirilən XII Beynəlxalq Teatr Festivalı başa çatıb. Festivala Asiya, Avropa, Afrika və Amerika qitələrindən 11 uşaq teatrı qatılıb. Azərbaycan isə festivalda Abdulla Şaiq adına Dövlət Kukla Teatrı tərəfindən təmsil olunub. APA-nın məlumatına görə, teatrın truppası festivalda Nizami Gəncəvinin “Xeyir və Şər” tamaşası ilə çıxış edib. Böyük maraqla qarşılanan bu tamaşaya görə Kukla Teatrı festivalda birinci yeri qazanıb. Teatr diplom və pul mükafatı ilə təltif olunub.Festivalda II yerə Mərakeş, III yerə isə İraq uşaq teatrları layiq görülüb.

525-ci qəzet.- 2011.- 29 aprel.- S.7.