Cahangir Mehdiyevin 60 illiyi qeyd olunub

Azərbaycan Kinematoqrafçılar İttifaqında tanınmış kinorejissor və aktyor, əməkdar incəsənət xadimi Cahangir Mehdiyevin 60 illik yubileyinə həsr olunmuş tədbir baş tutub. Tədbirdə yubilyarın sənət dostları, mədəniyyət və incəsənət xadimləri çıxış edərək onun mənalı ömür yoluna nəzər salıblar: “Ömrünün çox hissəsini kinoya həsr etmiş Cahangir Mehdiyev öz yaradıcılığı dövründə kinoda müxtəlif səpkili, parlaq və tamaşaçı tərəfindən sevilən filmlərə quruluş verib. Bakıda anadan olan Cahangir Mehdiyev 1968-1973-cü illərdə Azərbaycan Dövlət İncəsənət İnstitutunun rejissorluq fakültəsində, 1974-1979-cu illərdə Moskvanın Kinematoqrafiya İnstitutunda G.Daneliyanın kursunda təhsil alıb. “Diplom işi” adlı qısametrajlı filmlə diplom müdafiəsini edən gənc rejissor həmin filmlə beynəlxalq festivalda “Ən yaxşı tələbə işi” kimi ilk mükafatını alır. Təhsilini bitirdikdən sonra 1979-cu ildən “Azərbaycanfilm” kinostudiyasında işləyir. Komediya janrında çəkdiyi “Vah!”, “Evlənmək istəyirəm”, “Kişi sözü”, “Gənc qadının kişisi”, “Girişmə, öldürər” və digər filmləri öz dəsti-xətti ilə seçilərək tamaşaçılar tərəfindən rəğbətlə qarşılanıb və bu gün də maraqla baxılır. Onun filmləri bir çox beynəlxalq festivallarda Azərbaycanı layiqincə təmsil edib və mükafatlara layiq görülüb”. Tədbirdə C.Mehdiyevin həyat və yaradıcılıq yolundan bəhs edən film nümayiş olunub. Sonda yubilyar tədbirin təşkilatçılarına və iştirakçılarına minnətdarlığını bildirib, bundan sonra da Azərbaycan kinosunun inkişafı naminə yorulmadan fəaliyyət göstərəcəyini bildirib.

HÜSNİYYƏ

525-ci qəzet.- 2011.- 1 fevral.- S.7.