Mübarizəyə və zəfərə səsləyən sətirlər – “Danışır Azərbaycan!”

“Ağdam“ Ədəbi Birliyinin sədri, “Hərbi and” qəzetinin baş redaktoru, şair Nadir Qədimlinin “Danışır Azərbaycan” adlı kitabı işıq üzü görüb. Kitaba müəllifin qələmə aldığı “Danışır Azərbaycan” və “Mənim ordum” əsərləri daxil edilib. Yaradıcılığının əsasını təşkil edən vətənpərvərlik, millətsevərlik ruhlu poetik əsərlər Nadir Qədimlinin bu kitabında da öz əksini tapıb. Nəşrin ithaf yerində bu cümlə yazılıb: “Azərbaycan həqiqətlərini dünyaya car çəkən Cənab Prezidentimiz İlham Əliyevə həsr edilir!”

Müəllifin bu misraları kitabın həsr olunduğu mövzu ilə bağlı manifest kimi səslənir:

Diqqət! Diqqət!

Danışır Azərbaycan!

Qoy eşitsin bütün dünya,

Qoy eşitsin bütün cahan!...

...Qoy dayansın damarda qan,

Qulaq asın, haqqı deyir

Cənab Ali Baş Komandan!

Azərbaycan rəhbərinin vətənin, millətin haqq səsini dünyaya çatdırması və milli-dövlətçilik maraqlarımızı əzmlə müdafiə etməsi kitabda poetik bir dillə, özü də xalqımızın vahid mövqeyi kimi ifadə olunur:

– Dinlə məni, ey Avropa,

Mən dünyanın haqq səsiyəm

Zaman-zaman, illər boyu

Azadlığın təşnəsiyəm.

Dinlə məni, Amerika,

Öz yurdumun yiyəsiyəm.

Dinlə məni, ey Rusiya,

Nə düşmənə “sağ ol” deyib

Nə də ki baş əyəsiyəm!

Parçalanmış Azərbaycan torpaqlarının bir gün bütöv Azərbaycan adı altında yenidən birləşəcəyilə bağlı ümidlər də bu əsər vasitsilə oxucuya çatdırılır. Müəllif tarixə nəzər salaraq, keçmişin müxtəlif səhifələrini çevirir, onlara öz münasibətini bugünün gerçəklikləri çərçivəsində ifadə edir:

Dinlə məni, Şah Xətai,

Dinlə məni, Sultan Səlim!

Sizlərə də sözüm qalıb,

Çox heyif ki, çatmır əlim.

Adınız var dünya boyda,

Dünya sizə həsəd çəkib.

Sonda düşmən aranıza

Özünüzdən sərhəd çəkib...

Sonda müəllif qələbəyə, Azərbaycanın zəfərinə olan inamını da bədii şəkildə əks etdirib:

Biz yaşaya bilmərik ta

Yarı bədən, yarı bir can.

Ölümə – ölüm, qana – qan!...

Ulu millət, qalx, qalx, oyan,

Əmr eləyir

Cənab Ali Baş Komandan!

Kitabda yer alan “Mənim ordum” əsərində N.Qədimli Azərbaycanın müstəqilliyinin, ərazi bütövlüyünün keşikçisi olan Silahlı Qüvvələrimizi tərənnüm edir, ordumuzu, onun sıralarındakı hər bir vətən övladını zəfərə səsləyir. Şair inanır və inandırır ki, Azərbaycanın üçrəngli bayrağının bütün torpaqlarımız üzərində dalğalanacağı günə çox qalmayıb. Müəllifin qələmə aldığı poetik sətirlər belə bir ümidin müjdəçisidir: qəti qələbə yaxındır və bu qələbə Azərbaycan prezidenti, Ali Baş Komandan İlham Əliyevin rəhbərliyilə əldə olunacaq!

Günel CABİRQIZI

525-ci qəzet.- 2011.- 24 dekabr.- S.20.