“Deyək, yoxdur
bu şəhərdə...”
...Bircə
dəfə onun adının qarşısına
“tanınmış telejurnalist” ifadəsi yazdım, düz
üç gün “Zeytun” kafesində içdiyimiz pürrəngi
çayı burnumdan gətirdi... Az qalmışdı, məni
məhkəməyə versin; bu ifadəni hansı əsasla
onun imzasına “yapışdırdığımı”
sübut etməli idim. Çox çətinliklə məsələni
yoluna qoymaq mümkün oldu... Əslində, məni haqq-ədalət
divanından çağdaş cəmiyyətimizin biganəliyi
xilas elədi. Onun “tanınmış telejurnalist”
adlandırıldığı qısa xəbər, deyəsən,
heç kimin diqqətini çəkməmişdi. Yoxsa kimsə
onun özünə və ya xəbəri yayanlara zəng edib,
bu “tanınmışlığın” hesabını sora bilərdi.
Hər halda o özü belə fikirləşirdi...
Yaxşı qurtardıq...
Əslində,
bu tanınmışlığı qəbul edən təkcə
mən deyiləm. Hətta çox nüfuzlu qələm
sahiblərindən birinin onun adını sovet
dövrünün ən populyar qəzetlərindən olan “Azərbaycan
gəncləri”nin sonuncu mogikanları sırasında çəkdiyini
öz gözümlə oxumuşam. Amma həmin o nüfuzlu qələm
sahibi də unudubmuş ki, peşəkarlığına
yüksək qiymət verdiyi bu jurnalist heç vədə “Gənclər”in
ştatlı əməkdaşı olmayıb. Sadəcə,
özünün çox maraqlı, oxunaqlı yazıları
ilə qəzetin səhifələrində və oxucuların
qəlbində özünə elə möhkəm yer eləyib
ki, belə şərəfli yeri ştatlı əməkdaşların
əksəriyyəti yatıb yuxuda da görə bilməyib.
Deyəsən,
yenə yuxarıdan getdim... Birdən yenə inciyər ki, məni
çox tərifləyibsən. Amma yox... Doğrudan da, belə
olub! Ötən əsrin 80-ci illərinin itiyaddaşlı
jurnalistlərindən və qeyri-jurnalistlərindən
soruşun, təsdiq edərlər.
Mən
onun tələbə vaxtını xatırlayıram...
Yaşca çox gənc olan qiyabiçi tələbələrin
əksəriyyəti kimi mən də “jurnalistika”da (o
vaxtkı ADU, indiki BDU) əyani oxuyanlara həsəd
aparırdım. Hər dəfə sessiyaya gələndə
auditoriyalarda və dəhlizlərdə “əyanilər”in bizə
bir qədər yuxarıdan baxdığını hiss etməyə
bilmirdim. Düşünürdüm ki, bəxtəvərlər,
ilboyu müəllimlərlə ünsiyyətdə olur, hər
gün kitabxanalara gedib saatlarla oxuyub-öyrənir,
paytaxtdakı nüfuzlu qəzet-jurnal redaksiyaları ilə
müntəzəm əlaqə saxlayır, adlı-sanlı
jurnalistlərlə görüşür, üstəlik,
fakültənin divar qəzetlərini buraxmağa da vaxt
tapırlar. “Ax, nə bunların yerinə olaydım”, – deyirdim
ürəyimdə. Əyanidən qiyabiyə keçmək o
qədər çətin olmasa da, qiyabidən əyaniyə
adlamaq müşkül işi idi və bu
müşkülü asan eləməyə mənim imkanım
çatmazdı...
Bəxtəvər
sandığım həmin tələbələrdən biri də
o idi... Çiynindən uzun qayışlı meşin
çanta asması, indiki Əlyazmalar İnstitutunun
binasının arxasında yerləşən fakültənin
darısqal həyətindən aram-ahəstə addımlarla, ətrafına
məhəl qoymadan bəzən tək, bəzən də ən
yaxın dostları ilə keçib getməsi yadımda
qalıb... Bu sarışın, amma qaraqabaq gənclə şəxsi
tanışlığım olmasa da, kimliyindən xəbərim
var idi...
Sonralar
biləcəkdim ki, o, hələ əsgərlik çəkərkən
“samosval” maşının sükanı arxasındaca o qədər
də yaxşı bilmədiyi rus dilində məqalələr
yazaraq, ordu qəzeti ilə sıx əməkdaşlıq
etmiş və buna görə də hərbi hissədə
xüsusi hörmət və “toxunulmazlıq” haqqı
qazanıbmış... Özü etiraf etməsə də, mən
Sovet Ordusundakı xidmət təcrübəmə əsaslanaraq
deyə bilərəm ki, yazmaq-pozmağı bacaran,
“demaqoq”luğu olan əsgərdən komandirlər bərk
çəkinirdi. Amma özünün etiraf elədiyi bir fakt
var: nümunəvi xidmət göstərib, çoxmilyonluq
ölkənin yeganə yiyəsi olan Kommunist Partiyası
sıralarına keçməyi arzulayıb ki, o da ikiillik xidmət
müddətində alınmayıb. Həmin dövrdə gələcək
karyera üçün böyük əhəmiyyət
daşıyan bu amildən – partiya üzvlüyündən
hansı qazancı güdürmüş, deyə bilmərəm.
Hər halda o, sovet hakimiyyətinin süqutunu sıravi jurnalist
kimi qarşılayıb və parlament müxbiri kimi içərisində
olduğu siyasi burulğandan da müstəqil dövlətin
bitərəf vətəndaşı kimi çıxıb.
Günü bu gün də bitərəfdi, siyasətdən –
bu sözün bütün mənalarında – uzaq, adi bir
ziyalı, jurnalist ömrü yaşayır...
Mən
yazının bura qədərki hissəsini yazıb kompüterin
yaddaşına həkk etdiyim ötən ilin sazaqlı noyabr
günlərində o, Vətəndə deyildi, Amerika Birləşmiş
Ştatlarında idi. Buna görə də
yazdıqlarımı e-maillə özünə göndərib,
reaksiyasını öyrənmək istədim...
Düşündüm ki, o, doğma el-obadan uzaqda, qərib
yerdədir, mənsə burda – Vətəndə oturub
bekarçılıqdan dəm vermişəm klaviaturaya, onun
haqqında ağlıma gələnləri
döşüyürəm, özü də
açıq-aşkar çap etdirib, ictimaiyyətə
çatdırmaq niyyətindəyəm. Birdən elə fakt
açıqlayaram ki, geri dönməsinə əngəl
olar...
Göndərdim...
Cavabında nə yazsa yaxşıdır? “Başım
çox qarışıq olduğundan yazını
kompüterin “my document” səhifəsinə atdım, sonra
oxuyaram, incimə”.
Qətiyyən
incimədim. Onun qərib ölkədə daha məsul və
maraqlı, milli və ictimai baxımdan gərəkli işlərlə
məşğul olduğunu, həmin vaxtlar “lent.az” və
“vesti.az” xəbər portallarında dərc etdirdiyi
yazılardan, İctimai Televiziyanın xəbərlər
proqramına hərdən telefonla verdiyi xəbərlərdən
duyurdum... Mənim kimi ayda-ildə güclə bir yazı
qaralayan adama vaxt sərf edə bilməməsi də bu səbəbdəndir,
düşündüm...
“Hər
halda, günah məndən keçdi” – deyib, yazını
davam etdirdim ki, o qürbətdən qayıdanadək çapa
getsin... Gəlişinə sürpriz olsun... Alınmadı... Gəldi
və mən bu “məşğuliyyət”dən əl çəkidim,
özünə dedim ki, o yazını bir də sən növbəti
dəfə bu ölkədən çıxanda davam etdirəcəyəm...
O da eləmədi tənbəllik, yayın bu
cırhacırında yenə qürbətə üz tutdu...
Yəqin
ki, artıq qəhrəmanımın adını çəkməliyəm.
Qısaca
yazıram: Müsəllim Həsənov. Jurnalist,
publisist, ssenarist. Onsuz da hamısı bir anlama gəlir...
Bircə nə çatışmır?
Onun peşəkarlıq səviyyəsini özündə
ehtiva edəcək “tanınmış”, “məşhur”, ən
azı, son vaxtlar gen-bol yayılmış “əməkdar”
sözü ki, bunlardan ikisini yazmağa özü razı
olmaz, üçüncüsünə isə rəsmiyyət
icazə vermir.
Bəlkə elə bu məqamdan başlayım? Hazırda fəaliyyətdə
olan “əməkdar”lardan elələri var ki, onları yaş,
yaradıcılıq və peşə stajına görə,
uzağı, “gənc və perspektivli” adlandırmaq olar.
Amma peşəsinə, millətinə və
dövlətinə sədaqətli, fədakar xidməti ilə
daim fərqlənən, həmkarları arasında yetərincə
nüfuzu olan elə jurnalistlər də var ki, dövlət təltiflərinə
təqdim ediləcəyinə heç güman da yoxdur... Çünki onlar kiməsə ağız
açmaz, necə deyərlər, özlərini yada salmazlar.
Müsəllim də onlardan biridir...
Onun əlli yaşını necə səssiz-küysüz
yola saldığını xatırlayıram. Müntəzəm
görüşdüyü, ünsiyyətdə olduğu ən
yaxın həmkarları, dostları belə bu hadisənin nə
vaxt baş verdiyini bilməyiblər. Üstündən
daha bir neçə il keçib... Bir sətir
də yazılmadı heç yerdə... Daha doğrusu, yazdırmadı!
Ən azı, bir müddət fəal jurnalistikadan
uzaqlaşaraq şou-biznesin tamadalar zümrəsində
özünü tapan və çayxana görüşlərində
hər dəfə armudu stəkanı mikrofonsayağı sinəsinin
təninə qaldırıb onun şəninə təriflər
qoşan dostuna desəydi, yetərdi... O adam bütün
istedadını sərf edib 3-5 vərəqlik
bir yazı qaralayar, 5-6 redaksiyanın qapısını döyərdi
və o redaksiyalarda işləyən bəzi nüfuzlu
jurnalistlər də bilərdilər ki, Müsəllim Həsənov
əlli yaşını yola salır.
Mən də yubileyin tarixini çox gec bildim. Onda da yenə
özü Bakıda deyildi. Hansısa xarici
ölkəyə uzunmüddətli səfərə
getmişdi. Həmin tamada dostu da burda onu xəbər
alanlara elə ölkəni nişan verirdi
ki, eşidənin dərhal dodaqları qaçırdı.
Sözün düzü, mən bunu biləndə çox əsəbiləşdim
və o şəxsə ismarıc göndərdim ki, dilini dinc
qoysun, adam yad yerdədirsə, o ölkənin
uzaqlığını, ordakı qeyri-adi heyvanların (kenquru
olsa belə!) qəribəliyini xüsusi vurğulamaqla şayiə
yaymazlar (hətta zarafatla da!), təki gedən adamın qəlbində
vətən sevgisi olsun...
Özü
geri dönəndə isə, o adamı yox, məni məzəmmət
elədi, həmin ismarıca görə... Heç
demə, həmin şəxs onun qürbətdəki fəaliyyətinin
konfidensiallığını təmin etmək
üçün bu şayiəni yayırmış. Əlli
yaşının tamamı da, ehtimal ki, məhz elə həmin
dövrə düşmüşdü...
Nə isə...
Hələ o vaxt onun haqqında nəsə
yazmaq istəyirdim. Sərlövhəsini də
düşünmüşdüm. Çox istedadlı
müğənnimiz Tünzalənin həzin bir nəğməsindəndir
bu misra: “Deyək, yoxdur bu şəhərdə...” O vaxt
çox dəbdə olan mahnı idi... Mahnının
motivi ilə mənim qəhrəmanımın həyatı,
ictimai durumu və yaradıcılığı arasında
heç bir oxşarlıq olmasa da, hər onu eşidəndə
mən özüm vaxtilə keçirdiyim qəriblik hissini təzədən
yaşayırdım.
...O
mahnının təsiri altında fürsəti fövtə
verdim. Müsəllim qayıdıb gəldi, öz işinə-gücünə
davam elədi, yenə bir neçə maraqlı televiziya filmi
çəkdi, ara-sıra fövqəladə maraqlı
yazılar çap etdirdi – məsələn, rəhmətlik
xalq şairimiz Bəxtiyar Vahabzadə ilə bağlı xatirələri
kimi...
Axırı
mən əlli yaşının tamam olması faktını
açıb-ağartmamasının mənasızlığını
bir gün onun üzünə vurub, haqqında yazı yazmaq
niyyətinə düşdüyümü, amma mahnıya uyub
vaxtı ötürdüyümü dedim. Dedim ki, heç
olmasa, mahnıya qulaq as, gör, necə kövrək
melodiyası və ürək titrədən sözləri
var, adamın qəriblikdəki halı ilə nə qədər
həmahəng səslənir?! Daş qəlbli adam
nə mahnıya qulaq asdı, nə də əlli
yaşını qeyd eləməmiş uzaq, qərib ölkəyə
getməsinin səbəbini açıqladı...
Mən özümü musiqi bilicisi kimi qələmə
verib, hətta vaxtilə məşhur “Qarabağ bülbülləri”
ansamblında tar çaldığımı xatırlatdım
və onu musiqi duyumu olmamaqda ittiham elədim. O da həmyerlisi rəhmətlik
Mais Salmanovun vaxtilə Ağdamda musiqi texnikumunun direktoru kimi
qarabağlılara dərs keçdiyini vurğuladı və
bir müddət sonra da eşitdim ki, gedib arxivlərdən
Qarabağ xanlığının tarixi ilə bağlı
materiallar toplayır.
Birinci arqumenti, əslində, o öz musiqi duyumunun zəifliyini
ört-basdır etmək üçün gətirirdi. Və mənim buna, sadəcə,
gülməyim tutdu...
Amma ikinci məsələ – yəni Qarabağın
tarixini dərindən öyrənməyə
çalışması məni onun qarşısında aciz
duruma sala bilərdi. Saldı da... Sonralar hər görüşəndə
Qarabağ tarixinə dair elə yeni, maraqlı faktlardan
danışır ki, dinməzcə qulaq asmaqdan başqa
çarəm qalmır... Topladığı
materiallardan bir və ya bir neçə sənədli filmə
ssenari çıxara biləcəyinə şübhəm
yoxdur.
Elə buradaca Müsəllim Həsənovun telessenarilərinin
ekran həyatının uğurlu olduğunu qeyd etməliyəm. “Lider”də,
indi də İctimai TV-də onun ssenarisi əsasında çəkilmiş
çoxsaylı sənədli filmlər bunu təsdiqləyir.
İctimai Televiziyanın Milli Qəhrəman
Mübariz İbrahimov haqqında geniş əks-səda
doğurmuş filmini xatırlayıram.
İctimai TV-nin daha bir layihəsinin – “Bakı vaxtı”
silsiləsindən olan verilişlərin ssenari müəllifi
kimi Müsəllim Həsənov paytaxtımızın tarixinə
də çox maraqlı prizmadan baxmağı bacarır. İndiyədək
tamaşaçılar bu silsilədən “İsmailiyyə”
binasının, indiki İstiqlaliyyət küçəsinin,
Filarmoniya binasının tarixi haqqında arxiv sənədləri
əsasında hazırladığı teleoçerklərə
baxıblar... Özündən eşitdiyimə
görə, bu silsilədən daha maraqlı verilişlər
hələ qabaqdadır.
Müsəllim Həsənovun yazdığı ssenarilərin
mükəmməlliyi, mətnin dolğunluğu, səlisliyi və
təsirliliyi diqqəti cəlb edir. Birgə işlədiyi rejissorlar –
canlı korifey Eldar Quliyev də, gənc və istedadlı
Orman Çingizoğlu da bu fikrə şərik
çıxarlar, məncə...
Müsəllim
telejurnalistikaya bir az gec gəlib – bunu da deməliyəm.
Amma güclü və iddialı gəlib: nəşriyyat
işində və qəzetçilikdə qazandığı
zəngin təcrübə, qanunçuluğun dayağı
olan mühüm bir dövlət qurumunda
görüb-götürdükləri, üstəgəl,
Tanrının yalnız seçkin bəndələrinə bəxş
etdiyi yaradıcılıq istedadı ona çağdaş
efir məkanında önə çıxmaq üçün
imkanlar açır.
Yenə
“amma” yazmalıyam... Yazmıram... Televiziya mühitindən xəbərsiz
olanlara isə xalq yazıçısı Çingiz Abdullayevin
“Vampirlər güzgüsü” detektiv romanını
oxumağı məsləhət görürəm...
Yeri deyilsə
də, deyim: teleefirdən fərqli olaraq, nəşriyyat və
qəzet redaksiyalarında istedadlı adamın təvazökarlığı
onun yaraşığıdır. Yazır və
ya redaktə edir – qabiliyyətini və başqalarından
üstünlüyünü asanca göstərə bilir.
Efir materiallarının hazırlanması isə çoxheyətli
bir işdir və burda əvvəlcə gərək
döşünə döyməyi bacarasan... Bu
qabiliyyətinlə heyətdəki ən istedadlı adamı
da əzib, irəli çıxa bilərsən. Məni
telemətbəxdən xəbərsizlikdə
günahlandırmağa tələsməyin...
Gördüyümü görmüşəm, eşitdiyimi
eşitmişəm, bildiyimi də bilirəm... İndinin
özündə də teleaparıcılar arasında bərkgedənlərdən
sayılan birisinin “əlinin altında” saxladığı
istedadlı, amma təvazökar jurnalistə, hətta, Türkiyədən
zəng vurub, bir neçə dəqiqə sonra başlayacaq mətbuat
konfransı üçün suallar hazırlayıb telefonla təcili
surətdə ona diktə etməsi barədə
tapşırıq verdiyinin şahidi olmuşam. O təvazökar
həmkarıma “qardaş, quyuya su tökməklə quyu sulu
olmaz” dediyimi də yaxşı xatırlayıram. Amma həmin
quyu hələ də “fontan” vurur...
Çox uzağa getdim yenə. Uzağa getmişkən, ötən
əsrin səksəninci illərinin düz ortasında Müsəllimin
jurnalistika fakültəsindən təyinatla birbaşa “Azərnəşr”ə
işə getməsini, rəhmətlik Əjdər Xanbabayev
kimi nüfuzlu bir naşirlə, Cəmil Əlibəyov kimi
sanballı yazıçı-publisistlə tanış
olmasını, öz redaktorluq istedadı ilə qısa
müddət nəinki onların, həm də xalq şairi Bəxtiyar
Vahabzadənin diqqətini cəlb etməsini tarixi fakt kimi nəzərə
çatdırmalıyam. Bu fakta – iş təcrübəsi az olan gənc jurnalistin çox böyük
söz adamının kitabına redaktorluğun öhdəsindən
bacarıqla gəlməsinə, indi hər yazısı redaktəsiz-filansız
çapa və ya efirə gedən bəzi iddialı cavanlar
rişxənd etməsinlər. Redaktəsiz
yazı – duzsuz şorbadır. Təəssüf ki, indi əksər
nəşrlərin menyüsünu məhz bu “xörək” bəzəyir...
Özü də qıpqırmızıca deyirlər: yesən
də budur, yeməsən də!..
Mənim
fikrimcə, tale Müsəllimə yuxarıda adlarını
sadaladığım çox nüfuzlu və böyük
ziyalılarla, bu gün də mətbuatda söz sahibliyi tam qəbul
edilən Şakir Yaqubov, Taleh Həmid (yeri gəlmişkən,
Müsəllimin o vatkı “Yeni Fikir” qəzetindəki fəaliyyəti
və maraqlı yazıları barədə ayrıca
danışmaq olardı!) kimi ustad publisist və redaktorlarla
işləmək xoşbəxtliyi nəsib edib. Jurnalistikaya gəldiyi ilk gündən o özü
üçün müəyyənləşdirdiyi
yaradıcılıq və peşə əxlaqı prinsiplərindən
heç vaxt uzaqlaşmayıb. Bunlar dürüstlük,
dəqiqlik, işgüzarlıq, səmimiyyət, ədalətlilik,
özünə və başqalarına hörmət, haqqa, həqiqətə
xidmət və digər müsbət keyfiyyətlərdir...
Bir məqamı mütləq qeyd etməliyəm: Müsəllimin
mənsub olduğu və mənim indi adını qoymağa
çətinlik çəkdiyim jurnalistika cərəyanının
nümayəndələri öz istedadlarını heç
vaxt paparatsiciliyə və sensassiyaçılığa sərf
etməyiblər, onlar cəmiyyətə yalnız
özünü tanımaq, keçmişini bilmək, gələcəyini
müəyyənləşdirmək imkanı verən
informasiyanı çatdırıblar və indi də bu
işi fədakarlıqla yerinə yetirməkdədirlər.
Mən
onun haqqında gecikmiş bir yubiley yazısı hazırlamaq
istəyirdim... Belə yazılara xas olan gen-bol bioqrafik məlumatlar
vermək, yaradıcılıq yolu barədə ətraflı
söz açmaq, gözəl bir ailə
başçısı kimi səciyyəvi xüsusiyyətlərindən
danışmaq niyyətim vardı...
Amma, nə
edim, bu cür alındı...
Yaxşı
ki, böyük rəğbət bəslədiyim
şair-publisist Tofiq Abdinin “525-ci qəzet”də
apardığı həftəlik “Yazar ailələr”
rubrikasının avqust ayının əvvəlindəki
buraxılışının qonaqları Müsəllim və
onun həyat yoldaşı, pedaqoq-tərcüməçi
Şəhla xanım oldular. Mən bu pərakəndə
sicilləməmin o maraqlı müsahibəyə əlavə
hesab edilməsi təmənnasındayam.
Və
sonda... Müsəllim Həsənovun təvazökar,
özünü gözə soxmağı sevməyən (hətta
bunu bacarmayan!!!) adam olduğunu deyib, bəlkə
də özünün indi unutduğu bir əhvalat
danışacağam. Baş Prokurorluğun Mətbuat xidmətinin
rəhbəri işlədiyi vaxtlarda bu xasiyyətinə bələd
olan tələbəlik dostlarından biri ona “məsləhət”
verib: hansı prokuroru işdən çıxarsalar, eləcə
bir-iki nəfərin qulağına pıçılda ki, bunu
mən eləmişəm. Qoy başqaları da
eşidib səndən çəkinsinlər. Bilmirəm,
xarakterinin ziddinə gedib, belə “məsləhət”ə əməl
etsəydi, nəyə nail ola bilərdi?..
Amma bilirəm ki, hazırda prokurorluq orqanlarında xidməti fəaliyyətini
davam etdirən və etdirməyən keçmiş iş
yoldaşları indi də onunla rastlaşanda səmimiyyətlə,
xətir-hörmətlə görüşürlər. Amma
bir fakt da var: Müsəllim Həsənov prokurorluqdakı
iş prosesində “əxz etdiyi” sirr saxlamaq,
konfidensiallığa riayət etmək xüsusiyyətini tərgitmək
barədə heç düşünmür.
Və qəfildən
görürsən ki, yenə yoxdu bu şəhərdə...
Elşən ƏLİYEV
525-ci qəzet.- 2011.- 20 avqust.- S.
15; 20.