Milli Dram Teatrının səhnəsində “Qadın sevgisi”

Dekabrın 24-25-də Azərbaycan Dövlət Akademik Milli Dram Teatrının səhnəsində Viktor Hüqonun “Mariya Tüdor” əsərinin motivləri əsasında “Qadın sevgisi” tamaşasının premyerası oldu. “İkihissəli, şekspirsayağı dram” kimi müəyyənləşdirilən tamaşa mərhum rejissor Mehdi Məmmədovun tərcüməsi əsasında hazırlanıb. “Qadın sevgisi”nin quruluşçu rejissoru Gümrah Ömərdir. Əsas qəhrəman –“Kraliça Mariya”obrazında xalq artisti Məleykə Əsədova, digər rollarda xalq artisti Hacı İsmayılov (Zindan rəisi), əməkdar artistlər Cəfər Namiq Kamal (Vali), Sabir Məmmədov (Fəhlə), Kazım Həsənquliyev (Fəhlə), Ayşad Məmmədov (Yəhudi), Əjdər Həmidov (Yəhudi), Elxan Quliyev (Zindan rəisi), Telman Əliyev (Kansler), aktyorlar Elşən Rüstəmov (Məşuq), Hikmət Rəhimov (Məşuq), Şəlalə Şahvələdqızı (Qız), İlahə Həsənova (Qız), Vüsal Mustafayev (Cəllad) çıxış etdilər. 90 dəqiqə ərzində tamaşaçıya həyəcanlı anlar bəxş edən aktyor heyəti yüksək peşəkarlıqlarını nümayiş etdirməklə ölkənin əsas teatr səhnəsində növbəti qələbəni tarixə yazdılar.

Premyeradan sonra Məleykə xanım təəssüratlarını bölüşdü. “Viktor Hüqonun məşhur “Mariya Tüdor” əsərinin əsasında səhnələşdirilən “Qadın sevgisi” tamaşasının premyerasına çoxdan hazırlaşırdıq. Nəhayət ki, uzun sürən məşqlərdən sonra bu əsəri tamaşaçılara təqdim etdik. Teatrımızın tarixində bu əsər 2-ci dəfədir ki, səhnəyə qoyulur. İlk dəfə mərhum rejissorumuz Tofiq Kazımov “Mariya Tüdor”a quruluş vermişdi və baş rolu həmişəyaşar aktrisa Hökümə xanım Qurbanova canlandırmışdı. Təsəvvür edin, premyeranın ilk günü səhhətimdə elə problemlər yaranmışdı ki, hətta rəhbərlik tamaşanı təxirə salmağı da düşünürdü. 39 qızdırma ilə səhnəyə çıxdım. Və tamaşaçılara xəstələnməyimi hiss etdirmədən, mənə tapşırılan rolun öhdəsindən gəlməyə çalışdım. Ümidvaram ki, hər şey yaxşı keçdi”.

“Bəs, real həyatda necə, əgər sizə xəyanət etməyi qarşısına məqsəd qoyan sevgiliniz olsaydı, siz tamaşadakı “qraf” üçün cəllada əmr verib ölüm hökmü çıxardığınız kimi, onunla da belə davranardınızmı – sualımıza xalq artisti belə cavab verdi. “Allah Təala mənə o qədər böyük ürək verib ki, hətta pislik edən insanlara da nifrət etməyi bacarmıram. Tamaşalarda baş verən pis hadisələr qoy real həyatımızdan yan keçsin. Hamınıza sevgi dolu günlər arzulayıram” –

Qeyd edək ki, 2011-ci il xalq artisti M.Əsədova üçün məhsuldar il kimi keçib. İl başlayanda o, Musiqili Komediya Teatrının kollektivi ilə birlikdə 17 illik fasilədən sonra Qoqolun məşhur “Evlənmə” əsərində “Aqafiya Tixonovna” komik obrazında teatrsevərləri sözün yaxşı mənasında təəccübləndirib. İlin yekununda isə “Mariya Tüdor” tamaşasındakı obrazı ilə yeni uğura imza atdı.

Milli.az

525-ci qəzet.- 2011.- 27 dekabr.- S.7.