75 YAŞIN TÖHFƏLƏRİ

Bu günlərdə yazıçı-dramaturq, həyatının 50 illini dövlət qulluğuna həsr eləmiş Aqşin Babayevin anadan olmasının 75 illiyi tamam oldu. Jurnalist, şair, pedaqoq, II dərəcəli dövlət müşaviri, əməkdar jurnalist, filologiya elmləri doktoru, professor-onun fəaliyyətini və yaradıcılığını bir titul, ya da bir neçə ad ilə əks etdirmək mümkün deyil. A.Babayev 30-dan çox kitabın, onlarca radio və teatral pyesin müəllifidir. Ölkəmizdə və onun xaricində oxucuların məhəbbətini qazanmış elm və ədəbiyyat xadimi A.Babayev bu gün də özünün bəhrəli yaradıcılıq yolunu davam etdirir. Azərbaycan Dövlət Mədəniyyət və İncəsənət Universitetinin “Sənətşünaslıq” fakültəsinin “Ədəbi yaradıcılıq və ekran dramaturgiyası” kafedrasına rəhbərlik edən hörmətli professoru bu təhsil ocağının Elmi Şura zalında təbrik edən Universitetin rektoru, professor Timuçin Əfəndiyev ona tər çiçək dəstəsi təqdim etdi, uzun ömür, yaradıcılıq uğurları arzuladı. Sevindirici haldır ki, Aqşin Babayevin əlamətdar yubileyi ərəfəsində onun “Nazim Hikmət qalaktikası” adlı elektron kitabı nəfis tərtibatla işıq üzü görmüşdür. 100-dən artıq fotoşəkillərin yer aldığı bu kitabda A.Babayevin Nazim Hikmət haqqında xatirələri, şairlə yaradıcılıq və dostluq əlaqələri olmuş sənət xadimləri barədə portret oçerklər, habelə müəllifin Nazim Hikmətə həsr etdiyi elmi məqalələrdən seçmə nümunələr verilmişdir. Elektron kitabın tərtibçisi Gündüz Babayev, redaktoru Sevda Əlibəyli, ön sözün müəllifi Azər Turan, rəssamı Törə Ağabəyovadır.

İntiqam

525-ci qəzet.- 2011.- 1 dekabr.- S.7.