Bakıda tatar şairi Abdulla Tukayla bağlı beynəlxalq konfrans keçirilir

M.F.Axundov adına Azərbaycan Milli Kitabxanasında Tatarıstanın görkəmli şairi Abdulla Tukayın 125 illiyinə həsr olunmuş iki günlük beynəlxalq elmi konfrans təşkil edilib. APA-nın məlumatına görə, bu gündə davam edən konfransda Türkiyə, Tatarıstan, Başqırdıstan və Qazaxıstandan nümayəndələr var.

Tədbirdə çıxış edən Azərbaycan mədəniyyət və turizm nazirinin müavini Vaqif Əliyev bildirib ki, 2011-ci il TÜRKSOY təşkilatı tərəfindən Abdulla Tukay ili elan olunub: “TÜRKSOY təşkilatı tərəfindən hər il bir türk dövlətinin görkəmli şəxsiyyətinin ili elan olunur. Bu ənənəyə 2010-cu ildən başlanılıb. Əslində həmin insanlar bütün türk dünyasının sərvətidir. Bu mənada TÜRKSOY-un gördüyü iş əvəzsizdir”.

Milli Kitabxananın direktoru Kərim Tahirov isə bildirib ki, A.Tukayın 125 illiyi münasibətilə TÜRKSOY-a daxil olan dövətlərin hər birində silsilə tədbirlər keçirilib. Azərbaycanda görkəmli tatar şairinin 125 illiyi ilə bağlı konfrans keçirilməklə yanaşı, onun seçilmiş əsərləri də çap olunub.

525-ci qəzet.- 2011.- 14 dekabr.- S.7.