Qənirə Paşayeva “Onun Sevgi məktubları”nı Yazıçılar Birliyində imzaladı

Dünən Azərbaycan Yazıçılar Birliyinin “Natəvan” klubunda millət vəkili, yazıçı-publisist Qənirə Paşayevanın “Onun Sevgi məktubları” kitabı üçün imza günü keçirilib. Mərasimi Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid açaraq, müəllifin ictimai və ədəbi fəaliyyətindən, onun ədəbiyyata və sözə dərin məhəbbətindən, bağlılığından bəhs edib. Qənirə Paşayevanın yeni əsəri haqqında fikirlərini bölüşən Rəşad Məcid bu kitabın müəllifin yaradıcılığının yeni cəhətlərinin üzə çıxması baxımından da maraqlı olduğunu vurğulayıb.

Qənirə Paşayeva imza gününün keçirilməsinə təşəbbüs göstərənlərə və tədbirin təşkilində əməyi olanlara minnətdarlıq edib: “Bu təşəbbüsə görə, Anar müəllim başda olmaqla, Yazıçılar Birliyinin rəhbərliyinə, həmçinin Rəşad müəllimə təşəkkürümü bildirirəm. Bu təşəbbüsün Yazıçılar Birliyindən gəlməsini mən özümə olan böyük bir diqqətin təzahürü hesab edirəm və bu diqqətə görə minnətdaram. Rəşad Məcid Yazıçılar Birliyində əsasən gənclərlə bağlı fəaliyyət göstərir və məni də gənclər sırasına daxil etdiyi üçün ikiqat şadam”.

Müəllif “Onun sevgi məktubları” kitabının müəyyən qədər təəccübə səbəb olduğunu dilə gətirib: “Mənim indiyə qədər yazdıqlarım tarixi şəxsiyyətlərlə bağlı, Azərbaycan həqiqətlərindən bəhs edən kitablar olub. Amma sevgi üzərində qurulan roman janrına indiyədək müraciət etməmişdim. Niyə mən bu mövzuya və bu janra müraciət etdim? Bunun bir neçə səbəbi var. Mən bu fikirdəyəm ki, indi biz gərgin bir dünyada yaşayırıq. Dünyanın hər yerində müharibələr, münaqişələr, təbii fəlakətlər böyük bir gərginlik yaradıb və bu gərginliklər hamımızın həyatına müdaxilə edir. Mənim fikrimcə, həmin gərginliklərin səbəblərindən biri də insanların içərisində sevginin əskilməsidir. Düşünürəm ki, içərisində sevgi olan birisi pis insan ola bilməz. Ona görə də hesab edirəm ki, bu gün mümkün qədər sevgidən yazmaq lazımdır. Bu kitabda mən sevginin insanı necə ucaltdığını göstərmək istəmişəm. Çox istərdim ki, gənclər bu kitabı iki insanın bir-birinə olan sevgisi kimi yox, onun içərisindəki daha dərin mənaları kəşf edərək oxusunlar”.

Yazıçılar Birliyi sədrinin müşaviri Rauf Aslanov Qənirə Paşayevaya qurumun rəhbəri Anarın adından təbriklərini çatdırıb və gül dəstəsi təqdim edib.

Daha sonra gənc yazar Pərvin, professor Qəzənfər Paşayev, kulturoloq Aydın Xan və digər qonaqlar kitab haqqında fikirlərini bölüşüb, müəllifi uğurlu əsərə görə təbrik ediblər.

Tədbirin sonunda Qənirə Paşayeva kitabının nüsxələrini oxucular üçün imzalayıb.

GÜNEL

525-ci qəzet.- 2011.- 21 dekabr.- S.7.