“QHT-lərə tribuna verməklə həm obyektivliyimizi qoruyur, həm də tanıtma işi aparırıq”

SƏNAN NƏCƏFOV: “MƏQSƏDİMİZ HƏR HANSI AYRI-SEÇKİLİYƏ YOL VERMƏDƏN YAXŞI İDEYALARI DƏSTƏKLƏMƏK,VƏTƏNDAŞ CƏMİYYƏTİ İNSTİTUTLARININ İNKİŞAFINA KÖMƏK ETMƏKDİR”

Azərbaycan Respublikasının Prezidenti yanında QHT-lərə Dövlət Dəstəyi Şurasının www.qhtxeber.az informasiya portalının fəaliyyətə başlamasından 2 il keçdi. Bu münasibətlə saytın redaktoru, layihə koordinatoru Sənan Nəcəfovla görüşüb, yaşca balaca olsa da internet mediada böyük addımlar atan bu saytın yaranması, fəaliyyəti, gələcək planlar barədə söhbətləşdik. Əvvəlcə müsahibimiz barədə məlumat verərək qeyd edək ki, Sənan Nəcəfov 1975-ci ildə anadan olub. 1996-cı ildə Azərbaycan Texniki Universitetində ali təhsil alıb. 1999-cu ildə Azərbaycan Milli Elmlər Akademiyasında aspiranturanı bitirib. 2006-2009-cu illərdə isə Çexiyada magistr təhsili alıb. Uzun müddət mətbuatda, xüsusən də “Paritet”, “Yeni Azərbaycan” və “Kaspi” qəzetlərində çalışıb. 2009-cu il dekabr ayından etibarən www.qhtxeber.az internet portalında jurnalist kimi fəaliyyətini davam etdirir.

– İnternet medianın gənc üzvü sayılan qhtxeber.az portalı fəaliyyətini hansı ideyalara uyğun qurur?

–Portalımız fəaliyyətə başlayanda artıq Azərbaycan oxucusu elektron KİV-in mahiyyətindən xəbərdar idi. Bizim təmsil etdiyimiz sahə isə spesifikdir. Əhalinin bəlkə də yarısı QHT fəlsəfəsindən, vətəndaş cəmiyyəti institutlarından xəbərsizdir. Təbii ki, sektorun media ruporuna maraq da yüsək olmamalıdı. Bizim başlıca məqsədimiz sözün əsl mənasında QHT sektorunun PR mərkəzini yaratmaq, onların məlumatını ünvanına çatdırmaq, QHT təmsilçilərini cəmiyyətə tanıtmaq, fəaliyyətlərini işıqlandırmaq, bir sözlə QHT tribunası yaratmaq olub. Buna nə qədər nail olmuşuq, hansı nailiyyətlər əldə etmişik, bu başqa söhbətin mövzusudur. Qazandığımız budur ki, biz bu sahədə ən çox tanınmış, daha çox oxucusu olan xəbər portalıyıq. Amma heç vaxt iddia etmirik ki, liderik, bizdən yoxdur. Rəqabətə dözümlüyük. Təbii ki, bizim gündəlik seyrçilərin sayı digər xəbər saytlarının istifadəçilərin sayından geri qalır. Biz kriminal, şou-biznes xəbərləri yaymırıq. Yəqin ki, bu layihə sona çatana qədər də belə olacaq. Əsas odur ki, biz obyektivliyimizi və neytrallığımızı saxlaya bilirik. Amma yaddan çıxartmayaq ki, qhtxeber.az Azərbaycan Respublikasının Prezidenti yanında QHT-lərə Dövlət Dəstəyi Şurasının informasiya portalıdır. Bu portalın yaranması Şuranın qərarı ilə olub. Ümumiyyətlə Şura sədri yeniliyin, müasir texnologiyalarla işləməyin tərəfdarıdır, işin kompleks görülməsinə həmişə üstünlük verib. Azay Quliyevin rəhbərlik etdiyi Şura yarandığı qısa müddət ərzində bir çox məqamlara aydınlıq gətirdi. İlk gündən bəyan etdi ki, bizim məramımız və məqsədimiz cəmiyyətin inkişafına xidmət edən ideyaları və təşəbbüsləri dəstəkləməkdir. Bu baxımdan, Şura yanaşma tərzindən, mövqeyindən asılı olmayaraq hər bir QHT ilə vətəndaş cəmiyyətinin və Azərbaycanın inkişafı naminə əməkdaşlıq edir, cəmiyyət üçün xeyirli təşəbbüslərə maliyyə dəstəyi verir. Şuranın məqsədi hər hansı siyasi ayrı-seçkiliyə yol vermək deyil, yaxşı ideyaları dəstəkləmək, vətəndaş cəmiyyəti institutlarının inkişafına kömək etməkdir. Biz də Şuranın internet portalı olaraq, fəaliyyətimizi bu ideyalara uyğun qurururq.

– İnternet portalının qarşısında hansı məqsəd dayanıb?

–Bu suala cavab verməzdən öncə Dövlətin QHT sektoruna dəstəyinə diqqət yetirməlik. Çünki biz bu siyasətin təbliğatçısıyıq. Bu gün vətəndaş cəmiyyətinin formalaşması yoluna qısa nəzər salmaqla demək olar ki, 90-cı illərdə QHT-lərin fəaliyyət mexanizmi və təşkili prosedurlarında böyük problemlər var idisə, illər boyu davam edən qarşılıqlı səylər nəticəsində bu sahədə fəaliyyət mexanizmləri təkmilləşdirildi, baryerlər əsasən aradan qaldırıldı və bunun da bariz nümunəsi məhz 27 iyul 2007-ci ildə Azərbaycan Respublikasının Prezidenti cənab İlham Əliyevin sərəncamı ilə təsdiq olunmuş “Azərbaycan Respublikasının Qeyri-Hökumət Təşkilatlarına Dövlət Dəstəyi Konsepsiyası”nın yaranması oldu. Qeyd olunan konsepsiyanın qəbul edilməsi QHT-lərin fəaliyyətində və ümumilikdə Azərbaycanda vətəndaş cəmiyyəti quruculuğu prosesində yeni bir mərhələnin başlanğıcı kimi qiymətləndirmək olar. Çünki bu konsepsiya dövlət orqanları ilə QHT-lər arasında səmərəli əməkdaşlığa təkan verməklə, qarşılıqlı əlaqələrin inkişaf perspektivlərini müəyyən etdi. Konsepsiya vətəndaş cəmiyyəti quruculuğu prosesində Azərbaycan hökumətinin QHT-lərlə dövlət orqanlarının məhz tərəfdaş kimi çıxış etmələrini, öz səylərini əlaqələndirmələrini diqqətə çatdırır. Qeyd olunanlardan göründüyü kimi bu gün cəmiyyətimizi maraqlandıran, xalqımız üçün daha vacib olan bir sıra problemlərin həllində QHT-lər ictimai sektor adından öz səylərini göstərir. Müxtəlif istiqamətlər üzrə vəzifələrin reallaşdırılmasında münbit şəraitin formalaşdırılması üçün Azərbaycan dövləti 2007-ci ilin dekabr ayında yaradılmış Azərbaycan Respublikasının Prezidenti yanında QHT-lərə Dövlət Dəstəyi Şurası vasitəsilə ilə onlara hərtərəfli dəstək verir, o cümlədən də maliyyə yardımı edilməsi ilə bağlı öz mövqeyin birmənalı olaraq nümayiş etdirir. Biz isə bu Şuranın internet portalıyıq və məqsədimiz dövlətin yürütdüyü siyasəti təbliğ etməkdir.

–Qeyd etdiniz ki, qhtxeber.az yarananda internet media artıq öz sözünü demişdi. Belə rəqabətli mühitdə “özümüzü təsdiq etdik” deyə bilirsinizmi?

–Bizim “rəqabət”, “rəqib”lə bağlı fikirlərimiz fərqlidir. Biz oxucu sayını ona görə artırmırıq ki, sayğacda göstərici çox olsun, reklam versinlər, beynəlxalq təşkilatlar tanısınlar. Oxucu sayını ona görə artırmağa çalışırıq ki, QHT-ləri cəmiyyətə daha yaxından tanıdaq, onların fəaliyyətinin genişlənməsində yardımçı olaq, dövlətin III sektorun inkişafı ilə bağlı yürütdüyü siyasətini, Şuranın fəaliyyətinin nəyə istiqamətləndiyini daha geniş auditoriyaya çatdıraq. İşimizin əsas mahiyyəti budur. Bu cür yanaşması olan sayt və ya media-qurum varsa, onlara rəqib kimi yox, yaxın tərəfdaş, həmfikir kimi münasibət bəsləyirik.

–QHT-lərin fəaliyyəti ilə bağlı informasiyaların alınıb geniş ictimaiyyətə çatdırılmasında hər hansı çətinliklərlə üzləşirsinizmi?

–Hazırda bu yöndə heç bir problemimiz yoxdu iddiasını əminliklə ortaya qoya bilərəm. Hər gün elektron ünvanımıza QHT-lərin fəaliyyəti ilə bağlı 20-25 məlumat daxil olur. Bura əməkdaşlarımızın əldə etdiyi məlumatları da əlavə etsək informasiya əldə etmək üçün çevrəmizin kifayət qədər geniş olduğunu görərsiniz. Hazırda fəaliyyətini yüksək səviyyədə quran QHT-lərlə olduqca peşəkar əlaqələrimiz var. Hətta regionlarda fəaliyyət göstərən QHT-lərlə də əlaqə yarada bilmişik və mütəmadi olaraq onların fəaliyyətini qhtxeber.az-da işıqlandırırıq. Amma təbii ki, bununla kifayətlənmək fikirində deyilik. Elə “525-ci qəzet” vasitəsilə QHT-lərə müraciət edirəm ki, onların fəaliyyəti, gördüyü işlər, həyata keçirdikləri layihələr haqda ictimaiyyətə məlumat çatdırmaq üçün bizim hər cür imkanımız var. Yetər ki, bizimlə əlaqə saxlasınlar. Bunun üçün internetin imkanlarından yararlanmaq bəs edər. Qhtxeber.az-ın “bizimlə əlaqə” bölümündə saytla təmas qurmağın bütün yolları göstərilib. Məqsədimiz vətəndaş cəmiyyətinin inkişafında xırda töhfəsi olan hər hansı təşkilatın fəaliyyətinin diqqətdən kənarda qalmamasıdı. Üzləşdiyimiz çətinlik bəzi QHT-lərin internetin imkanlarından istənilən səviyyədə yararlanmamasıdır. Hətta layihələr həyata keçirən təşkilatlar var ki, elektron ünvanları belə yoxdu. Əməkdaşlarımız QHT-lərin fəaliyyəti ilə bağlı məlumat əldə etmək üçün həmin telefonlara, elektron ünvanlara müraciət etdikdə məlum olur ki, telefonlar səhv göstərilib, elektron ünvan isə işlək vəziyyətdə deyil. Nədənsə QHT sektorunda çalışanlar internetin onlar üçün yaratdığı imkanı hələ də lazımınca dəyərləndirə bilmirlər.

–Bir media rəhbəri olaraq QHT-media əlaqələrinin indiki vəziyyəti sizi qane edirmi?

–Bizdə QHT-lər bəzən mətbuatdan gileylənirlər. Onlar KİV-i ictimai və sosial problemləri mahiyyəti üzrə işıqlandırmamaqda qınayırlar. İndi gəlin görək, QHT sosial problem deyəndə nəyi nəzərdə tutur və əslində nə göndərirlər? Misal üçün, hansısa xəstəliklə bağlı QHT təbliğat kampaniyası aparır. Qrant ayrılıb, layihə planı tərtib olunub. Qalır aksiyanı keçirmək. Təşkilat var ki, yüksək səviyyəli, daha doğrusu bütün standartlara cavab verən layihə reallaşdırır. Planda nəzərdə tutulan bütün normalar gözlənilir. Tədbir keçirilir, məlumatlandırma sessiyası olur. Hesabat verilir və iş bitmiş sayılır. Amma təşkilat layihənin piarını qurmaq haqda fikirləşmir. Press-reliz yaymaqla cəmiyyətin məlumatlandırılmasını yetərli sayırlar. İndi baxın, QHT layihə haqda məlumat göndərir. Filan təşkilat filan layihə çərçivəsində filan qədər iştirakçını filan xəstəlik haqda məlumatlandırıb. Təxminən başlıq belə olur. Nə informasiya yükü var, nə cəmiyyəti maraqlandıracaq mövzu haqda məlumat, nə də oxucunu qıcıqlandıracaq xəbər. Təbii ki, təşkilatın mətbuata yönləndirdiyi bu cür press-reliz ən yaxşı halda redaktorun kompyuterinin “silinənlər” papkasına göndərilir. Etiraf edək ki, QHT işində ictimaiyyətlə əlaqənin qurulması bir institutun görə biləcəyi iş qədər böyük həcmlidir. Media-list, bakqraundu demirəm. Amma azından mətbuatla iş, jurnalistin sözün yaxşı mənasında ələ alınması, keçirilən tədbirin cəmiyyətin qulağına çatacaq qədər effektli səslənməsində mətbuatın rolunu qəbul etməmək, informasiya cəmiyyətində yaşamamaq kimi qəbul olunmalıdır. QHT-nin göndərdiyi məlumat da məhz qeyd edilən qəbildəndirsə, həmin informasiyanın yayılmayacağını əminliklə söyləmək olar. Bu boşluq uzun müddət mövcud olub. Biz qhtxeber.az-da bu boşluğu doldurmağa çalışırıq. Adətən QHT-lər keçirdikləri tərbirlərdən ümumi informasiya göndərirlər. Biz həmin məlumatları qəzetdə, saytda gedəcək formaya salıb yayırıq. Mətbuat bizə istinad etməsə də hazırladığımız məlumatı yayır. Bu bir növ QHT və mətbuat arasında körpü roluna bənzəyir. Əslində biz bununla böyük PR xidməti edirik. Həm QHT tanınır, həm informasiyası yayılır, həm də operativlik göstərilir. Daha bir məqam odur ki, bəzi yerli və beynəlxalq QHT-lər fəaliyyətlərini şəffaf qurmadıqlarına görə, onlardan informasiya almağın çətinliyi var. Şəffalıqdan, sərbəst informasiya almaqdan ağız dolusu danışanlar nədənsə Azərbaycandakı beynəlxalq təşkilatların fəaliyyəti ilə maraqlanmırlar.

– Əsas tərəfdaşlarınız hansı təşkilatlardır?

–Sözün açığı cəmiyyətdə öz aktivliyi ilə seçilən QHT-lər bu yöndə də fəaldırlar. Elə təşkilatlar var ki, qhtxeber.az yarandığı gündən bizimlə əməkdaşlıq edir. Əslində biz onları deyil, onlar bizi seçiblər desək daha doğru olar. Sayt yarananda bu təşkilatlar bizimlə əməkdaşlıq etməkdə maraqlı olduqlarını bildirdilər. Biz də məmnuniyyətlə onlara bütün informativ dəstək verir, onların fəaliyyətini işıqlandırıq. Hətta elə olub ki, hansısa təşkilatın keçirdiyi tədbirlər, icra etdiyi layihələr barədə onların xəbəri olmadan bir neçə dəfə məlumat vermişik və sonradan özləri bizimlə əlaqə yaradaraq təşəkkür ediblər. Bax belə hallar da olub. Bizim qapımız hamının üzünə açıqdır. Gənclər üçün Təhsil Mərkəzi, Gənc Vətənpərvərlər Birliyi, Azərbaycan Tələbə Gənclər Təşkilatları İttifaqı, Azərbaycan Gənclərinin Avropaya İnteqrasiyası Təşkilatı, Azərbaycan Tələbələr Birliyi, İqtisadi Tədqiqatlar Mərkəzi, Qaçqın və Məcburi Köçkün Gənclər Təşkilatı, Sağlam Düşüncə Gənclər Təşkilatı, Gəncliyin Elmi-Mədəni İnkişafı İctimai Birliyi, Beynəlxalq Avrasiya Mətbuat Fondu, Təmiz Dünya Qadın Hüquqları Mərkəzi, Azərbaycan Hüquqşünaslar Konfederasiyası kimi təşkilatlarla mütəmadi əlaqələrimiz var. Hərdən elə olur ki, onlardan məlumat gəlməyəndə təəccüblənirik. Tez arayıb axtarırıq ki, niyə səsiniz-sorağınız gəlmir, layihənin icrası nə yerdədir? Bizimlə sıx əməkdaşlıq edən beynəlxalq təşkilatlar da var. Bütün təşkilatların adını sadalamaq vaxt baxımından mümkün deyil. Bundan başqa elə təşkilatlar var ki, onların rəhbərlərindən biz ekspert kimi bəhrələnirik. Vətəndaşların Əmək Hüquqlarını Müdafiə Liqasının sədri Sahib Məmmədov, “Konstitusiya” Araşdırmalar Fondunun sədri Əliməmməd Nuriyev, “Multimedia” İnformasiya Sistemləri Texnologiyaları Mərkəzinin direktoru Osman Gündüz, Nadir Adilov, Mehriban Zeynalova və adlarını çəkmədiyim bir sıra QHT rəhbərləri ekspert kimi həmişə müraciət ünvanımız olur. Onların rəyləri nəinki QHT sektorunda, bütövlükdə cəmiyyətdə diqqətlə izlənilir.

–İnternet media olaraq kadr ehtiyacınızı təmin edə bilirsinizmi?

–Kollektivimiz kiçikdir. Amma peşəkarlıqlarına söz ola bilməz. Redaktor müavini Natiq Muxtarlı uzun müddət mətbuatda külüng vuranlardandır, işinin peşəkarıdır və ən vacibi məsuliyyətlidir. Bilirsiniz, qhtxeber.az fərdi fəaliyyət müstəvisi deyil, bu sayt Şuranın portalıdır. Burada işləyənlər öz məsuliyyətlərini anlayır, harada işlədiklərini bilirlər. Nəyi və necə çatdırmağı artıq prinsip kimi qəbul etmişik. Yaradıcı heyətdən Jalə Tofiqqızı da uzun müddətdir mətbuatda çalışır, yaxşı qələmi var. Jalədə daxili senzura çox güclüdür. Yeganə Süleymanova mətbuatda yeni olsa da, QHT sahəsində təcrübəsi böyükdür, demək olar ki, bütün QHT rəhbərlərini tanıyır. Onun təcrübəsindən yararlanırıq. Amma dəfələrlə deyilib, yenə də təkrarlamalı olacağıq. Bizdə QHT jurnalistikası, onu sosial jurnalistika da adlandırırlar, yox səviyyəsindədir. Onu da qeyd edim ki, internet mediada işin böyük həcmi kontent-redaktorun üzərinə düşür. Yeni media yeni redaktor tipini – kontent-redaktorluğu yaradıb. Bu haqda elə sizin qəzetdə İsmayıl İsmayılovun çox gözəl yazısı dərc olunmuşdu. İngilis dilindən tərcümədə “kontent” mahiyyət, məzmun deməkdi. Bu bir az informasiya ötürmək mənasını da verir. Kontent-redaktor anlayışı məlumatla işləyən insanı ehtiva edir. Kontent-redaktor saytda sorğular, bannerlər yerləşdirir, yeni bölmələr yaradır, forumda dəyişiklik edir. İnternet jurnalistikasında tək müxbirlər yox, redaktorlar da ənənəvi jurnalistikada olduğundan fərqlənir. Bax, bizim belə kadrlara ehtiyacımız çoxdur. Hazırda faktiki olaraq kontent-redaktorluğu saytın əməkdaşları edirlər. Bu onların işi deyil, amma nə etməli, informasiya cəhbəsində uduzmaq istəmirsənsə çevik olmalısan.

–Siz Azərbaycanda sosial jurnalistikanın yox dərəcəsində olduğunu bildirdiniz. Bilmək olarmı, bu sosial jurnalistikanı ənənəvi jurnalistikadan fərqləndirən nədir?

–Permanent axtarışda olan cəmiyyətə köklənmiş Azərbaycan KİV-i əslində qeyri-stabil daxili və xarici mühiti funksinonallaşdırır. İnformasiya alıb, ötürmək şərtləri elə də sürətli dəyişmir. KİV-in sosial mahiyyəti və missiyası da stabildir. Amma peşəkar fəaliyyətin qayda, prinsip və sxemləri dəyişir. Əslində jurnalistikanın əsas hədəfi müstəqil sosial institut kimi auditoriyanı məlumatlandırmaqdır. Təbii ki, ictimai şüurda mətbuat hələ də sovetdən qalma, olduqca anormal funksioner kimi əks olunur. Hakimiyyətlə idarəolunan arasında körpü rolu oynayır. Bu arada jurnalistikaya yeni model vermək, daha doğrusu yeni imic qazanmaq prosesi asta templə olsa da, baş tutdu. Jurnalsitikanın bu qanadının özünə yer etməsi bir çox anlayışlara yenidən baxmağa sövq etdi. Məhz bu mərhələdə sosial jurnalsitika məvhumu yarandı. Ənənəvi jurnalistika hesab edir ki, vətəndaşa məlumat və öz fikrini çatdırmaq yetərlidir. Vətəndaşın nə qərar qəbul etməsi onun öz işidir. Sosial jurnalistikanın tərəfdarları hesab edirlər ki, jurnalist oxucuya informasiya verməklə yanaşı, özünüidarə cəmiyyətində qərar verməkdə də iştirakçı olsun. Yəni, seyrçi, oxucu, dinləyici ictimai həyatın aktiv fərdinə çevrilsin. Təbii ki, burada güc informasiyaya deyil, yaradıcılığa, mövzu seçiminə, faktlara, məqalənin strukturuna, rəyçilərin seçiminə, ekspertlərin deyəcəkləri fikirlərə üstünlük verilir. Əgər sosial jurnalistika müzakirə üçün yeni mövzu açmaq, dəyişiklikləri izləmək, yeni həyat reallıqlarını təqdim etmək, dəyişkən dünyada daha yaxşı yaşamağa dəstək olmaq, yaradıcılığa, həyati aktivliyə stimul vermək rolunu öz üzərinə götürürsə, qhtxeber.az-da bu prinsipləri QHT-lərə tətbiq edir. Biz çalışırıq ki, QHT fəaliyyətini elə çatdıraq ki, oxucu o prosesin mahiyyətinə varsın. Belə bir ifadə var: bir nəfərin ölümü faciədir, milyonların ölümü statistika. Biz belə qəbul etdik ki, milyonların həyatından yazsaq adi statistik olacağıq. Ona görə hər QHT-yə konkret yanaşmağı üstün tutduq. Bu həm də menecerlikdir. Tanıtmağın bir yoludur. Təkrarçılıq reklamın əsasıdır. Amma fərdi yanaşma PR-ın qızıl prinsipidir. O səbəbdən biz QHT-lərə tribuna verməklə, obyektivliyimizi qorumaqla yanaşı, tanıtımımızı da gerçəkləşdirdik.

–Sizin portalda QHT TV bölümü də var. Bilmək olarmı bu bölümün mahiyyəti nədən ibarətdir?

–Sayt yaranandan bəri dizaynında iki dəfə dəyişiklik etmişik. Ümumiyyətlə, internetin imkanları və inkişafı hər gün yeni ideyaların yaranmasına səbəb olur. Əgər zamanla ayaqlaşmaq, texniki dəyişikliklərdən bəhrələnmək istəyirsənsə, öz sahəndə yeniliklərin tətbiq edilməsinə çalışmalısan. Çünki internet media qaynar və daim inkişafda olan mexanizmdir. Sonuncu dəyişiklikdə biz sayta QHT TV bölümünü əlavə etdik. Burada məqsəd tədbir keçirən, layihə reallaşdıran QHT-lərin fəaliyyətini vizual olaraq da çatdırmaqdı. Onu deyim ki, bu əlavəmiz uğurlu alındı. Hətta yeni ideyaların yaranmasına səbəb oldu. Birinci, ideyamız saytın nəzdində internet TV yaratmaqdır. Hesab edirəm ki, bu QHT fəaliyyətini geniş auditoriyaya çatdırmaq üçün yaxşı imkan olar. Biz əvvəllər materialları yerləşdirəndən sonra hansı səpgili informasiyaların daha çox oxunduğunu izləyirdik. Bəlli oldu ki, Şura rəhbərliyinin açıqlamaları, QHT-lərlə bağlı fikirləri, yeni qrant elanları, analitik yazılar, mütəxəssis rəyləri, vakansiyalar haqda məlumatlar daha çox oxunur. Ona görə, də saytda Şuranın xəbərləri və ən yeni qrant elanları rubrikaları yaratdıq. Burada bir məqamı mütləq qeyd etməliyəm ki, qhtxeber.az fərdi özfəaliyyət dərnəyi deyil. Burada hər bir dəyişiklik üçün mütləq məsləhətləşmələr aparmaq lazımdır. Amma Şura sədri Azay Quliyevi tanıyanlar bilirlər ki, o, müasir yanaşmaya, avanqard fikirə həmişə diqqətlə və hörmətlə yanaşan adamdır. Azay Quliyevlə işləmək rahatdır. Şura sədri konkretliyi və yeniliyi dəstəkləyən adamdır və bu baxımdan hər hansı ideyanın reallaşması üçün problem görmürük.

– Bəs, gələcəkdə hansı yeniliklər gözlənilir?

–Çexiyada təhsil aldığım müddətdə PR-ın təşkili və menecment ixtisası üzrə dərsdə çex müəllimimiz bir gün çox maraqlı metodla dərsə giriş verdi. O, divarda proyektor vasitəsilə böyük bir fil şəkli çəkdi və sual etdi ki, bu fili necə yemək olar? Müxtəlif variantlar səslənəndən sonra müəllim bir toxunuşla fili 7-8 hissəyə böldü və dedi: Biz fili parçalayaraq yeyəcəyik. Biz də işə yanaşmamızda buna üstünlük veririk. Qarşımıza qoyduğumuz məqsədə doğru mərhələ-mərhələ, hissə-hissə gedirik. Tələsmədən və gecikmədən. İndi sualınıza cavab olaraq bildirim ki, biz gələcəkdə saytın ingilis və rus dilində versiyalarını hazırlamağı düşünürük. Hesab edirik ki, beynəlxalq təşkilatlarla əməkdaşlıqda, xarici auditoriyaya çıxmaqda bu vacibdir. Bu haqda fikirlərimizi bildirmişik, çox böyük ehtimal ki, reallaşacaq. İkincisi isə, internet TV ilə bağlı fəaliyyətimizi genişləndirməkdir. Bir fikrimiz də QHT fəaliyyəti ilə bağlı debatların keçirilməsi və bunun vizual yayımıdır.

Rufik İSMAYILOV

525-ci qəzet.- 2011.- 8 dekabr.- S.6.